Wp/avk/Exura ke yon rumkanik (suterot)

From Wikimedia Incubator
< Wp‎ | avkWp > avk > Exura ke yon rumkanik (suterot)
Jump to navigation Jump to search
Exura ke yon rumkanik
« Drasura va kurenya tir olgaca. Grupé lokiewon dam bettan, jin toleatomon nyobraf. Oye rinafa gabentafa debala isu nigera, va nomulk ika san-peroy Peso talolk bulkatá. »

— B- Traven


Exura ke yon rumkanik berpot to ba tanoya drasura tozuwer. Ok kre ba konaka drasura. Kiren kotawason va Marcelina kurenya koe jiabun copaf nomulk, Tzotzil amerindiik Candido Castro va renanik ke intafa blira is gadya ke toloye jotafe nazbeikye vox dere tawadayikafa gropa belcon drasur, i va vuranafa vox meruptesa gropa ke patectolik ke Chiapas winka.

To ko bana winka, moe bat siday ont sagondena gu idul ok ont wizuna lev bwamuvara ke artowasa Mexika ke 1920-e sanda, gan sutesik zo ganet. Isen tokman sutesik ?! B. Traven, okon rotir Ret Marut, okon ware Otto Feige, okon dace Hal Croves ? grupenset. Isen volto blirizvafa yovara kotviele mekotrafa is pakafa noved da ikatcut. Voxen kas batcoba en tir zolonafa icde bat arotievaf is gondules suterotik acon ruyeyes : « Redusaf ayik va grabomeem wetce blirizva anton gogir ». Grabomeem vas divatcecke ware megrupene nek vrutas va koekafa grupera va blira is dat ayik kalsaven is kladan is amlitasin titi XX-eafa decemda. Tulon kle koe Mexika lize B- Traven mali 1924 kali awalkera bak 1929 blir.

Voxen va Candido dimon dulapet !! Va Candido re nyobrafo num gokevlaniso do nazbeikeem is Modesta berya va tari dem ar amerindiik anton ronaras va gebeso kobarapo koe eaftafo veskxo. Koe bano datafo bwaalafo veskxo saveno gan Ladino pilkotik, i gan espanaf volwegayesik, sin va ulim ke caoba sladua vas baroy ok balemoy decitor vieleon gobalied. Nope cu is ael is abda is beza is dere itura is pobaxa is usta is boera is rumkara raplekuna gan udutaf tilik is kalveges capataz gelusik mewalison gomejed. Koe wuka ke La Armonia veskxo ke baroye Montellano berikye, tunera va levetiruca wan tir sumef envaks isen grinuyara va alto gan izakuca ke aguardiente lavajeb jontikote is ilamotason kalulin zo sopur.

« Awalt artu zida awiyir, levgon, medakteson, dumede ko tame va int tanwelvuson al malkabuyur ».

— B- Traven


Koe bato kusto pimtapano gan sutesik, koncoba tere madawer. Male sinaf taway enomayan is decenan gu fortey ke berikeem, Martin Trinidad is Felix is Celso is Candido is Modesta is artan va merotazavzatana fa di lirded. Va fa ke piksa efe, vox dere fa ke gotuskuca is walzilira is donafa takreluca. Kiren dene B- Traven, kobasik meviele koteke zo cener.

« Isen koo molda ie tauler : « Tierra y Libertad », i ie slamese va tanboyafa kuranuca ke muchacho palik ». Banvielu va askura titisa ke bifeem fakon gestit. Voxen B- Traven va friastuca me espuyur numen mali belira va vergumvelt ke bat berpot, va tena rowitayat. « Battode va tokcoba wan dikit ? »~ molesaf belisik co rodiviegar. Kev vola va exukesa runta jontikedje belkeyena gan riwe akolesaf prosteweem isu amerindiafa moruca fu kazawat. Va katacera va tizuca kev tizuca eron ok vebanon ware godositat. Bam dile va int akoyet da va bata exura nope maneke volbecafa kerdela mea kuranit. Sutesik ko kakevdara ke ristanikeem estobasiyir numen vaon al kepeyet ise al tutacokapayat neken ina me tir gradilaf kind. Koeon wan mejet, va aryono alto gruidet, efe ton ar siak vox ware koe kizoyu is fortey.

« Exura is tarlera is artowara sotid volbecafa kire va plinafa kenibedara yoltkirafa gu dili is vura kotviele tuskaltad ».

— B- Traven


Koe rantuca is widluca ke lyumara tere kaikfitisa va jowa ke La Armonia num divlizetesa mo anamefo tawavo : tela ke palikeem ke Pancho Vila is Emiliano Zapata koe Mexika ke 1911, is tela ke soviet pirdot koe Rossia ke toleaksat ke 1917, is tela ke amerindiik is Marcos redakik koe Chiapas winka ke 1994... B- Traven va vansara va bata siakrafa is donafa rupa vintesa va ristara is grinuyara is divilkara pu min zilir neke va izva ton pinoba me reizur. Exura ke yon rumkanik va tame dondene gu jebepes sutesik dum Balzac is Hugo is Zola is London meromeunon kazokever, voxen bat berpot is sutesik dere riwed da gu yoltany ke dodelikaf suteroteem dum Ramuz is Istrati ok dace Giono zo koanamayad. Kan zakafa bruxa vol forendejesa vox perlesa ke sayudas yambik, B- Traven va trutca voldjumasa va telyona ke Diego Rivera linger. Ayikye is ayikya, felina ok felisa, gu ozaks me zo kastad oke me zo konugevoad, voxe tciskon awid, ton kotafa ayuca.

Dere rupel

  • B- Traven : Germanavaf is espanavaf suterotik ( 1882-1969 )

Klita

Bat vildeks tir kalkotavaks va teliz dene bano internetxo.

Exura ke yon rumkanik
XANTO
Vergumvelt Die Rebellion der Gehenkten
Sutesik B- Traven
Ava Germanava
Suterotinda Berpot
Evla 1936
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg