Wp/avk/Bupsane (suterot)

From Wikimedia Incubator
< Wp‎ | avkWp > avk > Bupsane (suterot)
Jump to navigation Jump to search
Bupsane

1902 : Jack London ta felabrera ko London ke Engla mallapir. Inaf mukot tir miv is ant denlanira va East End londonaf ralom, i va geltrafo stezaxo is gulaf vard, enide va coba endilizesa di wir ise di dizver inde korikeem banlize blir ise dume koeon blid ise va coba askir. Va sinafa blira idjon ice Bup en djuwalzilir. Inaf rabatera tickir pizafa, omavayanon moe miv inyona dizvera isu ugalara vox dere yon gedraf felateliz is munesteks ke Gazaf Nokast is yona malyerotafa kogrupara is grosibaf munesteks.

« To xojo tir lize kon ayikoc gomeblir ike gomedisuker ike gometerektar. »

— Jack London


Bupsane felaberpot ton skulta koe Wilshire's seltevafa aksateafa virda wali bareaksat ke 1903 is taneaksat ke 1904 zo sanegayar. Jontika copuca koe London tir, i sutucapa, grijafe ayikye isu ayikya tigid, copik ik aelesik ik kuncesik koe bat Bup zuvdawed. London widava tir durulafa seltafa vuka lize dace gael tir jivas isen akolawelk koe londonaf poz is vikiz is tolna is erolta is nulekelafa akida ezad. Bup tir foalkap vilas va kot ayik kosaf gu ruyat is etorkafa tizuca is portuca ke lag is kobarawalta, i gu kotcoba jupasa va pastara va olkik mal dodelikaf sok kal gondulesikuca ok krabesikuca. Moblira vanpir vieleafa rowoka.

Titfira ( vergumvelt ke taneaf luz ke neva ) dum felabrera va lodomaf seltaf badeem ke London widava. Batcoba tir ilkafa bagalara, i valdig icde sutikafa tamava wina gan metan. Levlavekara ko koepak ke copuca.

« Loon koe East End tiskiyí, nume loon va int kobuiveyé da bupsaneik gomeyerumayar [...] Tite bat Bup axik is tuficanik gu ruyat is eskodik tigid. Ise ede va nazbeik dikid, pune blira ton manyona gropa tir xokagapafa eke va int volins sokevvilar, ennarmon ».

— Jack London


Viele vanmiae gondulesik tigir, pune Jack London va warzaf selt volaun razdar, i va tel ke vulkunikeem ke rabafa artowara. Ok kre tel warzen gan rabafa artowara az narmon jovlen ko izga. Va tamava dem jastrakrabesik is yasa koe sutafa is saneliakirarsafa kraba, i dem korik gizionursus. Va dorita is sinka koe zailak is kipeafa kuba is mielditsaxo is ael is nuda is mulufta is xonuka is kogestunsun rumeik is tipuiskuca is megrelera ikz- pimtar.

Anjeteson va bate bupsane, Jack London korarur. Batkane tir tuwarzasik. Dum witaf felusik, va pedrasa vrutara orikafa is tueaftasa icde ayafa gropa isu seltafa titi XX-eafa decemda koe London troskada batinde sugdar.

Jack London va zanelaroti is akoydafi kexi malyopar, va tulon kexi vebasi va lanira ke wawik mielcekon is biusi va kota vukira iku senyara mo starka ok kev tuvel ok ko gerd. Ditsaxo is sanegafa grelera en tid liona gugropasa va wawik. London va kotak ke englaf selt is inafa egalesa pofera lanzar nume va adrafa fabdurapa moimaxur.

Bata nega tir popafa vrutara, i yon tsedas delt va kakeveyen korik. Lantan gan miv London eluckus va afigasutera zo tumeawalkolayad. Gosutena neva nedisa pu min va Jack London pokef gu sane is dem seltevafa rieta.

« Numen eyikany, ede konviele va London rovoworatal nume va korik kenibes moe starka ok werd di trasitil, pune me folitil da bantan co tir webdik abdualbas va moda lodam kobara !! Kre grupel da gu mielcekon lanira gan zanelaroti al zo vebatar ise va mekara runda ta kenibera bak afizcek dadir. »

— Jack London


Dere rupel[edit]

Bupsane
XANTO
Vergumvelt The People of the Abyss
Sutesik Jack London
Ava Englava
Suterotinda Felaberpot
Evla 1903
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg


Dorset vawila koe East End revava ke London, afigasuteks ke Jack London ta berpot, 1902