Wp/avk/Anna Yakimova

From Wikimedia Incubator
< Wp‎ | avkWp > avk > Anna Yakimova
Jump to navigation Jump to search
Anna Yakimova
1856-1942
Rossiaf artowasik

Anna Vasilievna Yakimova yer-kirafa gu Dikovskaya ( rossiavon Анна Васильевна Якимова, Диковская ) tiyir rossiaf artowasik. Koe Tumyumutcac widama koe Vyatka bowexo ke savsafo rossiafo gindaxo bak 24/06/1856 kobliyir. Ba 12/06/1942 koe Novosibirsk ke Rossia koe savsafa TSSS awalkeyer.

Blirizva

Anna Yakimova koe Tumyumutcac vey gertikafa yasa kobliyir. Bak 1867 gadikye koe ujafa reila ke Vyatka zo kofliyir, i koe widava tisa stanjuxo tove gaderopikaf kevusik va vertuma. Tan tavesik ke reila tiyir Anna Kuvcinskaya ( 1851-1909 ) tisa bewik ke memwedaf rijay tazukayan gan Nikolay Tcaykovski. Kali 1871 bana ina va biuna neva pu reilik bak asadasa ravera beliyir. To tiyir taneaf gaderopaf turestasik va Anna Yakimova.

Kadimi dobara mali anyusteaksat ke 1873, Anna Yakimova wetce tavesik koe tawadayafa bema ke Kamecnitskaya wida tigisa wale Orlov is Vyatka kobar ise va memwedaf sanegaks pu tawadayik amuzer. Ba 12/05/1875 zo soper aze ta abdarafa dagira ko flint ke Sankt Peterburg zo stakser lize va Anna Kuvcinskaya ixam dere dagina katrasir. Koridayana xuton gu Jiz va 193 zo vanbuluyur. Bak imwugal ke 1878 do Yevgenya Zavadskaya is Olimpyada Kutuzova va Tver winka isu Kostroma isu Yaroslavl isu Nijni Novgorod van tawadayikeem exuler. Kan rolaf yolt koe Sormovo deor ke Nijni Novgorod levirubar ise koe iaxe kobar.

Banlize zo duxar ise va savera va kobasikeem grupar : ton copafa kuba is kobas afizcek dem 12 bartiv az veban bartiv bak mielcek. Koe Nijni Novgorod va Stepan Xalturin is Nikolay Morozov rungruper. Sin va divflintara va Ekaterina Brecko-Breckovskaya banugale dagina koe flint ke widava djugrustad. Sopura me rodilizer. Anna Yakimova artowason djukutegir.

Bak 1879 ko Sankt Peterburg levirubar ise va int palser. Va Narodnaya Volya grustaks yoter aze va egara va bilmara va Aleksandr II gindik koe Odesa az tel koe Sankt Peterburg paker. Bak santoleaksat ke 1880 do Yuri Bogdanovitc va dolta ke Malaya Sadovaya vawila lizukedur lizu erilt ta rundara va foba di zo suxar. Foba ba remlakira ke gindik co di zo edavesir.

Moi adjubera va gindik ba 13/03/1881, koe Moskva remi tanoy aksat va int palser aze ko Kyiv lajulakir. Voxe ba 06/05 do Martin Langans yerumanik is Fani Moreinis zo soper. Sin gan Merkulov gu ardial al zo relmed. Anna Yakimova koe Petropavlovskaya ralma zo kobuder. Bak dagira ba 25/10 va Martin nazbeye radekar. Koridana xuton gu Jiz va 20, ba 27/02/1882 zo xonukalanzar voxen gakera gu parmafa poana kobara zo nuner. Ko xalta ke Kara koe Sibira bak anyusteaksat ke 1883 artlakir. Azon koe Akatuy dere di zo dagir. Nazbeye pu yasa ke ar stanjunik zo nafer isen Anna Yakimova ko xalta ke Kara zo dimstakser.

Xe ke Kara xalta, 1891
Wiks va Akatuy xalta, 1891

Radimi awalkera ke Langans yerumanik koe flint bak 1883, Anna Yakimova va Moisey Dikovski bak 1892 tolyerumar. Andrey sinafe nazbeye koe Kara koblir. Bak 1894 katecton gu sonara va warzaf gindik, gakera gu tolsandafa poana kobara zo nuner, azen bak 1899 ina do yerumanik ko Tcita zo stakser lize sin va vegedura va remsibiraf kelot gokobaved. Teni gakera koe Tcita zo gozavzagir azen ko europafa Rossia bak santoleaksat ke 1894 rovodimlapir. Ba 05/09/1905 koe Orexovo-Zuyevo koe Vladimir winka gire zo soper. Gu dagin anyustoy aksat zo lanzar nume ko flint ke Tcita gire zo stakser. Koe mila widava kali titfira ke gindafa vertuma di zavzagir. Bam ko Odesa az Moskva tere dimlapir. Va tawuk ke Seltevafo Artowaso Pako ta Tadlesa Koka paker.

Kaiki Artowara ke Saneaksat dene konak boweref kizey ta tavera pu olutikya. Mali 1921 va jontiko namio sanegar. Bak 1941 nope abdulapira ke germanafa ervolia dratcesa va Moskva, ko Novosibirsk zo divbulur lize ba 12/06/1942 zo awalker.

Suteks ke Anna Yakimova

  • (ru) По поводу пьесы «1881 год». Каторга и ссылка, 1925, С. 274—276.
  • (ru) Редактор сборника воспоминаний, документов и материалов «Кара и другие тюрьмы Нерчинской каторги. 1881—1917», М., 1927.
  • (ru) «Большой процесс» или «процесс 193-х». Каторга и ссылка, 1927, С. 7-31.
  • (ru) Группа «Свобода или смерть», Каторга и ссылка, 1926, С. 14-16.
  • (ru) Покушение на Александра II, М., 1928.
  • (ru) Григорий Прокофьевич Исаев, М., 1930.
  • (ru) Памяти Марии Александровны Коленкиной-Богородской, Каторга и ссылка, 1927, С. 177—186.

Vuestexeem

  • (ru) Дружинин Н. М. А. В. Якимова (Диковская), член Исполнит. комитета партии «Народная воля» // Дешевая библиотека. — 1926. — № 9—10.
  • (ru) Диковский А. М. Анна Васильевна Якимова (Из воспоминаний сына) // Прометей. — М., 1967. — Т. 3. — С. 401—404.
  • (ru) Энциклопедический словарь Гранат. — Т. 40.
  • (ru) Анна Васильевна (1856—1942), публицистка, Писательницы России (Материалы для биобиблиографического словаря), ответственный Ю. А. Горбунов, Уральский следопыт

Anna Yakimova

Anna Yakimova

 Koblira  24/06/1856,
 Tumyumutcac, Vyatka winka, Rossia
 Awalkera  12/06/1942,
 Novosibirsk, Rossia
 Vedeyot  Rossia
 Tegira  Bilmas artowasik
  Bifa 
P Parthenon 2.svg  Tuveli icde Izvopa  P Parthenon 2.svg


General Map of Asiatic Russia- Showing an Up-to-Date Division into Provinces and Regions, Maritime Administration of the Maritime Region, and the Routes of Russian Seafarers WDL96.png
Rossiafa artowasikya

Varvara AleksandrovaMaria AnaninaNatalya ArmfeldAlyona ArzamaskayaSofia BardinaFanya BaronEkaterina BartenevaVarvara BatyuckovaAnastasya BitsenkoSofia BogomoletsAnisya BolotinaEkaterina Brecko-BreckovskayaMaria CkolnikLidya EzerskayaRebekka FialkaLidya FignerVera FignerYevgenya FignerGesya GelfmanEmma GoldmanXristina GrinbergRaisa GrossmanSofia Ivanova-BoreycoAleksandra IvanovskayaEvdokia IvanovskayaPraskovya IvanovskayaAleksandra IzmaylovitcMaria KalyujnayaFanni KaplanNatalya KlimovaNatalya Kogan-BernsteinZinaida KonoplyannikovaMaria KovalevskayaElizaveta KovalskayaYulya KrukovskayaMaria KutitonskayaTatyana LebedevaSofia LeschernOlga LyubatovitcVera LyubatovitcFani MoreinisMaria NikiforovaSofia PerovskayaAnna Pribilyova-KorbaAnna RasputinaYevgenya RatnerNeonila SalovaNadejda SigidaNadejda SmirnitskayaMaria SpiridonovaMaria SubbotinaNadejda SubbotinaYevgenya SubbotinaOlga TaratutaLyudmila TerentyevaAnna ToporkovaMaria VetrovaLyudmila VolkensteinAleksandra XorjevskayaAnna YakimovaVera Zasulitc