Wp/arq/بيكاتشو

From Wikimedia Incubator
< Wp‎ | arq
Wp > arq > بيكاتشو
هذا هو لوڤو تاع پوكيمون

پيكاتشو، هوّا نوع من نواع الپوكيمون (Pokémon) تاع الشاريكة الجاپّونيّة نينتاندو. خرج المرة اللولة ف` الجاپون ف` الـ 1996، في لعاب پوكيمون فار و پوكيمون غوج، خدمهم ساتوشي تاجيري. ف` البداية، پيكاتشو كان شخصية و خلاص، بصح كي اللعاب هادو انشهرو، صار هوّا الشخصيّة الأساسية تاع هاذ الموسلسل، تاع اللعاب و تاني تاع ڤاع العالم تاع الپوكيمون. ف` الموسلسل پوكيمون، پيكوتشو هوّا الشخصية الأساسية، معا مولاه المسمّي ساشا ف` الفارسيون الفرانساويّة، آش ف` الفارسيون الماريكانيّة، ولا ساتوشي ف` الفارسيون الأصليّة ب` الجاپّونيّة. دار شهرة و بدا يبان قاوي ف` الماركيتينڨ ديال الپوكيمون كيما الپيبليسيتي.

حكايتوْ[edit | edit source]

پيكاتشو هوّا شخصيّة تاع فار صفَر يبعت التريسينتي من داتو، تخيّلاتو ليكيب تاع غام فريك و رسمو كان سوغيموري. بيكاتشو انخدم في نفس الوقت مع التطوار ديال رايتشو ف` الجينيراسيون اللولا تاع پوكيمون، و ف` الجينيراسيون الزاوجة لي وراها، بان پيتشو لي هوّا الطبَع اللوّل تاع پيكاتشو. بيكاتشو عندو لقدرة تاع تريسيتي و ‌‌‌حاكم النمرو الـ 25 ف` الپوكيديكس، لي هوّا القاموس لي فيه جميع الپوكيمون و المعلومات لي خاصّين بيهم.

كوسپلاي تاع بيكاتشو، ساشا و أوندين لي هما لشخصيات الأساسية تاع لاسرر لولانيا

بيكاتشو معتابرينو رمز تع الثقافة كاواي لي تمعني "مينيون" و روپريزونتاتو أن آليسون، لي هيّا پروفيسور ف` الأنتروپولوجية الثقافيّة، كيما ميكي ماوس. رجع معروف عالمياً و بان ف` شحال من مسلسل خارج الپوكيمون، كيما لي سيمسون و دراون توغيذر

غام بوي كولوغ ملونا على حساب بيكاتشو و بيتشو

أصلوْ[edit | edit source]

پوكيمون هوّا ملكيَت` نينتندو، خرج ف 1996 مع اللعابي پوكيت مونستر فير و پوكيت مونستر روج. في هادو اللعابي لازم تقبض و تونتريني وحد المخلوقات يقولو لهم الپوكيمون، باش يرجعو قويّين. كل واحد فيهم عندو القدّرة تاعو، كيما كاين لي عندو القدّرة تاع الماى و لي عندهو القدّرة تاع النار،... و زيد. كل قدّرة عندها الريزيستونس و الفيبلاس تاوعها. كيما معظم البوكيمونات، كان سوجيموري هوّ الي رسم پيكاتشو مع مساعدات ليكيب تاع غايم فريك. بيكاتشو نصنع في جينيراسيون لولة تاع پوكيمون ، مام سي بيكاتشو ماهوش مع لبوكيمونات لوالا لي نصنعو ، هو اللول الي عندو لقدرة تاع تريسيتي .

إسموْ[edit | edit source]

إسم هاذ لپوكيمون هو "بيكاتشو"، داير تقريباٍ كيما قاع سماوات لپوكيمونات لُخرين، متكون من شحال من كلمة لي عندها علاقة بيه. ساتوشي تاجيري قال بلي "بيكا" لي تمعني بلعربية "شرارة" و "تشو" هي لحس لي يديرو لفار. بما أن جاي على أساس "فار" تاع تريسيتي نستنتجو بلي ديزاين تاع بيكاتشو جاي من بيكا لي هو حيوان من عايلَة الفيران. برغم أن أغلبيّة الپوكيمونات يتبدلو سماواتهم كي يترجمو سماواتهم مل جابونيا لأي لغة وحدوخرا كما مثلاً بل جابونيا لپوكيمون لي سموه ليزاغدون رجع سمو بلفرونسي دغاكوفو و بلونغلي شاريزارد بيكاتشو بقي سمو هو هو فكامل اللغات.

كيفاه داير[edit | edit source]

الفار هوّ الحيوان الي خرج منها الديزاين تاع بيكاتشو

موصوف على أساس فار[1]، بيكاتشو يشبه لفار صفر لي فيه وحد لربعين (40) سونتيميتر و يوزن 6كغ[2] عن دو جسمو مبلوّط، يديه و رجليه قصار بصح كعالتو طويلا قد جسمو. لَون ديالو صفر و في ظهرو كاين زوج شرطات بُنِيِينْ. كي يكون كغوماتيك لَوْنو يتبدل يتبلدل و يبدا يميل لذهبي. لطراف تاع وذنيه كحولا، و فيه زوج دُويرات حمرين في خدودو. كعالتو جايا على شكل عضلم و طرف تاعها مقسوم على شكل قلب عند لي فومال. هو موالف يمشي على زوج (2) رجلين بصح كي يكون يجري ولا كي يبغي ياتاكي يبدى على ربع (4) رجلين. كيما الأكثرية تاع الپوكيمونات لي فلاسيري ، بيكاتشو ما يقدرش يهدر بصح يكومينيكي بسّمو، ينطق شويا أجزاء تاع سمو مثلاً : "بيكا بي؟" لي يقولها كي ما يفهمش حاجا.

على حساب لمعلومات لي موجودين فل پوكيدكس لي هو لقاموس لخيالي لي فيه جميع لمعلومات على لي پوكومون، ننجمو نعرفو بلي بيكاتشو پوكيمون يحب يتغذى غير بل فاكيا[3] و يحب ثانيك يعيش في دي قروپ لي فيهم عايلتو فل غابات.[3][4] هو بوكيمون يظّل يعس فل أراضي تاوعو و باش يشوف مليح يوقف على كعالتو.[5] هو پوكيمون تاع تريسيتس عندو وحد الأكياس حمرين في خدودو لي يساعدوه باش يخزّن تريسيتي في جسمو باش ينجم يستعملها كي يحتاجها. قادر يخرج كمية كبيرة مترسيتي من ذوك لكياس و قادرا تكون واعرة كيما لعضلم [6] و يستخدمها باش يدافع على نفسو[7] يطري لفاكيا لي ماهيش طريا ولا مازالت ما طابتش مليح[3] ولا قادر فان يستخدمها باش يشارجي ترسيتس تاع بيكاتشو وحداخر لي كملتلو تريسياس تاعو[8] هو پوكيمون يبغي يقرعج و يوّقب بزاف و قادر يضرب بتريسيتي أي حاجة جديدة بالنسبة ليه و خَوّفاتو ولا ماهوش داير فيها كونفيونس.[9] خدودو يبداو يخرخشو كي يكون منارفي ولا كي يكون حاس بخطر[10] ولا كي مايكونش فاطن مليح لاخاطرش هو يعمر تريسيتي كي يكون راقد[11] كل مايكون كاين إعصار يتلامو لبيكاتشووات فوق الشجرّ لاخاطرش ينجمو يآتيرو تريسيتي ولعضّلم بكعايلهم[5] و كي يكونو جماعة كبيرة متلامين في بلاصة وحدة قادر على جالهم يصرى إعصار.[2]

بيكاتشو قابض لمرتبة 25 فل پوكيدكس و خرج فل جينيراسيون لولا تاع پوكيمون مع التطور تاعو: رايتشو ، هو التطور تاع پيتشو لي هو بيبي پوكيمون لي خرج فل جينيراسيون زاوجا. كي بيكاتشو يتوشي حجرة تاع تريسيتي يرجع [رايتشو] لي يشبه لخلوطا بين فار رُنجي و كونغورو. كاين زوج أنواع تاع راتشو، أي بيكاتشو لي قبضوه في لي ريجيون تاع كونتو ولا في جوتو ولا في هووَان ولا في سينوه ولا في أوليس ولا في كالوس أي فلي جينيراسيون ستا (6) لوالاَ يتطور إلى رايتشو عادي لي نصنع فل جينيراسيون لولة بصح إلا لبيكاتشو نقبض في جزر تاع آلولا أي فل جينيراسيون السابعة(7) يتطوَّر إلى آلولّن رايتشو لي يقولو فان "رايتشو دْآلولا ولا رايتشو تاع آلولا. بصح فالعبة تاع [پوكيمون جون لي مخدومة على حساب لمسلسل تاع پوكيمون، بيكاتشو مايبغيش يتطور يبغي يبقى بيكاتشو.

المراجع[edit | edit source]

References[edit | edit source]

  1. بوكيديكس تاع بوكيمون حمر و زرق، ڤام فريك، نينتاندو، 8 اكتوبر 1998، ڤام بوي
  2. 2.0 2.1 Cite error: Invalid <ref> tag; no text was provided for refs named DexRB
  3. 3.0 3.1 3.2 Pokédex de Pokémon Or, Game Freak, Nintendo, 6 avril 2001, Game Boy.
  4. Pokédex de Pokémon Diamant, Game Freak, Nintendo, 22 avril 2007, Nintendo DS.
  5. 5.0 5.1 Pokédex de Pokémon Argent, Game Freak, Nintendo, 6 avril 2001, Game Boy.
  6. Pokédex de Pokémon Émeraude, Game Freak, Nintendo, 21 octobre 2005, Game Boy Advance.
  7. Pokédex de Pokémon Rouge Feu, Game Freak, Nintendo, 9 septembre 2004, Game Boy Advance.
  8. Pokédex de Pokémon Platine, Game Freak, Nintendo, 22 mars 2009, Nintendo DS.
  9. Pokédex de Pokémon Rubis, Game Freak, Nintendo, 25 juillet 2003, Game Boy Advance.
  10. Pokédex de Pokémon Perle, Game Freak, Nintendo, 22 avril 2007, Nintendo DS
  11. Pokédex de Pokémon Saphir, Game Freak, Nintendo, 25 juillet 2003, Game Boy Advance.