Wp/avk/Étienne Brûlé

From Wikimedia Incubator
< Wp‎ | avkWp > avk > Étienne Brûlé
Jump to navigation Jump to search
Étienne Brûlé - The Old Mill Inn, Toronto.JPG

Étienne Brûlé ( ±1592-1630 ) ~ Francaf kotgrupaf vestasik va Amerika bak taneafu acku ke 17-eafa decemda.

Blirizva[edit]

Viele va Amerindiik koe Kanadaxo kevlapiyid, pune francik va notafa tikira doon exoneyed. Maneke konak boniasik va mivirubafa wida koirubayad. Batinde « aalapabusik » awiyid, i francik kiblayas va tamava ke indiik. Va sinyona orpa isu ava isu vage vanikatcuyud. Aalapabusik va gildara va mivirubik noveyed ise tiyid vestapasik.

Étienne Brûlé tiyir taneaf aalapabusik isen inafa izva tiyir skesa lidam iyeptasa. Bak 1608 ba santevda va Franca buluyur edje koe Honfleur bliyir, kore bak 1690 koe Champigny-sur-Marne poke Paris al kobliyir. Mo tota ke Samuel Champlain vestasik van Québec is warzafo amerikafo boniaxo va int seguyur.

Artlapira va Québec gola[edit]

Bak teveaksat va Tadoussac artlapiyir. Remlapira va Atlantika welfa kan tota remi konak aksat tiyir teca kotavesa yotca, voxen debala moe krimta tiyir figafa. Espanaf euskadiaf onasik va mordara is onara mone Priwaxopo ke Terre-Neuve ewala vol djupakayad nume va francik zugon dun dilfuyud. Soe Brûlé me zo kostruyur.

Warzafa blira[edit]

Arti konak aksat, figapaf fentugal va boniaxo alkejayar. 16 ke 24 ayik ke brinuga ke Champlain awalkeyed. Étienne Brûlé is Nicolas Marsolet dositik mobliyid, tiskison va fentugal koe aala. Gruratcabaneyed ise koo nolda grulaniyid. Va Naskapi grelt rungupeyed. Brûlé va avaravera gruteyer nume kan inafa ava doon kalion rogoleyer.

Champlain bak 1610 va ine stakseyer enide vanmiae Huron sane di bliyir. Seramafe Brûlé va Wendat ava raveyer nume avuckuyur ise ton indiik va int vageyer. Al vanpiyir bewikack ke Rupol cos. Bak 1611 blitison ko Huron cosxo gire mallapiyir lize balemdon di sokeyer.

Va tiura va witkot is tcabanera is noyeltura mbi taveyer. Va witkot kum almuk ke cirdata re grupepuyur. Brûlé vofayar da cirdata tiyir dalaf rob ta blira koe aala. Ta vegedura va witokot isu dimempara bak koyara zo malsaveyer. Brava kum inyona gama is almuk zo kolnayad. Almuk ta zovdara va liwot is sutelara va staksa dere zo kouneyer. Ise edefiste dace zo romalestuyur ! Wori esturacka kre tiyir kum pemmikan estuxa ik faldola ik irka ik rodurtxa.

Brûlé va intaf ikayolt vas aalapabusik konakinde riweyer. Tiyir donaf sledasik. Va konaka brinuga ta parloera va myot vuidon gu Champlain pakeyer. Va siday talte Québec vestayar. Inafa koyara askiyid da va yona govitafa is megrupena gola kosmayar. Va gola wale Erie uzda isu Ontario exuleyer ise tiyir taneaf europik vestayas va noelaf Pennsylvania galdolk koe Tanarasokeem.

Folvafi bali[edit]

Inafa blira va lopizaf viank bak 1616 levgayar. Bal koyara gan Seneka greltik zo gralomeyer. Pilkomodane wetce francaf volnik mayakon zo nakeyer. Tuvawelatason va blira govilteyer da di tiyir walasik wal sin is francikeem. Inaf vogonugal va tanda tiskiyir.

Sposuca ke Étienne Brûlé zo tuspupiaweyer viele Champlain gu inafa kobavera mu myotdolesik zo givayar. Ine mea tiyir vestasik mu gazik vols tec sulesik lakazas va amerindiik is moortes va myot. Ostik katalikevaf gertik va inafa nuyapafa lida dere culimeyed : koton ikatcuyuson va jontika orpa is lida ke Huron sane, Brûlé do konaka indiikya etorkon bliyir.

Bak 1629 viele britanik va Québec widava klioton konariyid, pune Champlain laneyer da gan Brûlé keno Saint-Laurent bost al zo nyapeyed. Solve Champlain ko Franca dimlapiyir, pune Brûlé koe Warzafa Franca di zavzagiyir, zanon gu Kirke berikeem, i gu britanaf bonias dolekik konariyis va Québec. Gu zatkik parmon zo torigiyir. Koridayane gan suteks ke Champlain soe meviele di zo jizayar oke rovengayar.

Brûlé ta blira vanmiae Huron sane gire lapiyir. Va abiccoba icde tena ke inafa blira grupet voxen ine nope ruyat nuve flayduyur. Ba inafa dimlpira ko Warzafa Franca bak 1633, Champlain zo givayar da ine gan Huron saneik zo aytasir. Aalapabusik al zo nakeyer aze zo anteyayar aze zo basbewayar dum volnik ! Lazava ke bata baliafa estera is evlacka ke klibura meviele zo triosuyud. Kas va kona gunaca tove Huron selt al raplekuyur ? Oke nope loon gaderopafa lazava zo xonukesiyir ? Metan rokalir voxen tanoya coba tickir : Champlain va forenda mu ine meinde di exaksayar.

Bata tena yosafa lidam mayakafa va cugunaykafa izva ke Étienne Brûlé tenukeyer, i ke tan vestapasik is koyasik grutepes va ava is tis ordik ke arayafa zaavabelcekara.