Wp/avk/Kawabata Yasunari

From Wikimedia Incubator
< Wp‎ | avkWp > avk > Kawabata Yasunari
Jump to navigation Jump to search
Kawabata Yasunari
1899-1972
Niponavaf suterotik

Kawabata Yasunari ( 川端 康成 Niponavon)

Kawabata Yasunari koe Osaka kobliyir. Gadikye tiyir selaropik, arayik albas va ezlopa is lingera. Bak 1900 kotcakolon ve awalkeyer. Acum Yasunari bliyir do gadikya dana ko neor ke Osaka grilizebliyir. Inya mildume dere di awalkeyer. Yasunari gan gadikyef veygadikeem zo emudeyer. Veygadikye tiyir xof korobamik dan va tayaxo ta boara ko yon leprostewaf ind al lusteyer. Voxen rawanuca di tiyir. Wali tole klaa isu pere, Yasunari kali awalkera ke veygadikya bak 1906 az tela ke berikya bak 1909 soe kalanyon bliyir.

Nekev albara ke veygadikeem, va gracuca ke merosetiken gadikeem soe satoleyer. Va mon 40 afigasuteks ke gadikye digiyir vexe darpe konaka grilizeblira vaon koton di drasuyur. Batinde yona vudesaca isu klok koofis va inaf suteroteem tozuyud.

Anyustdon kaiki awalkera ke veygadikya, jotafi Yasunari do guazapafe wiiskafe veygadikye zavzayar antaf. Vwepanyafi zokevesiki waleon reduweyed. Bak 1914 per-san-alubdafe akolafe veygadikye awalkeyer.

Battandon, va pone Yasunari suteyer. Bate pone ( Shônen ; Sardik ) arti tansanda ( bak 1925 ) zo sanegayar. Va inaf taneaf suterot zo torigir.

Dene ziavikye Yasunari tevaksaton radimion ugalzeyer aze va bemirubaxo ke Ibaragi olda kofiyir. Vanpiyison maxablodik mali 1916, va Kiyono ayikyapaf oyik di goviunsuyur.

Binunon golde niaon torigino alto ise buiveweson da Yasunari tiyir vollistafi, va Kiyono maxagositik korenayar, ton milikrafamafa renara. Radimi divfira ke Yasunari ko Kyoto bak 9-aksat 1917, wale toloy yik balemdon toz waltwayar. Koe Shônen ( Sardik ) ( 1948 ) bata skeda turowinaweyer. Dere tir dulapafa rabatera da yona doaca, rotisa bak bata blirekola vanmiaon ikrafamuca is listucadjumesuca is krenugafa golera, koe Nemureru bijo ( Kenibesa listikya ) ( 1960 ) ik Mizuumi ( Uzda ) ( 1954 ) ik Yama no oto ( Buura ke meftava ) ( 1949 ) zo rotrasid.

Vexe bat berpot poke yona inafa bagala soe leon zavzad kapbure inafa blira dam Izu no odoriko ( Stutesikya ke Izu ) ( 1926 ). Bat greelt ke blira ke Kawabata va koyara ko Yugashima bak 1918 vadjer. Bam tison 19-daf, koe noldakirafa xuta ini va cuisafa stutesikya ve kazokeveyer. Icde YukiguniNolda Vo ) ( 1935 ) batcoba dere askir da trakur.

Bak 1919, tolsandaf, ini va nuyapaf is naf suterotaf rijay pasur. Koe cavulidebaxo bewik va sint kazokeved. Va Hatsuyo rungrupeyer. Battel, koe yona inafa nega kan Michiko yoltayan, tiyir jotafa zanisikya dulapemena gan in. Neken ulidebaxo moimon xaayar, acum ko dopewa koe Gifu koe meftaveem iste Nipona ta irubara do vanikatcus gadikeem inya ve mallapiyir. Nekevon, Yasunari va ino wan nobayar aze gorayar da di kureyer. Inaf nikeem, givayanon, va egara va kurera tcokeyed. Arti aksat, ino va merogrupena kurerajoasa twa pu in stakseyer. Batcoba en zo gobelir koe Nanpô no hi ( Geuf tey ) ( 1923 ).

Arti tolda geltrafa suterotafa klepa ke Kawabata bokaweyer. Ini grupeyer da va Hatsuyo mea di tolwiyir, wori ko inaf negeem battelya di koingayar. Ta ino kaatoeson va rietavikya, mo jontika koredikya blisisa va yon inaf suterot, izga di aykaweyer. Wori arti alubda ini arinde kureyer. Vexe damo mana kurera, tira ke Hatsuyo va ini veber. Arti santolda, beka bata bifa gan konaktan zo torigir dum sordafa kore tir koe Fubo e no tegami ( Yona twa pu gadikeem ) ( 1932 ), ini va ino di tolwiyir volse di zo awuzayar.

Inafa lovafa gesta drigdasa va kotunuca ke Hatsuyo bam zo ikapiyir gan gribidganesida ugale ini va int di kobibeyer. Luxe ayikyafa ewava suna koe negeem, daletoe me tir tela ke Hatsuyo, joayana gan geltruca, vexe gundaf rietaks kolnan moe inaf ilkaf tacokeem.

Tozi 30 sanda kle tir da va tenafa bliremtrakura zomer : va nyasesa is mekramafa remtrakura, va gestafa tamava lize vanmia inaf kivakseem sordafa listuca aotcewer.

Bak 1968 inaf suteroteem gu Nobel suterotafo poradro zo gableyer. Taneaf niponaf suterotik kazawayas va mana eresklaca. Ba 16/04/1972 koe Zushi poke Yokosuka, Yasunari Kawabata kseyer.

NobelP2.png      Nobel Suterotafo
        Poradro
 : 1968
Kawabata Yasunari

Kawabata Yasunari

 Blira 1899-1972
 Ava Niponava
 Suterind Berpot
  Suterot 
  • Shôkonsai ikkei 招魂際一景 (1921) – Trutca ta porara va yon awalkaf sayakik
  • Abura 油 (1921) – Punta
  • Nanpô no hi (1923) – Geuf tey
  • Yubiwa 指環 (1924) - Xiz
  • Shiroi hana 白い花 (1924) – Batakafa imwa
  • Koji no kanjô (1924) – Peztaka se ke gadiskik
  • Yowaki Utsuwa 弱き器 (1924) – Ranaf trig
  • Jûrokusai no nikki 十六歳の日記 (1925) – Pone ke jinafa santeveada
  • Izu no odoriko 伊豆の踊子 (1926) – Stutesikya ke Izu
  • Sobo 祖母 (1926) - Veygadikya
  • Kurutta ichipeiji 狂った一頁 (1926) – Oviskafu bu
  • Onsen yado 温泉宿 (1926) – Yoridazanisikya
  • Kanjô sôshoku 感情装飾 (1927) – Yoni ingasiki ke pestaka
  • Bôryokudan no ichiya 暴力団の一夜 (1928) – Miel ke yon yelipik
  • Kokyô 故郷 (1928) - Vo
  • Shi to sanbun 詩と散文 (1928) – Ezla is veda
  • Shitai shôkainin 死体紹介人 (1929) – Awalkodadafusik
  • Asakusa kurenai dan 浅草紅団 (1929) – Asakusa ugaldeem
  • Boku no hyôhonshitsu 僕の標本室 (1930) – Jinaf sperteem
  • Suishô gensô 水晶幻想 (1931) Vewukbidga
  • Kishi no shi 騎士の死 (1931) – Awalkera ke okollakisik
  • Onna wo uru onna 女を売る女 (1931) Dodesikya va ayikya
  • Fubo e no tegami 父母への手紙 (1932) – Yona twa pu gadikeem
  • Jojôka 抒情歌 (1932) - Alporka
  • Chirinuru wo 散りぬるを (1933) – Wavefa grilistawesuca
  • Kinjû 禽獣 (1933) – Yoni zveri isu bonol
  • Matsugo no me 末期の眼 (1933) – Lodironokafa disukera
  • Yukiguni 川端康成 (1935) – Nolda Vo
  • Utsukushii tabi 美しい旅 (1940) – Listafa koyara
  • Aisuru hitotashi 愛する人達 (1941) – Teleem albas
  • Meijin 名人 (1942) - Goograba
  • Chichi no na 父の名 (1943) – Yolt ke gadikye
  • Shônen 少年 (1948) - Sardikye
  • Kotsuhiroi 骨拾い (1949) - Niskatredura
  • Embazuru 千羽鶴 (1949) – Suray dem batakafi zveri
  • Yama no oto 川端康成 (1949) – Buura ke meftava
  • Hi mo tsuki mo 水月 (1953) – Tael koe lava
  • Mizuumi みずうみ (1954) - Uzda
  • Yumiura 弓浦市 (1958) - Yumiura
  • Nemureru bijo 眠れる美女 (1960) – Yona kenibesa listikya
  • Kyôto 古都 (1961) - Kyoto
  • Kataude 片腕 (1963) - Ma
  • Tanpopo たんぽぽ (1964) - Tciugo
  • Yuki 雪 (1964) - Nolda
  • Utsukushisa to kanashimi to 美しさと哀しみと (1961) – Gabentuca is listuca
  • Kawabata Yasunari-Mishima Yuki'o ôfuku shokan 川端康成・三島由紀夫往復書簡 (1970) – Tweem do Mishima
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Nobel Suterotafo Poradro

1901: Sully Prudhomme 02: Mommsen 03: Bjørnson 04: F. MistralEchegaray 05: Sienkiewicz 06: Carducci 07: Kipling 08: Eucken 09: Lagerlöf 10: Heyse 11: Maeterlinck 12: Hauptmann 13: Tagore 14: ⌂ 15: Rolland 16: Heidenstam 17: GjellerupPontoppidan 18: ⌂ 19: Spitteler 20: Hamsun 21: France 22: Benavente 23: Yeats 24: Reymont 25: Shaw 26: Deledda 27: Bergson 28: Undset 29: Mann 30: Lewis 31: Karlfeldt 32: Galsworthy 33: Bunin 34: Pirandello 35: ⌂ 36: O'Neill 37: Martin du Gard 38: Buck 39: Sillanpää 40: ⌂ 41: ⌂ 42: ⌂ 43: ⌂ 44: Jensen 45: G. Mistral 46: Hesse 47: Gide 48: Eliot 49: Faulkner 50: Russell 51: Lagerkvist 52: Mauriac 53: Churchill 54: Hemingway 55: Laxness 56: Jiménez 57: Camus 58: Pasternak 59: Quasimodo 60: Saint-John Perse 61: Andrić 62: Steinbeck 63: Seferis 64: Sartre 65: Coloxov 66: AgnonSachs 67: Asturias 68: Kawabata 69: Beckett 70: Soljenitsin 71: Neruda 72: Böll 73: White 74: JohnsonMartinson 75: Montale 76: Bellow 77: Aleixandre 78: Singer 79: Elitis 80: Miłosz 81: Canetti 82: García Márquez 83: Golding 84: Seifert 85: Simon 86: Soyinka 87: Brodski 88: Maxfuz 89: Cela 90: Paz 91: Gordimer 92: Walcott 93: Morrison 94: Oe 95: Heaney 96: Szymborska 97: Fo 98: Saramago 99: Grass 2000: Gao 01: Naipaul 02: Kertész 03: Coetzee 04: Jelinek 05: Pinter 06: Pamuk 07: Lessing 08: Le Clézio 09: Müller 10: Vargas Llosa 11: Tranströmer 12: Mo 13: Munro 14: Modiano 15: Aleksievitc 16: Dylan 17: Ishiguro