Wp/avk/Jacquou tayexusik (suterot)

From Wikimedia Incubator
< Wp‎ | avkWp > avk > Jacquou tayexusik (suterot)
Jump to navigation Jump to search
Jacquou tayexusik

Rupa

Jacquou tayexusik ( Jacquou le Croquant ) tir berpot ke Eugène Le Roy ( 1836-1907 ). Ton skulta koe Revue de Paris virda wali 15/03/1899 is 15/05/1899 taneon zo sanegar, aze ton karba diretandon. Nega va blira ke Jacquou tazukon gu sordafa mivblirizva kareizur. Mali rumeugal kali guazugal, gradilik va jiomaafa vertuma is volmalyaceem dun exur. Kle to en seltaf delt gan Le Roy zo drager.

Martissou gadikye ke Jacquou tir vey oxileem ke levetirik exus va jiomaik. Zo givat da dem tayexusikaf blay va Reignac lamone al kovilar ; radimion ko xalta zo stakseyer kire va zanisik ke Nansac biptik al adjubeyer lize di awalkeyer. Buntura tiyir volmalyafa kiren bantan va inaf vakol al aytayar. Banvielu Jacquou is Françou gadikya sutapon blid ( ordon dum jontik tawadayik bak XIX-eafa decemda ) ise gan riyomes Nansac zo onkad. Ko grostanafa mona domon ice Barade aalxopo gogelbed. Gadikya ke Jacquou di kuncawalker.

Tukramason va jaxadara abdiplekuyuna pu gadya, Jacquou va aalxo ke biptik kle djukuteyar. Kaikion Bonal adlutik ke Fanlac widama va gadiskik koemuder. Voxe bak 1822 zo basflir aze waroldon mulufter, tuantason va Jacquou erbiskafu. Inu va jontika isu fiuk stuva ugalar aze gu Nansac lamone zo kobarkar. Lina inaf renanik mali rumeugal vanpiyisa aguntanik nopeon pikserser eke va Gour groya va int titmimar.

Voxen Jacquou zo lajutunuyar nume ko pokefo aalxo gelber. Batvielu jaxadatason gu batyon jiomikaj nekiyis va intafa volkaluca, dun tiskir ise dun tegir. Va tawadayikaf blay tere lajukevmadar azen sin va Nansac lamone belcon vangid azen Jacquou firder.

Gralomeyenu gan batultik, zo kojizar. Nope sokira ke Artowara ke 1830 gu lanzara nemon divvawar. Nekev skeusa runrojura ke Vidal Fongrave aluteik abidas va lazava ke kimtik, inafa kagara tiyir astirbapafa.

Direfa tevsanda ke blira ke Jacquou di tir wana dem gubeckafa bifa. Jacquou moni lerdsanda wetce intayeldiasik va kaluca lajupartfir. Kle, arti iyeptafa blirapa, Jacquou tiyisu tel ironokik ke korikeem ke intafe sare, va guazugal rotimpavantar abdida awalker.

Koredik ke berpot

Jacquou : ikayolton tayexusik, tir gradilik ke berpot. Rumegal tir eaftaf, tcalayan gan copuca is askipejera. Radimion vanpir godjafe is listafe yikye kotunon grupese vaintafa gola ( Périgord ) is irubasikeem ( tawadayik ). Batcoba is inafa anduca jupad da inu va kevmadara rogrustar. Va ewava ke malyerotasik bam viwazer, kaikfison va eka ke ilkafa jaxadara.

Martissou : ok yoltackon Martin Ferral tir gadikye ke Jacquou. Yofrik ke Nansac, moblison gitadur. Koe xalta awalker radimida gu adjubera va tcabanerasusik ke Nansac volmalyon al buntur.

Françou : gadikya ke Jacquou, sintaaf kurenik isu gadikya olgon gokobasa ta gaara va nazbeik. Copon kuncawalker.

Rawaks ke ageltafe Herm lamone, sordon digiks ke Nansac biptikye is anteyane gan Jacquou

Nansac biptikye : tir kevlidik ke berpot ise va rofavera ke jiomafa vertuma viwazer. Viele tawadayik vaon exud, do Jacquou dirgasu, to va kotak ke vura lecon dilfud. Nansac tir kliwus nuyukik is krumtik. Tir vitcaf is gilinulas boges is erbavonan. Va Herm lamone is pokefo aalxo is jontiko yofraxo ke vema digir.

Nansac biptik va kategirevaf oluikeem ilempayas nope dimpira ke Bourbon prostewa bak 1815 lecackar.

Mona ke Bonal adlutik koe Fanlac

Bonal : adlutik ke Fanlac tir vonik is disik meklabuyus ta koemudera va Jacquou. Va kotrakura pu inu remzilir ise kotaver. Ise gan widik volto xuye zo tarkar.

Lina : yikya tir rumeugal renanik ke Jacquou numen va sint di aguntad. Inafa xonukera va inu apkar kiren inu va tanafa is karafa rena muon satoleyer.

Bertrille : nikya ke Lina, kaikion titisa kurenik ke Jacquou.

Geneviève de Nansac : ok La Galiotte, nazbeikya ke Nansac biptik.

Vidal Fongrave : aluteik tir riwe ayevafa vola ke berpot. Tire va lazava ke sutik runrojur kotviele rotaskir isen va lazava ke Jacquou kevrojur kore va jiz ke Martissou al tiner. Gruadik, tir ke glastafa anameda.

Galibert okoldik : antaf oluik ke nikeem ke adlutik ke Fanlac. Int is bantan va wawikeem pomapad.

Laborie : tcabanerasus flikirik ke Nansac biptik, tir tizik volwontes is dure kugdas va beta ayikya. Inafa gayana rictula va ine tudagar nume va roti fakon girofaver.

Drunara va berpot

Geltrinda ke grabom gu intyona evodara me zo kastar.

Eugène Le Roy va yona pintapafa pimtara is delt va bane sare bilder, kristeson gu grabom va seltaf is malyopas lum pokef gu godela ke jontik geltrevaf suterotik. Kiren berpot va alutara mu lomalyafa seltafa vura mukotar. Me anton tir bliranega ke jotaf tawadayik voxe dere « seltafa lingera » exonena gan sayudasik va sokasanefa lazava. Va tulafa vola ke dulkik tabis va lonjera ke bumpaf jiomik is kaikanzasa copuca kle suzdat.

Sorda va izva kle davon tikir, isen batcoba mali toza ke grabom zo rowir : « Jontikedje rosetiké, to 1818 ilana viele diveik va vema olgalicuyud isen viele Napoléon yoltan gan korobutik ke Herm lamone gu " Estudjik ke Corsika " ko Saint Helena ewala kaike bira zo stakseyer ». Kan batcoba, berpot va armor ke ugalda kazokever. Dere, dizvera va towara ke jaxadasa diotera ke Jacquou tir dulapaca.

Inafa jugemera adre kadar lomantapafa pulafa jiligara vanlaumasa remi berpot. Va tokcoba icde batyon koredik tegis koe berpot ostik rotrakut ? Kottode rorabatet da Le Roy va tolnaeleva divvawar, kodoplekuson va volaca vanmiae seltaf veem. Kiren kevaxaks konakviele pedrad. Va levlikera ke Galibert okoldik kev Nansac biptik ( gradilik kev « ikoraf » oluik ), ok tela ke Bonal kev Dom Enjalbert rotozwat. Luxe Bareaf Veem, Le Roy va tadles lomeem pintapar.

Konak pak ke tawadayikeem va sint gamdad : yofrik is vieleik is barnik is dielik. Jacquou luxeon vanpir intayeldiasik. Bata loma gu konak koredik dere tis ke Bareaf Veem zo tukotrad : tanoy goyolsusik is dere yon tozekik. Voxen ton beta intafa tawadayikafa ravalduga, kot bewik ke Bareaf Veem gan milyona zexa zo alier : aelera is volgaloduca is fereon krabera. Batcoba tir volsafa gu aultove gazase dene jiomik.

Jacquou vanpir leca ke jiluca ke milpulikeem. Va volkalaceem ke intikeem is gabentafa gropa ke sane ke Franca ikz- pulvir. To geltreva tir ta rankera is seltaf delt vox dere kan elimafa pimtara va xo is likeso po is geltrafa izvafa bifa. Maneke belisik va kimteva dile kactar. Le Roy kle tir loon dam tawekaf suterotik iku opelon winkevaf.

Va ar unaykaf kral ostik mbi yofteyer, i va kral ke « galbusik va sokasaneroti ». Soe vokuca wan krulder. Kiren beka koredik va exoneyesa vura exud, pune soe meka tcinera gan kon askisik ok sutesik zo drager. Va ganjedasa adala ke gradilik tove ckanefa abduaxa is wituca jontikviele dace pestalet. Dere miltode ovarotifa torigira kan konak koredik zo remzilid. Kadira va broya is wiiskafa folixa gan merotisa milbavara iku tuwarzara va trak fereon zo kevaldoar.

Kadime suptafa torigira, crakera va fenkura kotviele rosolelasa va savsaf is tawadyaf vodeem wan tir pokefa. Tec vund ke tawadayaf seltay kotlize muxawer. Voxen batcoba va grabomeem is blira ke Eugène Le Roy me firugar. Jontik malyopasik va in gu is voltaireevafa is rousseauevafa prostewa nope po ke inafa viltera kavaniksantud. Eugène Le Roy belcon tir suterotik is funeyasik nume meviele klabuyur da va seltafa malyopara arpumayar ise va gaderopafa trakula muxayar ise va trakusa nuyuca ruyeckeyer.

Mali milgugal, suterotik tir alkafimaf is sokasaneevaf ise tir ke Franc-maçonnerie rijay. Va tawadayikafa copuca inton pimtana efe me al blidayar, voxe soe tir yastaf gu tawadayafa tamava larde va jotugal koe diel lanedje al tiskiyir. To bata dizvera ba geltruca is inyona grupera va dafura va uga mu jontik inaf suteks al noveyed. Va zugafa malyopara va alkaf pukeem dere katrasit, i va tana inafa gelukafa watsinda.

Berpot ta ravera

Berpot me anton tir geltrevaf is malyopas : wan tir sorda nume va belisik ko stuveem ke Jacquou estobasir, i ke votcukaf koredik fereon andaf. Tire, gradilik va jontolafa kotavera zo levgar : seltafa inde su wit, vox dere renafa. Mali ksera ke Lina rumeugalaf renanik, Jacquou gan Galiote nazbeikya ke Nansac zo zoer, voxe va Bertrille tere kiblar.

Batcoba tir taneafa bora ko inafa lyumara va kalfelira va ske is pesteem. Azon inafa tiskira va tamava kan konaka za vegeduwer : adlutik va inafa kotavera bokar voxen to duxara ke blira va anda ke yikye loeke di glotcar : jiz az koflintara az grustara va kevmadara. Va koblira ke koredik tcoket. Batcoba gan zolonuca ke tiskira ke Jacquou koe loletafa is lotuwavafa vema ke Périgord gola zo tukotrar, dum koe Barade aalxo.

Ostik Le Roy va man vergumvelt mu berpot al abdiwiyir. Wit, tavera ke gradilik gan tuseltara ( tadlera az grustara va kevmadara ton lospa ) is turastara nope tiskirapa sume wideytafa is tawadayikafa blira koe tuwavaxo zeitafo gu stuva is nuyuca is tama belcon zo dear. Kle aala zolonon yordackar, me anton banugale kobodon gu pilkot. Tir pakack ke vanamaf frezeem ke sanegaf berpot.

Dere rupel

Jacquou tayexusik
XANTO
Vergumvelt Jacquou le Croquant
Sutesik Eugène Le Roy
Ava Francava
Suterotinda Berpot
Evla 1899
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg


Jacquou tayexusik, taneafu bu ke nevafa piskura ba 1900