Wp/avk/Aytara koe Aubry-le-Boucher vawila (yunkeks)

From Wikimedia Incubator
< Wp‎ | avkWp > avk > Aytara koe Aubry-le-Boucher vawila (yunkeks)
Jump to navigation Jump to search
Aytara koe Aubry-le-Boucher vawila ~ La tuerie de la rue Aubry-le-Boucher (FR)


Moe sid toloye tantazukotiskafe ardialikye senyed ; bate me di moblir. Kaikeon toleazenton, dackene kev rebava, burkafe degrikye dem meem broes va cug uul va baroy nudardialik acagir ise gu dierk is wedap dratcer. Tan jiik tere abaltar nume sin va stezik lajupagvundud.

« Koe zazda ke Aubry-le-Boucher vawila, korikye yoltkirafe gu Liabeuf, darevielon buluyuse va Fresnes flint, pu bettan anamterektas dakteyer da va icle toloy " jiikaj  elvon milsielon fu kosidayar.

« Numen, tire, miltan va eaftafa imizxa divnediyir, i va wedok ontinaf vas mon 20 cm-.

« Walzeyen, Deray glastakoraf ardialik isu Fournes va lulawesik run zazda di keyed. Va in ben meem konubayad voxen belcon kranaveson ve kiyozud. Kake seila besasa va epiteem, miltan va mantaf leltaf pandak dem cuynafa cepta isu wanuskak keve meem palseyer. Nume toloy jiik dapnarison uduton zo bakayad. »

Krent lidam zovdaks va Liabeuf kagad, i va in radan gu banyon gastatozekik djurezgalen gan lantan dum Ernest Laut ko Kerguelen tursia « ta dimblira koe galaf alpoz ke Geenael ».

Soe arienta di nijeyer loon birtafa. Jean-Jacques Liabeuf, tol-san-bardaf, tir dodelaf vukudebusik. Tire su zo divflintar, voxen inafa lanzara wetce tresera ton malyerotafa roklara fure awir, numen batcoba va inafa jaxadadasa siputera isu zuguca diver.

Edje atatcera va kobavera ke ardial is malyerot tozuwer, i va giladujana kobavera kotviele sopenik tir gropamik, pune La Guerre Sociale fela va Liabeuf gu gradilik askir : sedme Gustave Hervé nuyevaf seltevik, inafa lanzara gu xonukera anton tir nyukafa adjubera raplekuna gan selt olgapaf tove wawikeem is abdualbasa va aytara lodam welidara va volmalyaca. Liabeuf arienta tir « to Dreyfus arienta ke dodelikeem »...

Pandak is wanuskak ke Liabeuf

Vrivayan bak 02 ke pereaksat ke 1910, Liabeuf kali bocafa vula va ne dun kalir : « Relkafa, me tí tresenik, me tí tres... »

Luxe ceptakiraf pandak isu wanuskak ke tozekik, rilitik kadime ralpoda ke tcila ke Ardialxe resareon mekeunison nek kovudanon vaon rovonyaser.

Jean-Jacques Liabeuf[edit]

Jean-Jacques Liabeuf ba 11 ke taneaksat ke 1886 koe Saint-ÉtienneFranca ) koblir.

Ardialaf iyelt va Liabeuf

Arti volfakaf is wawaf rumeugal, nope dubierama konakviele zo lanzar. Moi sayakugal dene ugdaf vorn ke ervolia koe Afrika, va Paris wetce vukudias dodelik koirubar. Va lane Alexandrine dere tise tresenikya toz renar. Batdume gu tresera volmalyon zo buntur nume di zo koflintar. Va int djukujaxadar.

Liabeuf ba 04/05/1910 gu xonukera zo lanzar aze ba 02/07/1910 di zo vrivar. Umbedara va Armand Fallières taneagadesik al zo movewar. Inafa klibura bak miel va exaksarapa dem loon kunoy korik tite rebava ke Santé flint koe Paris nekir, i va exaksara kadasa teca vintera edje ardialik is konak decemoy exaksasik bal tizafa lureskara wal ji is rojusik va Liabeuf zo bakad.

Vuestexa[edit]

  • Yves Pagès, L'Homme hérissé. Liabeuf, tueur de flics, Ed. L'Insomniaque, 2002, Ed. La Baleine, 2009
  • Frédéric Lavignette, L'Affaire Liabeuf. Histoires d'une vengeance, Fage Éditions, 2011

Aytara koe Aubry-le-Boucher vawila

La tuerie de la rue Aubry-le-Boucher (FR)

Aytara koe Aubry-le-Boucher vawila

 Yunkesik ?
 Ord yunkeks
 Fela Le Petit Journal
 Sanegara 23/01/1910


Crystal Project colors.png  Tuveli icde Lingeropa  Crystal Project colors.png
Rb-star.svg  Tuveli icde Arotieva  Rb-star.svg