Wp/arq/أرسطو
أرسطو (Ἀριστοτέλης باليونانية ; 322-384 ق.م ) فيلسوف يوناني تع الحضارة اليونانية القديمة الكلاسيكية. قرا عند أفلاطون.
كان متخصص ثاني في عدة علوم أخرى، من بينها: الكيميا،التاريخ،المنطق،المسرح،الشعر،الفيزيا، علم الحيوانات, البيولوجية و السياسة.
معروف عليه انو هو الأول اللي حط علم المنطق و ثاني هو اللي بدا يعطي تعريف و اسماوات تاع العلوم و بين العلاقة اللي كاينة بيناتهم. يعني هو اللي سمى الفيزيا فيزيا و السياسة سياسة....
الفلسفة تاعوا أثرت في الفكر تاع اوروبا و العالم كامل، و مازال أفكارو و الشي اللي كتب و قال في الامور تاع الفلسفةو العلوم يتقرا و يتناقش الى يومنا هاذا.
حياتو ماشي معروف عليها بزاف. أريسطو تزاد في مدينة اسمها سطاڤيرا،في الغرب تاع اليونان.مات باباه(نيكوماكوس) و هو كان مازال صغير.كي وصل في عمرو سبعطاعش ولى ثمنطاعش سنة مشى للمدرسة تاع أفلاطون في أثينا باش يقرا ثمة، و بقى فيها حتى وصل في عمرو سبعة و ثلاثين سنة(347 ق.م).
بعد ما مات الشيخ تاعو أفلاطون طلب منو الملك تاع مقدونيا فيليب الثاني باش يجي يعلم ولدو ألكسندر العظيم و يقريه كيما كانت العادة تاع الملوك في هاذاك الوقت.
أرسطو كتب بزاف كتابات و حوارات على حوايج بزاف، بصح قليل اللي وصلنا منها، على خاطر هو في الأصل ما كانش ناوي ينشرها.
الفسلفة و الفكر تاعو أثرو في الفكر الإسلامي في القرون الوسطى و ثاني في الفقه المسيحي. العولاما و المفكرين تاع الإسلام كانو يسموه "المعلم الأول".