Wp/avk/Dotokilik ke Casterbridge (suterot)

From Wikimedia Incubator
< Wp‎ | avkWp > avk > Dotokilik ke Casterbridge (suterot)
Jump to navigation Jump to search
Dotokilik ke Casterbridge

Atoera

Tegira koe Engla dilizer, koe Casterbridge sordafa widava koswayana gan Dorchester koe Dorset winka. Bat vergumvelt tir ke berpoteem icde Wessex gola ke Thomas Hardy ; kotbat olkoy koe sordafa tawadayafa winka dilizer. Bat berpot tir tan dalaf ke suterotik.

Vildeks

Bal widafo kazaxo poke Casterbridge, jotaf cadimkobasik, Michael Henchard, va int tugrijar nume va Susan kurenikya mijer. Gralombenon gan ruyat, ika aluboy Guinea talolk va intaf kurenik isu Elizabeth-Jane pintik pu Newson birelik doler. Dimon pufaf ba diregazda, bam va yasa giopon lasukatrasir. Viele gildar da kurenya is nazbeya kramon al griawid, pune vruzar da remi direfa tol-san-tanda mea di ulir ( batvulon tir tol-san-tandaf ).

San-anyustda tiskir. Henchard, re kulaf dolekik va zaipa, al vanpiyir dotokilik va Casterbridge. Vartaf gu pufuca, nope intafa pesta ta arientura zo tarkar voxe zo albansar kire tir raliperlesaf is ketsaf is dile tizaf. Remi bat tandeem, Henchard va goaspil ke « drasura » va kurenik al paser ise al torar da tiyir nyobraf.

Bata volpulvisa rotuxadara tuvrendawer viele bal arientusa koyara koe Jersey va Lucetta Le Sueur korenar, i va yikya ropesa va in bak akolera. Gildat da Lucetta is Henchard ilagid numen sposuca ke Lucetta koe Jersey zo rawar. Henchard ko Casterbridge dimlapir, iskeson va ant Lucetta likesa va danexa ke sintafa skedegara. Enide den seltomany gire zo naler, pune va Henchard vode di kurer, voxen batcoba tir volrotisa kiren in ixam tir kurenikkiraf. Kalir da va kurenik dikir, i va kurenik ape awalkeyes vox rotir rodimlanitis. Nekev arpuma, Lucetta va skedegara djuproginur.

Viele Henchard va ina denlapisa ker, pune Susan gin awir do Elizabeth-Jane, i do nazbeik vanpiyis yikya Sinya tid wawakorapafa. Newson moe bira al griawir, numen Susan mekane dadison va beta dzal va Henchard al toz kaaneyar. Tisa opelafa ayikya va « yerumara » do Henchard gu kotunafa mwedaca jontikedje torigiyir. Re nuer kase Henchard gu antaf mwedaf kurenik me co zo krupter.

Ba sinafa artlanira va widava, Susan is Elizabeth-Jane va kelda ke Donald Farfrae gamdad, i ke jotafe skotikye van Amerika. Votcukafe is mempesafe, Farfrae tir ozodafe gu dolesik va dent is zaipa ise va witafa tawamidura dulaper. Va Henchard gu wavdafa erbadebala pirdamason divtirkar. Dulapeyen Henchard kobuiver enide ine di zavzagir, ise va blodaplay kunte lan Jopp kodrageyemb va mil play firvir. Va Farfrae dere tunackar aze va ageltuca icde intaf lekeugal odiar.

Moi katrasira do Susan is Elizabeth-Jane, Henchard va sin ko vegungafa monama inker aze va Susan nujifacnar aze kurer. Elizabeth-Jane gu sokira moe kazaxo weti san-anyustda zo gumegrupesar. Henchard va intafa skedegara va Lucetta dere gubirgar aze pu ina suter da sintafa direfa kurera zo dimnover. Alkejana, Lucetta va dimstaksera va intyon tweem erur voxe va bildesa kakevetca di bulfer.

Milugale, falanya ke Henchard toz juster. Skedara va Farfrae emoyawer darpeda ine loloon toz tufiuntawer. Tis leeke gaanaf, Henchard pester dratcen gan bantel, moekote viele Elizabeth-Jane vaon toz korenar. Grabara loloon vanlaumar vieli Farfrae gu volruptes dolekik va int inker. Henchard luxeon vanyer loloon kloxaf ise loloon arpumackar nume va wavdafa erbadebala titfir. Va kurera ke Donald is Elizabeth-Jane dace tsuner, voxen ba muluftera ke Susan kosmar da Elizabeth-Jane me tir intafa nazbeya. Elizabeth-Jane vey in bak pintugal mulufteyer ; bate toleafe Elizabeth-Jane sotir nazbeik ke Newson. In va bata razdara gu ine palser voxe mali bat viel tufentalawer ise vanyer udutaf tove ine, ise toz trakur da kurera do Farfrae gu ine co di grikter.

Lucetta mal Jersey bam artlapir aze va mona koe Casterbrige luster. Tuke awalkera ke kulafa vuwikya, va tufapa al konoler, aze givayana gu muluftera ke Susan, va skedegara va Henchard djutuwinugar. Va Elizabeth-Jane wetce dositikya seger, trakuson da bata tiura va vrendafa skalera ta worara pu Henchard co di tiskar. Voxen batcoba to volkare ilkadera ke Henchard va « intafa » nazbeya. To bam lana ayikya tcokeyesa va dolera weti san-anyustda va birga ke Henchard pu tigisikeem razdar. Henchard va askiks welidar. Lucetta taneatomon gildason va datel entis, vaon ezfir ise va voda ke intafa viltera va in nuer, dace larde mila viltera zo gubirgayar. Ina dere va intaf gelkeugal rotuxadar : nurutir xantik ke Bath ise va yolt ke kulafa vuwikya al narar. Taneon prealaf gu kurera va Lucetta, Henchard va bata kurera lujon tere jugemer, dere mali intyon erbazvak. Bantel klabur neke naleteson zo xuvapar. Voxe Lucette va Farfrae re renar. Farfrae dare dulapese va Elizabeth-Jane va ina re toz korenar. Sin va sint aun kured edje Henchard kulon mea djupokures ve erbatiner nume va intaf digikseem divbozatason gonodoler.

Edje Henchard flaydur, pune Farfrae wan ticfir. Libuyune wetce dotokilik ke Casterbridge, va arienta ke Henchard kanarir ise va vieleikafa kobara drager, djupomason va miltel emudeyes is ware torigin gu tezik. Me sonker da Henchard batvielu tir volnik, nekev walzera ke dotapirdot is Elizabeth-Jane. Henchard va renatweem ke Lucetta pu Jopp guazaf volnik ke Farfrae odiar. Jopp vaon tusanegar. Birga zo razdar numen kotrafa widava va Henchard is Lucetta bak iyepta vajiker. Nazbesa Lucetta tukrizanon nope kilandraca vere mulufter.

Dimemudes gan kottan, gire ruyatfamaf, Henchard va krenuguca ke Elizabeth-Jane vanpise inafa blirakreda re anton rozinular. Voxen viele Newson nastafe gadikye volaun dimon vere awir, pune in kivar da va ine dere fu drasur nume jupar da Newson di folir da ine al mulufter. Viele gu rotaxadaks zo givar, pune Elizabeth-Jane silukon va in ilfir. Remi yon diref aksat, va Donald Farfrae vanfir nume tere kurer. Kadimi katrasira do intafe nastafe gadikye, Elizabeth-Jane pu Henchard ixer aze vaon kaaneyar, voxen zo givar da in re tir awalkeyes, iskeyeson va bocaf kuranaceem :

« Elizabeth-Jane Farfrae gu jinafa awalkera meviele zo givar ise me ikuzer ‼»
« Ko baerdafa tawa me zo kotawá ‼»
« Me zo biotá ‼»
« Metan witason va jinafa naboxa lanir ‼»
« Me bre kadime kotawasa teixa tir ‼»
« Meka imwa mo jinafa naboxa zo aykar ‼»
« Metan va jin gosetiketer ‼»

Dere rupel

  • Thomas Hardy : Englavaf suterotik isu ezlopik ( 1840-1928 )
  • Englavafo xanto, dene Wikisource : [1]
Dotokilik ke Casterbridge
XANTO
Vergumvelt The Mayor of Casterbridge
Sutesik Thomas Hardy
Ava Englava
Suterotinda Berpot
Evla 1886
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg


Dotokilik ke Casterbridge, taneafa xantofa piskura ba 1886
Henchard moe kelda van kazaxo tozi berpot, abdida va kurenik is pintikya grijeson al doler. Yunkeks ke Robert Barnes koe taneafa sanegara bak 1886