Wp/avk/Lev Tolstoy

From Wikimedia Incubator
< Wp‎ | avkWp > avk > Lev Tolstoy
Jump to navigation Jump to search
Lev Tolstoy
1828-1910
Rossiavaf suterotik

Lev Nikolayevitc Tolstoy koe Yasnaya-Polyana ( pilkot ke intafa yasa koe Tula kola ) bak 1828 kobliyir. Va ontinapaf ginaf oluikeem pasuyur ; koe sayakafa is dobulafa rossiafa izva Tolstoy yolt poron jontikviele kozwir. Veygadikye al tiyir tcodik ke aboyikeem is dobulik koe Paris poke Napoléon I-eaf. Gadikye, fayik, bak 1814 gan francik zo gralomeyer ; kaiki 1815 ko Rossia dimpiyison, va ervolia buluyur aze ton tawadayaf pilkotik deneon bliyir.

Koe Kazan kotla Lev Tolstoy vayayar. Bak 1851, wetce ervoliazana, va vertega koe Kavkaz kiblayar lize berikye va ekava ixam kereleyer. In va Rumeuca taneaf suterot az Kazakik bam suteyer. Male intaf tawuk koe Krima, va Sevastopol bareaf suterot reduyur. Moi dili grifliyison, koo Germana is Swiza is Franca koyayar aze va Yasnaya-Polyana dimlakiyir lize bak abrotcifa bliratena riwe kotvielon di irubayar. Va konak berpotam az yon suterotap piskuyur : va Geja is dili ( tenuyun bak 1872 ) is Anna Karenina ( 1877 ) is Dimblira ( 1900 ).

Wori koe swava ke Tolstoy lidafa is alkafa artowara askiweyer. Prilaks do yon warlaf tawadayik dum Sutayev is Bondarev va jontik suterot isu teliz korietayad. In pu yon tawadayik va yon intaf pilkot djumanamziliyir, voxen kurenik is nazbeikeem tsuneyed. In va olegana kotcoba miv riwe iayar, va vage is vukuda ikz-. Inafa alka nuvelayar lidatorafa acum bak 1901 va Tolstoy Tumtafa Ujamawa divalkayar. Voxen koo Rossia va galbura va intaf rietoveem trenayar ise ton mujik ilkon bliyir. Vanmiae galbedus suteroteem, Jinafa movera ( 1879-1882 ) is Tokon tir jinafa folixa ? ( 1888 ) is Giwawera koe win tigir ( 1894 ) is Baroya wadja ( 1904 ) is Tokcoba tir yamba ? ( 1905 ) ikz- zo gomurobad.

Tison balemsandaf, deonepeson, in otcer aze koe impadimak tuakolawer aze ba 07/11/1910 koe Astapovo widama ke istefa Rossia ve awalker.

Kalkotavayan suterot[edit]

  • Anna KareninaАнна Каренина ), kalkot- 2002 gan Mixail Kostov, banliz
Lev Tolstoy

Lev Tolstoy

 Blira 1828-1910
 Ava Rossiava
 Suterind Berpot
  Suterot 
  • Анна Каренина (1877) - Anna Karenina
  • Война и мир (1872) - Geja is dili
  • Хаджи-Мурат (1904)
  • Детство (1852)
  • Отрочество (1854)
  • Юность (1855)
  • Воскресение
  • Исповедь
  • Смерть Ивана Ильича (1886)
  • Казаки (1863)
  • Крейцерова соната (1890)
  • Кавказский пленник (1853)
  • Севастопольские рассказы (1856)
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Rb-star.svg  Tuveli icde Arotieva  Rb-star.svg