Wp/avk/Kudjotya ke Laussel

From Wikimedia Incubator
< Wp‎ | avkWp > avk > Kudjotya ke Laussel
Jump to navigation Jump to search

Kudjotya ke Laussel ( okon Kudjotya dem nola ) tir lekeugalafa kudjotya evlon gu Gravette Sare ( moni 25 000 AR tanda ). Kev kalkafa elega seyton balumayar aze kan kerafa varka zo lingeyer. Va koredikya gisa koe ronefa nuba va xa torigina gu nola ke gartol vadjer. Koe tcilaxe ke Bordeaux ( Franca ) zo vider.

Izvot[edit]

Kudjotya bak 1911 koe Laussel rawopaf debak ke Marquay dota koe Dordogne utca ( Franca ) zo kosmayar. Keve kalkafa elegapa koafizayana koe zolonafa bada valeve abrotcafa buta vamoe Beune krant poke Les Eyzies wida, zo trasiyir. Konakara kalkafa elega balumayana gu ayafa vola koe mil debak dere zo kosmayad.

Gaduca ke kosmara va kudjotya pu Lalanne kurmik ke Bordeaux zo yofter. Bantan skeus va rawopa is abdiizvugal, ta suxara va Laussel debak is vegungafa Cap-Blanc buta lizudedayar. Suxara bak 1908 tozuwed, kan yon lizukaf dodelik. Kudjotya dem nola gan Peyrille pomasik ke Lalanne zo kosmayar.

Bak 1911, konak skuks gretcayan azon zo kosmayad :

  • wali bareaksat is balemeaksat, dodelik va elega yunkeyena gu nakila nedisa va toloy korobik trasid ;
  • Kudjotya dem nola tozi santoleaksat zo koafizayar ;
  • ayikyaf kaatoeks yoltan gu Kudjotya dem lujoruyuna taka, koe twa ke Peyrille pu Lalanne ba 11 ke santoleaksat zo murobayar ;
  • bak toleaksat ke 1912, bocafa kudjotya yoltayana gu Kudjotya ke Berlin, pu tcilaxe ke Berlin gan Peyrille kafason zo doler. Mila ina bak Toleafa Tamavageja bal aorara ke alubeaksat ke 1945 va Berlin nuve di zo vilayar. Yon cupaks is tanoy afigasuteks anton lapted.

Kudjotya dem nola keve elegapa dem levak tigis koe vwa razdayasa va raba ke Gravette Sare zo balumayar. Yunkeyeni ki zo solgabeyer, maldeswatanon is gelbetenon. Voxen solgabera roton zo skuyur, me dotolmilon.

Evlara[edit]

Pinta ke taka

Kudjotya ke Laussel elimackon me zo rotevlayar voxe gu Gravette Sare nope martigafa is badafa drunara zo yofter. Nume evlon gu mon 25 AR decitda co tiyir.

Pimtara[edit]

Pinta ke ronefa ma is nolda

Kre gijafa ( 54 cm- x 36 ) gu dzeta gelbetenon zo griiksantuyur.

Kudjotya lentuon zo kaatoeyer. Va nola ke gartol koe ronefa nuba gir. Bata nola sedme lanyona remgrupera co rotir nola vas aultovera. 13 big keve bata nola tigiyid, rosugdalasa va taelafa doca oku puzefa.

Pinta ke taltefa ma

Inafa taltefa nuba tir aykayana keve jivot, robazesa da ina nazber. Coba nutisa usuk moe taltefa epita luber.

Milinde icde kota lekeugalafa kudjotya, va konaka volasa agvava dere rowit, i va konaki ki slikeke volayani dum dalkava is kafkeem is moueem is penayeem is lanca, solve ara dum nugeem is gexata askarasa van nola me tigid.

Vuestexa[edit]

  • Lalanne, J.-G., 1911, « Découverte d'un bas-relief à représentation humaine dans les fouilles de Laussel », L'Anthropologie, t. 22, p. 257–260.
  • Lalanne, J.-G. et Jean Bouyssonie, 1941-46, « Le gisement paléolithique de Laussel. Fouilles du Dr Lalanne », L'Anthropologie, t. 50, p. 1–163.
  • Roussot, A., 2000, « La Vénus à la corne et Laussel », Éditions Sud-Ouest, 32 p.

Dere rupec[edit]

Kudjotya ke Laussel
Venus-de-Laussel-vue-generale-noir.jpg
KOSMARA
Kosmaxo Laussel, Marquay
Franca   Flag of France.svg
Maneka 44°56′ L-, 1°08′ R-
EVLARA
Sare Gravette Sare
Evla 25 000 AR tanda
KIRA
Gije 15 cm-


Lekeraporugalafa kudjotya
Gravette Sare Kudjotya ke VogelherdKudjotya ke SavignanoKudjotya ke KostyonkiKudjotya ke MoravanyKudjotya ke RenancourtKudjotya ke BrassempouyKudjotya ke WillendorfKudjotya ke LespugueKudjotya ke LausselKudjotya ke Dolní Věstonice
Aurignac Sare Kudjotya ke GalgenbergKudjotya ke Hohle Fels