Wp/ary/توحد

From Wikimedia Incubator
< Wp‎ | aryWp > ary > توحد
Jump to navigation Jump to search

التوحد، أو لوتيزم، واللي كايسميو المختصين باضطرابات الطيف التوحدي (بالفرانساوية :Troubles du spectre autistique) داخلين فيه بزاف ديال اضطرابات النمو النفسي والعقلي عند بنادم، واللي العلامات ديالهوم كايبانو من الصغر. الاضطرابات فيها بزاف ديال الأنواع إلا أنه اللي كايجمع بينها هو أنها كاملة كاتعطل (أو كاتصعب) التعلم ديال الأطفال والتواصل الطبيعي مع المحيط ديالهوم.

المصاب بهاد الاضطرابات يسمى متوحد أو أوتيست.

العلامات

لوتيزم ما عندوش شكل واحد والأسباب ديالو باقا ما معروفاش مزيان. واخا هاد الصعوبة والعدد الكبير ديال الشكال ديال الاضطرابات، الأطباء والباحثين قدرو يميزو عدد من العلامات المشروكة فأغلبية أشكال لوتيزم المعروفة، بدراسات وبائية إحصائية كاتحاول تعاود مسار حياة الناس اللي ثبت أنهم أوتيست خصوصا فالصغر ديالهوم.

وهاكا، قدرو يوضعو لوائح علامات كاتراقب فالصغر واللي يلا تلاحضات عند الأطفال (في أغلبيتها) خاصها تكون إنذار للوالدين أو المربيين أو الأطباء اللي متبعينهوم باش يزيدو يحضيو النمو ديال الطفل ويعمقو التشخيص وحتى يبداو العلاج والمساعدة ديال الطفل المتوحد.

من أهم العلامات :

  • غياب التبلبيل ديال التريبيات اللي بلغو 12 شهر. التبلبيل هو الهدرة والأصوات اللي ما ميكنش تعتابر هدرة مقادة ديال الدراري فاش يالاه تايبداو يهدرو.
  • غياب الحركات ديال التواصل عند الطفل، خصوصا يلا ماكانش تايشير بصبعو يلا بغا شي حاجة أو ماكايشوفش وماكايتبعش العينين ديال اللي تايدوي معاه.
  • غياب الهدرة المتطورة (على الأقل الطفل يكون كايركب جمل بسيطة وعملية من 2 كلمات أو أكثر) عند الدراري اللي بلغو 24 شهر.
  • الحساسية الزايدة أو الناقصة للضو أو الصداع.
  • الطفل اللي تايميل للعب بوحدو على أنه يلعب مع الناس أو الدراري اللي بحالو.
  • الطفل اللي كايعاود نفس الحركة بطريقة فايتة لقياس، خصوصا التركيب ديال حاجة فوق حاجة.
  • هاد العلامة اللخرة كاتكون تا فالصعوبة أنه يغير العادات ديالو، كايتبرزط وكايتعصب بزاف يلا تبدلات شي حاجة فحياتو أو البلاصة اللي عايش فيها (شي نوع دلماكلة، شي ديكور فالدار واخا يكون ماشي مهم،...).

كاينين علامات خرى اللي يلا تجمعات مع هادو اللي تذكرو يمكن يعنيو ريسك ديال أشكال أوتيزم أخرى، غير هو العلامات خاصها تلاحظ مجموعة وفمدة طويلة شوية، حيت علامة وحدة ماكاتعنيش لوتيزم ولاكين يلا تلاحضو بزاف (أكثر من النص) كايفتحو الباب ديال الشك وخاص الطفل تعطالو المواكبة والمراقبة الطبية اللازمة.

لوتيزم في العالم

على حساب الإحصائيات الوبائية ديال منظمة الصحة العالمية ففي كل 10000 طفل كاينين 60 عندهوم لوتيزم يعني 1 على 166.