Wp/avk/Forteykirafa biloxa ke Millery (yunkeks)

From Wikimedia Incubator
< Wp‎ | avkWp > avk > Forteykirafa biloxa ke Millery (yunkeks)
Jump to navigation Jump to search
Forteykirafa biloxa ke Millery ~ La malle sanglante de Millery (FR)


Taneaf Yunkeyen Loplekuks ke Petit Journal, proyapon, pu belisik va winugaf delt va Carnot taneagadesik drageyer. Voxen mali 4-e otuk, mi cepitesisi va Franca ton toloy pestabaf ewavak zo stoker : Forteykirafa biloxa ke Millery.

Michel Eyraud, i etrakedaf arientusik is todlumusik, va fertikya ton vigrokasik al faver, i va axigafe Gabrielle Bompard fure toriyoltane gu « Gabrielle Bompétard » (« Gabrielle Tuvuironyo ») nope akenafa drucka. Listafa gariandikya ko ketamawa ke Tronson-du-Coudray nuda koe Paris va kulaf Gouffé flibik al koimpar. Ban in gan Eyraud zo telomtar aze zo naber. Alto rembureyeno koe biloxa koe Millery poke Lyon zo jovler azen rotapsana fertafa tolonga ko divefa patecta otcer.

Arugale, metan va kona gluyaxa wal awalkoda kosmayana gan benevtredusik is griawira ke parisaf flibik co exoneyer, voxen Lacassagne kotlebik tis tanealik ke opaf ardial, drunason va usuk lajupaskir. Luxeon Goron okilik ke ardial va feleem dekson saver nume va vrutara tuoviskasa va gunik nekir.

Yunkeks koe Le Petit Journal ba 15/12/1890. Biloxa rembureyesa va awalkoda - Wiks va Millery - Gabrielle Bompard fertikya ke Eyraud.

Jovleyene gan Eyraud, Gabrielle ko Paris dimlapir aze gu dofugik kagar. Ban in pistolen gan feleem va twa razdasa va intafe gelbe akoydon stakser : sopeyen koe Kuba di zo divzurter. Va Gabrielle nakilon gu pizafa ralentara koe mawa ke gomilara katrasir.

« Yunkeyen loplekuks va goni co tineyer ede va nelkaf nakileem ke krijafa folva pu saneg me co dafuyur », ~ sutelasik ke fela vengad. Taneafu bu, dere proyafu, va toloy koridanik bak jiz nedir : « i va Eyraud debanyes is nuvonages, is Gabrielle ranyese aluetafe is kireptafe, wale Decori aluteik isu Henri Robert. Soe ita va toloya ozgodafa pinta kalion solwir : i va azega dem koridasa olkotca is valeveon biloxa dem moeon dimiksantuyun wazdel ke jeg ke Gabrielle Bompard faveyen ta gomilara ».

Bat stagaf tuelimaks soe anton tir grolaptaca kapbure bocafu bu ke Yunkeyen Loplekuks dimtadlesu ton balemoy aluk va myodaf nakileem ke arienta. Inde sutelasik xultuson suter : « Kottan va bat otuk ke Yunkeyen Loplekuks djudigitir aze videter kiren in tir tela lotageltafa is lokotrafa is loblisa kaatoera va tana piza skepeyesa va sanegikeem ».

Va kottan, vaxe Michel Eyraud lanzayan gu xonuka az vrivayan ba 3-e ke tolekaksat ke 1891.

Forteykirafa biloxa ke Millery

La malle sanglante de Millery (FR)

Forteykirafa biloxa ke Millery

 Yunkesik Henri Meyer
 Ord yunkeks
 Fela Le Petit Journal
 Sanegara 20/12/1890


Crystal Project colors.png  Tuveli icde Lingeropa  Crystal Project colors.png