Wp/avk/Gustave Courbet

From Wikimedia Incubator
< Wp‎ | avkWp > avk > Gustave Courbet
Jump to navigation Jump to search
Gustave Courbet ( 1819 - 1877 )

Gustave Courbet tir francaf lingesik isu balumasik.

Zolonaf lingesik ( loa 1000 trutca ), tir tan logijarotif is lobirtaf yambik ke 19-eafa decemda, kevcultimevaf is bilitas tove milsareikeem.

Olkevik kretus va redusa nuyuca, va yon amidapaf uum vestar.

Sokasanef libunik is tegisik ke Commune de Paris ke 1871, radimi inafa lubera az lanzara, ko Swiza va int divblir lize di awalker.

Ronoksudana klita

Sanegafa liwomba : Gustave Courbet, yambik

Blirizva

Gustave Courbet koe to Ornans widavama tigisa idjon ice Franche-Comté winka ke Franca bak 1819 koblir. Tir taneanazbalik is tanafe nazbeye ke berikafa balema. Inafa yasa tir gotuskafa is igeltafa tuke pilkotafa gadakiewegapa ke gadikye.

Remi blirugal, Courbet va vaduluca tove intikeem vrutar. Va jontik delt ke sin al isker, dile vanmiae koredik ke buneksap. Milafa kralira va in gu vo zanudaso va zikexa koe jontika inafa trutca kagluyar. Bak blira, Courbet va yona lentefa patecta worar lize zo karolar, koe Paris irubar, ko Saintonge winka ok Normanda do Whistler amerikaf lingesik koyar, ok ko dere Montpellier ganenon gan Bruyas nik is fukorlasik, voxe ko Franche-Comté gola dun dimlapir.

Courbet to « loeke dirnuson va int is ton merosekiana giuca » va sporgafa yambafa klepa koaskir, bad balemoya nelkafa rekola.

Jotafa tanda ( 1833 - 1848 )

Moni sanbalemda, Gustave Courbet gu lingeropa gan Baud gertik zo tugustar, i gan tavesik ke Ornans tiyis ravembik ke Gros. Koirubayase va Besançon mali 1837, yikye va tazukara dene godevrik ke David wanur.

Courbet tir tolsandaf viele ko Paris ta vayara va rokopa artlapir. Voxe gu bana joya va int boreon danter kire va nobara va lingexo ke Steuben is Père Suisse abdialbar. Va dalik ke Louvre tcila dum Rembrandt is Hals is Rubens is Caravaggio is Tiziano ksudar. Ke espanafa ginsa va Velázquez is Zurbaran kosmar. Courbet va Géricault is Delacroix dere mafelar, i va toloy pestakevaf dalik faveyes va brevizap ta lingera va zixa ke milsarefa izva.

Bak bata rekola, Courbet va int wan trasir. Konakviele va int viagon konakilar ( Le DésespéréPiksesik, 1841 ; Autoportrait au chien noirMivdelt dem ebeltaf vakol – 1842 ; Portrait de l'artiste dit L'Homme à la ceinture de cuirYambik dem leltafa anamba – 1845 ).

Kaike turestara ke yon abdiugalaf dalik is pestakevik, va xialara va taneafa yordara va izva ke yamba tuke ilkafa is purafa lingeropa ixam ruyer.

Larde geltreva tickir ( 1848 - 1855 )

Kali 1848 Courbet dene Bontay al wonansar, aze retandon va mon sanoya trutca tere rotatoer. Katcalayanon do Champfleury malyopasik tunawer ise va sanegafa kagrupera banvielu belundar. Diretandon soka va Sielcek koe OrnansUne après-dînée à Ornans ) puon luster. Toleekafa diema seotayana ba bana katecta va abdilaf malyeruk mu direfa staksera solnover, voxen verta ba 1857 zo betad.

Voxon icde aryon grabom, Courbet kev megildara glawer nume va bilita nekir. To tod bak 1849 icde Raporempasik ( Les Casseurs de pierre, vilayan grabom ) az Kotawara koe OrnansUn Enterrement à Ornans ) bak Bontay ke 1850-1851. Bak batu toleafu acku ke XIX-eafa decemda, sedme cultimevafa prostewa, trutcapa ta izvafa ik alkafa ik vundafa ik purdafa watsa zo ickriled. Courbet lingeson va darsafa ik gubefa tamava kev trutcapa va bata agvava sulejer. Malyedar da milsarefa izva don tela ke saneik va man brevizap riwer. Ruyeson da Izvafa yamba benelon tir milsarefa, Courbet va djumera va fabdura va izvafa lingeropa muxar. Xantaf vergumvelt ke Kotawara trutca batenide tir erbilokafa : Izvafa trutca va kotawara koe Ornans.

Bak bana rekola, Courbet va kakevera gorukafa gu wana ke klepa askir. Alfred Bruyas ( 1821-1871 ) kulaf dotayesik xantaf gu Montpellier va KolavasikyaLes Baigneuses ) luster. Banvielu bantan vanpir fukorlasikany va yambik batkane merupteckeson roblidas va dilintyon lingeks. Kagrupera va divefo vo dere malfir. Mali 1854 ta porasa wonara va Courbet, Berlin is Wien va sint mijed.

Pelava ke bata rekola tir kan Lingexo ke yambikL'Atelier du peintre, 1854-1855 ), i kan trutca entisa exaksara lize Courbet va intyona yambafa is gaderopafa kiblara ruyer. Ostik Courbet va bat grabom lumkiraf gu mon 4 x 6 m- gu divrozas vergumvelt vas Geltrafa purdara gotusa va persandafa nesida ke jinafa yambafa is lidafa blira yoltar.

Malyeruk ke Bontay ke 1855 va loa sanoya stama naler voxe golde lum ke grabom va Lingexo vewar. Bata gorara plataer da Courbet va pilkafa wonara raston gu Tamefa Wonara di grustar, i va wonara koe kolna vegeduyuna oyakon gu dalint is yoltayana gu Trapova ke Geltreva.

Akenafa tanda ( 1856 - 1870 )

Yona yikya domon ice Seine bostLes Demoiselles des bords de la Seine ) trutca wonayana dene Bontay ke 1857 nover da Courbet va sagaf rijay dem albasik is rojusik muon tadler.

Courbet dene Bontay belon wonar, jafara orad. Inafa aultovesa warzera aname yona gedrafa watsa vonewer : tcabanesa nakila is patectoy is imwafa yalestaca. Voxen, ton elupkaf tegulasik, yambik va bilita gire vanimpar, nope Dimlakira kou laxaRetour de la conférence, 1863, griawiyis grabom ape lusteyen az vilayan gan exukes milsareik ), i nope trutca nedisa va konak grijaf gertik lutces moe tawadayafa vawa. Lingeks gan Bontay ke 1863 nope situndara va alkafa lidopa zo vewar. In va denfira va Vewanikaf Bontay dace mbi vewar.

Diretandon to Vénus is Psyché ( griawiyis grabom ) div Bontay nope volwalnuca zo dimelagdar. Courbet to bak bata mila rekola va lopistoles grabom linger, i va Xanta ke tamavaL'Origine du Monde, 1866 ) yasegafa jafara jontikedje grupetena gan saneg.

Bal Tamefa Wonara tigisa koe Paris bak 1867, Courbet va lerdoya trutca dene Bontay wonar. Bata kagrupera soe me tatcer da in va pilkafa wonara koe kolna vegeduyuna keve Alma viga miv gire grustar. Saneg va mon decem-balem-sanoy inaf grabom koeon romafelar.

Bak idulugal ke 1869, Courbet koe Etretat jonvieler. Va RuntaLa Vague ) trutca isu Kiria koe Étretat moi xeftoaraLa Falaise d'Étretat après l'orage ) tulon skur. Ba Bontay ke 1870 bata toloya trutca kalsiskeson zo emuded. Sposuca ke Courbet banvielu tir exoneckeyena.

Courbet is Commune lizor ( 1870 - 1871 )

Ba akeoyera ke Toleaf Gindugal, Courbet gu taneagadesik ke Yambikafa Galda zo libur. Edje Paris gan preussenafa ervolia zo deblamer isen jontiktan va kelu ilvulted, pune Courbet koeon zavzagir. Va bifeem ke 1848 dulapeson al suzdayar, ise va veygadikye tiyise artowasik bak 1789 re ape trakodur.

Bak toleaksat ke 1871 inafa viltera gruyewer : gu kokafa libura va int mekiewatcon atoer. Bak balemeaksat, koskusa tujda ke Commune de Paris vajger enide in va parisaf tcileem gire di fenkur ise va Bontay di grustar.

Libuyun gu Pirdot ke Commune, Gustave Courbet soe me tir vedeyaf susik nume va doaliera me paker. Sopeyen gan sayakik ke Versailles bowere ba 7 ke teveaksat, lingesik bak pereaksat gu flint tori tevoy aksat is gu zersa vas 500 talolk is dodera va jizopaf oyak ika 6850 talolk zo lanzar. Restali tir koxackafi kapbure gakera vas xonukera ok rezgalera rewana pu aryon bewik ke Commune de Paris... voxen batcoba anton tir toza ke malyerotafe arge.

Duxarugal ( 1871 - 1877 )

Ba 16/05/1871 grivegedura va Vendôme brija renzayana gan Napoléon I, gan Commune ba 12 ke balemeaksat ke 1871 zo klapayar, i va vanpiyisa leca ke Taneaf Gindugal azu Toleaf. Trabe ba balemka abdi libura va Courbet. Voxen yambik bak pereaksat ke 1870 meproyon al favigeyayar kane pu bowere eruyur da gu tioltera va brija zo di morictar.

Bak 1873 nope ar jiz, Courbet wetce blodik zo malyer. Gu dimdodera va oyak ta malvegedura va brija ika 323091 franc talolk zo lanzar. Courbet va tufakipi drasur aze ko irubara va Swiza mallapir kire va warzafa koflintara kivar.

Bak divblira, soka va inaf kiewegeem konarir ise va nikeem is yasa eninter. Gaderopafa mebogruca ke taneaf tandeem ke Bareafe Sokasane tir mekuvafa gu savsaf bewik ke Commune de Paris. Courbet va dimlapira ko Franca abdi mwa vas jadifa emnagara vewar.

Nekev rubafa emudera vedgobena koe Swiza, Courbet darpe divblira flaydur. Ko ruyat va int drasur, va grabom bagaliaf gu intaf butc mea warzer. Erbarge is gostana diotexa va in loloon dustuled. Ba 31/12/1877 koe Tour-de-Peilz awalker.

Porfeuca

« Va izga mom nolda, ~ Courbet pu jin kalir, ~ maneka ina tir faltafa... Askisik va nolda koe mawa to batcoba me gruped. » Bat katcalaks ke lingesik, munesteyen gan Castagnary, i plataeracka va lingeropa icde fum, va joya ta litevafa aneyara icde ksevakirafa izga fenkur.

Inafa patectoyafa trutca va Cézanne tumafelasasid : « Inafa vanburerapa, ~ in icde Courbet ruyer, ~ tir to nyabafa koplekura va tuwava is dakela ke abdafa toa is tijkirafa dzeta ke aala gu lingeropa ke XIX-eafa decemda [...]. Isen va nolda, in dum mek artan va nolda al linger !» Bak 1860-e sanda, Cézanne va larfi vey ckane ke Courbet zanudar. Va yona orikafa uka is vaf zom pu in dere narar.

Édouard Manet ( 1832 - 1883 ) va intafa boza tove Courbet me palser. Dum bantan, va bilita is karfa vanimpar. Estura moe werd trutca ( Déjeuner sur l'herbe ) gan Bontay ke 1863 zo vewar aze bal Vewanikaf Bontay zo pitcer. Olympia, pistolesa tresenikya dem blafotaf jivot ke Bontay ke 1865 va plabuca ke saneg titickar. Golde kuranira va tunuyara gu cultimaf vexeem, Manet va kelda conyukayana gan Courbet dakir.

James McNeill Whistler ( 1834 - 1903 ), tavembik ke Courbet, va notafa paskalera doon voner. Joana Hiffernan, okon Jo eireya, fertik ke battel, ostik tir abdiyena tezikya ke Xanta ke tamavaL'Origine du monde, 1866 ).

Koe Estura moe werd trutca ( Déjeuner sur l'herbe, 1866 ), Claude Monet ( 1840 - 1926 ) va tcistikye dem kolmeem divrozas va tel ke Courbet konakilar. Bantan va in ostik worayar, i va jotaf yambik tenukes va lingeks koe dilintafo lingexo pakano do Frédéric Bazille.

Carolus Durand ( 1837 - 1917 ) gan Courbet titi 1860-e sanda zo turestar. Milugale Henri Fantin-Latour ( 1836 - 1904 ) va Gustave Courbet kakever aze koe inafo sedielafo lingexo kobar.

Renoir ( 1841 - 1919 ) turestanon gan Courbet dere bokawer aze adre tunuyalawer. Lebaca ke Courbet va in jontikedje tcalad.

Dere rupec

Stragela

I - Grabomestova

  • (fr) Pierre Courthion, Tout l'Œuvre peint de Courbet, « Les classiques de l'Art » dotay, Paris, Flammarion, 1987, ISBN 2080112252.
  • (fr) Robert Fernier, La Vie et l'œuvre de Gustave Courbet. Catalogue raisonné, Lausanne/Paris, Fondation Wildenstein - La Bibliothèque des arts, 2 dov, 1977-1978 :
    • I-eaf dov : « 1819-1865, peintures » BNF n° 346229110}}
    • II-eaf dov : « Peintures 1866-1877, dessins, sculptures » BNF n° 34651515
  • (fr) Niklaus Manuel Güdel, Gustave Courbet. Les dessins, Paris, Les Cahiers dessinés, 2019, ISBN 979-10-90875-83-8.

II - Vayaks va grabomeem

  • (fr) Jules-Antoine Castagnary, Gustave Courbet, Rezé, Éditions Séquences, 2000.
  • (fr) Michèle Haddad, Gustave Courbet : peinture et histoire, Sainte-Croix Pontarlier, Presse du Belvédère, 2007.
  • (fr) Dominique Massonnaud, Courbet Scandale. Mythes de la rupture et modernité, Paris, L'Harmattan, coll. Ouverture philosophique, 2003.
  • (fr) Thomas Schlesser, Réceptions de Courbet. Fantasmes réalistes et paradoxes de la démocratie (1848-1871), Dijon, Les Presses du réel, 2007.
  • (fr) Gilbert Titeux, Au temps du brame... (Les représentations de la chasse dans l'œuvre de Gustave Courbet et dans la peinture allemande du XIXe siècle (1800-1900), Les Presses du réel, Dijon, 2014, ISBN 978-2-84066-605-9.

III - Wonarestova

  • (it) Courbet e la natura, wonarestova, Ferrare, Palazzo dei Diamanti, 2018-2019, Fondazione Ferrara Arte, 2018, ISBN 978-88-89793-43-5.
  • (fr) Denis Coutagne, Courbet-Cézanne : la vérité en peinture, wonarestova, Ornans, Gustave Courbet tcila, 2013, Lyon, Fage, 2013.
  • (fr) Belca, Les Chasses de Monsieur Courbet, wonarestova, Ornans, Gustave Courbet tcila, 2011-2012, Ornans, Besançon, Éd. du Sekoya, 2012.
  • (fr) Belca, Gustave Courbet, wonarestova, Paris, Galeries nationales du Grand Palais, 2007-2008 ; The Metropolitan Museum of Art, New York,2008 ; Musée Fabre, Montpellier, 2008 ; Paris, Réunion des musées nationaux, 2007.
  • (fr) Laurence des Cars, Courbet et la Commune, wonarestova, Paris, Orsay tcila, 2000, Paris, RMN, 2000.
  • (en) Sarah Faunce, Linda Nochlin, Courbet considered, wonarestova, Brooklyn Museum, 1988-1989 ; Minneapolis Institute of Arts, 1989 ; Brooklyn, Brooklyn Museum, 1988.
  • (fr) Alan Browness, Marie-Thérèse de Forges, Michel Laclotte, Hélène Toussaint, Gustave Courbet : 1819-1877, wonarestova, Paris, Galeries nationales du Grand Palais, 1977-1978 ; London, Royal Academy, 1978 ; Paris, Éditions des musées nationaux, 1977.
  • (fr) Marie-Thérèse de Forges, Lola Faillant-Dumas, Autoportraits de Courbet, wonarestova, Paris, Louvre tcila, 1973 ; Paris, Éditions des musées nationaux, 1973.
  • (fr) Michel Laclotte, Palma Bucarelli, Hélène Toussaint, Gustave Courbet (1819-1877), wonarestova, Roma, Villa Medicis, 1969-1970 ; Roma, De Luca, 1969.
  • (fr) Hugo Wagner, Gustave Courbet, wonarestova, Bern, Kunstmuseum, 1962.
  • (en) Gaston Delestre, Gustave Courbet, 1819-1877, wonarestova, London, Marlborough Gallery, 1953.
  • (fr) Jean Vergnet-Ruiz, Exposition Gustave Courbet,wonarestova, Besançon, Yambatcila, 1952 ; Besançon, Musée des beaux-arts, 1952.
  • (fr) Alfred Daber, Courbet, exposition du 130e anniversaire de sa naissance, 10 juin 1819 - 10 juin 1949, wonarestova; Paris, Galerie Daber, 1949.
  • (fr) Robert Fernier, Gustave Courbet, wonarestova, dotaxe ke Ornans, 1939 ; Ornans, 1939.
  • (fr) Belca, Gustave Courbet, wonarestova, Zurich, Kunsthaus, 1935-1936 ; Zurich, Institut Orell Fussli, 1935.
  • (fr) Belca, Gustave Courbet, wonarestova, Paris, Petit Palais, 1929 ; Paris, Éd. de la Gazette des Beaux-Arts, 1929.
  • (fr) Jules-Antoine Castagnary, Exposition des œuvres de Gustave Courbet à l'école des Beaux-Arts (1882), Paris, Impr. E. Martine, 1882.

4 - Blirizva

  • (fr) Jules-Antoine Castagnary, Gustave Courbet et la colonne Vendôme : plaidoyer pour un ami mort, E. Dentu , Paris , 1883.
  • (fr) Alexandre Estignard, Courbet, sa vie et ses œuvres, Delagrange-Louys , Besançon , 1896.
  • (fr) Georges Riat, Gustave Courbet, peintre, Henri Floury , Paris , 1906.
  • (fr) Léonce Bénédite, Courbet , La Renaissance du livre, 1911.
  • (fr) Théodore Duret, Courbet, Bernheim-Jeune et cie, 1918.
  • (fr) Charles Léger, Courbet , Éditions G. Crès et cie, Paris, 1929.
  • (fr) Pierre Courthion, Courbet raconté par lui-même et par ses amis, Genève, Pierre Cailler éditeur, 1948-1950.
  • (fr) Louis Aragon, L'Exemple de Courbet , Le Cercle d'art , 1952.
  • (en) Michael Fried, Le Réalisme de Courbet , Gallimard, 1993.
  • (fr) Pierre Georgel, Courbet. Le poème de la nature , Gallimard/RMN , 1995.
  • (fr) Michel Ragon, Gustave Courbet, peintre de la liberté , Fayard , 2004, ISBN 978-2213615004.
  • (fr) Fabrice Masanès , Gustave Courbet. Biographie , Taschen , 2006, ISBN 978-3822856819.
  • (en) Linda Nochlin, Courbet , Thames & Hudson, Paris-Londres-New York , 2007, ISBN 978-0500286760.
  • (fr) Ségolène Le Men, Courbet , Citadelles et Mazenod , 2007, ISBN 978-3822856819.

Gustave Courbet

Gustave Courbet

 Koblira  10/06/1819,
 Ornans, Franca
 Awalkera  31/12/1877,
 La Tour-de-Peilz, Swiza
 Vedeyot  Franca
 Eba  Lingeropa
 Serna  Geltreva
  Grabom 
Crystal Project colors.png  Tuveli icde Lingeropa  Crystal Project colors.png
Rb-star.svg  Tuveli icde Arotieva  Rb-star.svg
Dimlakira kou laxa, egasa lavapunta ke 1862