Wp/avk/Émile Zola

From Wikimedia Incubator
< Wp‎ | avkWp > avk > Émile Zola
Jump to navigation Jump to search
Émile Zola
1840-1902
Francavaf suterotik

Émile Zola ba 02/02/1840 koe Paris koblir, nazbeik ke italiaxantaf dritik.

Awalkera ke gadikye, viele ine tiyir perdaf, ko volfakafa erbadebala va kotafa yasa ke jotafe Émile plekur. Viele gadikya va inkewera ko Paris gorar, Émile Zola va sakiafa blira kosmar : « wawuca koe Paris, ~ di kaliyir ~, tir jontolafa wawuca ». Bata xokagafa debala is rodjera ta ekul is taneafa kobara koe piskurind az play ke suterotaf ugaldusik va in van viltesa sutera di stayad. Mu geltreva is rozayana tuwaveva sutesik va Germinal kaliapon di sayudar : « Minaf gradilik, ~ Zola suter, ~ mea tir karaf ormusik, tel soloksik ke XVIII-eafa decemda. In tir altoopaf detcik ke noelafa opa, tisik tazukayan kan yona vila ise perdoes koe anameda va int kotbartivon kolusa ». Tuke mana ruyera, dolge jontika malyopara Zola va int divaykayar. Sin me di gracayad. Nietzsche pu in tizon dulzeyer : erava ke Zola, tir « alitaratci ». Dere in va Dostoyevski ta pomara me rozinulayar : « Va Zola al belí volse va mana evakaca anton volfakapon al robelí… »

Milinde Jean d’Ormesson al suter : « Kaike batyona malyopara, gijuca ke Zola tir da ko intaf cugexaf grabom va « riwe kotaf milsaref grupenucasok » al kobelcar, sedme tazukoy ke Michel Serres, ise da ko bata granapafa kobara va ilteem ke gaderopafa is seltafa bagaliuca prekson urlickeyena koe felind is moekote va gorukafa bodara ke pestakevafa sukera is alaakafi rali » al vanburer.

Ke Émile Zola vundaf kolnaks zavzar : Rougon Macquart yasa, " tuwavafa is seltafa izva va yasa bak Toleaf Gindugal ".

Aze moni blitena, icde jiz va Dreyfus, Émile Zola va kotgrupafa dilfura kabuyur : Isti 1890 sanda konaka tanda tiyid adrafa enide icde bat jiz inafa trakula iaweyer. Aze mal pawera kal kevmadawera in di pir. Vielu in miniakiraf da Dreyfus redakik tir volgunaf, ba 11/01/1898, koe Aurore fela, pu Sokasanetaneatisik va intafa taulesa twa piskur : Numá. Va datafa gijayoltuca pu in kalion di vanburer ise va lanzara is zersara di vodar, vebason va intafa divbliwera.

In ko Franca bak 1899 di dimlapir aze bak 1902 bardon di awalker, tison 62-daf, nope vimtawera, koe ware bulafa walta.

Kalkotavayan suterot[edit]

  • GerminalGerminal ), kalkot- 2003 gan Laurent Lermigny, Wikikrenteem dotay, banliz


Émile Zola

Émile Zola

 Blira 1840-1902
 Ava Francava
 Suterind Berpot
  Suterot 
  • Les Contes à Ninon (1864)
  • Thérese Raquin (1867)
  • Madeleine Férat (1868)
  • La Fortune des Rougon (1870)
  • La Curée (1871)
  • Le Ventre de Paris (1873)
  • La Conquête de Plassans (1874)
  • La Faute de l'abbé Mouret (1875)
  • Son Excellence Eugène Rougon (1876)
  • L'Assommoir (1877)
  • Une Page d'amour (1878)
  • Nana (1880)
  • Pot-Bouille (1882)
  • Au Bonheur des dames (1883)
  • La Joie de vivre (1884)
  • Germinal (1885)
  • L'Œuvre (1886)
  • La Terre (1887)
  • Le Rêve (1888)
  • La Bête humaine (1890)
  • L'Argent (1891)
  • La Débâcle (1892)
  • Le Docteur Pascal (1893)
Bookshelf icon (red and blue).svg  Tuveli icde Suteroteem  Bookshelf icon (red and blue).svg