Jump to content

Wp/apc/محافظة السويداء

From Wikimedia Incubator
< Wp | apc
Wp > apc > محافظة السويداء
محافظة السويداء
محافظة سورية
الاسم بالإنجليزي
Suwayda Governorate
الموقع
التقسيم الإداريسوريا
العاصمةدولة الباشان
الإدارية
الدولةسوريا
الحكومة والسياسات
منطقة زمنيةت ع م+02:00
منطقة زمنيةت ع م+02:00، ت ع م+03:00

محافظة السويداء (السويدا) وحدة من المحافظات السورية، موقعها بجنوب شرق دمشق، بيحدها من الشمال محافظة ريف دمشق، و من الغرب محافظة درعا، و من الشرق البادية السورية و الصفا، و من الجنوب الأردن.

مساحتها حوالي 6550 كم²، و بيمتد طولها من الشمال للجنوب 120 كم، و عرضها من الشرق للغرب 66 كم.

السكان

[edit | edit source]

عدد سكانها حوالي 370 ألف نسمة (حسب تعداد 2011). و هي المحافظة الوحيدة بسوريا اللي أغلب سكانها دروز، و فيها كمان أقلية كبيرة من أتباع الكنيسة الأرثوذكسية الشرقية، و مجتمع صغير من اللاجئين المسلمين اللي جايين من محافظة درعا بشكل أساسي، بالإضافة لأجزاء تانية من سوريا. و حسب تعداد سنة 1980، الدروز كانوا بيشكلو 87.6٪ من السكان، و المسيحيين (معظمون من الروم الأرثوذكس) كانوا 11٪، أما المسلمين السنة فكانو 2٪. أغلب السكان عايشين بالأجزاء الغربية من المحافظة، و بالأخص على المنحدرات الغربية لجبل الدروز، بينما القبائل البدوية بتعيش بالمناطق القاحلة بحرّة الشمّة.

المناخ

[edit | edit source]

مناخ المحافظة معتدل جبلي، بارد بالشتا، و بتتساقط فيه التلوج لدرجة إنها ببعض المناطق بتوصل لارتفاعات كبيرة و بتغطي المدن و البلدات، أما بالصيف فالمناخ معتدل و منعش. معدل الأمطار السنوي فيها بيتراوح بين 350 مم و 1000 مم بالمناطق الجبلية. صخور المحافظة بركانية و تربتها رسوبية. مدينة السويداء بترتفع عن سطح البحر 1100 م، و شهبا 1050 م، أما صلخد فبترتفع لـ 1350 م، و أعلى نقطة بالمحافظة بترتفع لـ 1809 م و هي تل قينة أو الجينة.

المواقع السياحية

[edit | edit source]
  • مدينة السويداء: مدينة بنمط راقي و متطور، فيها أسواق تجارية و مطاعم، و ما لازم ننسى زيارة متحف السويداء.
  • مدينة شهبا: فيها المسرح الروماني، البوابات و أقواس النصر، متحف شهبا اللي بيضم آثار مميزة.
  • بلدة قنوات: بتضم المعابد، الكنيسة البيزنطية، معبد الشمس، و كتير من الآثار، بالإضافة للجبال المكسوة بالخضرة و الغابات الطبيعية.
  • بلدة المجدل: فيها أهم لوحات الفسيفساء الرائعة، معابد رومانية، قصور، و غابات.
  • أحراج و غابات الكفر: موجودة بالقرب من بلدة الكفر، و فيها غابات طبيعية خلابة.
  • منطقة ظهر الجبل: فيها أعلى القمم الجبلية بالمحافظة، و بتشتهر بكروم العنب بالسويدا، و بساتين التفاح و أشجار الفاكهة، و الينابيع، بالإضافة لوجود بحيرة سد الروم اللي بتحيط فيها الجبال.
  • منطقة سد العين: فيها بحيرة، و أحراج، و غابات صناعية.
  • نبع و مغارة عريقة: موجودين ببلدة عريقة، و هني نبع و مغارة طبيعية أثرية، و قريب منهم في استراحة و مطعم بمستوى جيد.
  • قرية بريكة: فيها تل الدبة، و معبد يوناني.
  • قرية سليم و بلدة عتيل: فيها معابد يونانية و رومانية، مسلة، و آثار متنوعة.
  • بلدة القريا: بلد قائد الثورة السورية الكبرى سلطان باشا الأطرش، و فيها النصب التذكاري الخاص فيه.
  • قرية عرى: فيها منزل أمير الجبل، و منزل السيدة أسمهان الأطرش، و هاد البيت معروف باسم دار الإمارة أو دار عرى.
  • قلعة صلخد: قلعة مهيبة بتتوسط مدينة صلخد.
  • معبد المشنف: موجود ببلدة المشنف الأثرية.
  • قرية تعلا: واقعة بأقصى الشمال الشرقي للجبل، و فيها قصر بيعود للعهد النبطي، و أشجار تين معمرة بيقدر عمرها بـ 300 سنة و أكتر، بس ضل منها عدد قليل و نادر، بالإضافة للكهوف و المغاور الطبيعية اللي بتمتد لعشرات الأمتار جوات الأرض، و كانت تستخدم كملاجئ طبيعية بزمن الاحتلال الفرنسي.
  • الغارية: بتبعد عن مركز المدينة 40 كيلومتر جنوباً، و هي من المناطق السياحية الجميلة، و معروفة بمحبة الأهالي و جمال الطبيعة.

مصادر

[edit | edit source]

روابط برانيه

[edit | edit source]
Suwayda Governorate
على مواقع التواصل الاجتماعي
Suwayda Governorate على فيسبوك
محافظة السويداء
على المشاريع الشقيقة

Retrieved from "https://incubator.wikimedia.org/w/index.php?title=Wp/apc/محافظة_السويداء&oldid=6553949"