Wp/apc/صباح

صباح
مغنية وممثلة لبنانية - مصرية
الاسم بالإنجليزي Sabah
معلومات شخصية
مكان الميلاد	بدادون
الجنس	أنثى
مكان الوفاة	بيروت
مكان الدفن	كاتدرائية مار جرجس المارونية
الجنسية	لبنان، مصر
الحياة العملية
عمل بارز	الرجل التاني، الحب كده، الأيدي الناعمة، باريس والحب
الشغل	مغني، ممثل
العيلة
الطفل	هويدا منسي
الزوج/الزوجة	أحمد فراج
الاسم الأول	جانيت
اللغات
اللغات اللي بيحكيها	اللهجة الشامية
اللغة الأم	اللهجة الشامية

جانيت جرجس فغالي (10 تشرين التاني 1927 - 26 تشرين التاني 2014) مغنية و ممثلة لبنانية انشهرت فنياً باسم صباح، و بتعتبر وحدة من أهم الفنانين اللبنانيين جنب فيروز و وديع الصافي، امتدت حياتها الفنية من نص أربعينات القرن الماضي لحد الألفين، و تركت وراها إرث فني كبير بالتلفزيون و السينما و المسرح خلّدها بالمجال الفني على مر التاريخ. انشهرت بألقاب كتير منها «الشحرورة» و «الصبوحة» و «صوت لبنان». كانت من أوائل المغنيين العرب اللي وقفوا على خشبات المسرح العالمي بأولمبيا بباريس، و قاعة كارنيغي بمدينة نيويورك، و قاعة ألبرت الملكية بلندن و دار أوبرا سيدني.

حياتها

إنولدت يوم 10 تشرين التاني 1927، بعيلة متواضعة، و إتربت البنت الصغيرة «جانيت» بوادي شحرور، وحدة من القرى اللبنانية من قرى قضاء بعبدا بمحافظة جبل لبنان. بدايتها الفنية كانت و هي صغيرة بلبنان، و قدرت تتميز بشهرتها المحلية، لحتى لفتت انتباه المنتجة السينمائية اللبنانية الأصل آسيا داغر اللي كانت عم تشتغل بالقاهرة، فطلبت من وكيلها بلبنان قيصر يونس يوقع معها عقد ل 3 أفلام دفعة وحدة، و كان الاتفاق إنها تاخد 150 جنيه مصري عالفيلم الأول و يزيد السعر شوي شوي. راحت على أسيوط مع أبوها و أمها و نزلو ضيوف عند آسيا داغر ببيتها بالقاهرة، و كلّفو الملحن رياض السنباطي إنو يدربها فنياً و يحط الألحان اللي بدها تغنيها بالفيلم. و بهديك الفترة راح اسم «جانيت الشحرورة» و صار اسمها «صباح» بفيلم «القلب إله واحد» سنة 1945، و كان عمرها وقتها حوالي 18 سنة. و بينحكى إنه السنباطي واجه صعوبة كبيرة بتطويع صوتها و تعليمها أصول الغناء لأن صوتها الجبلي كان لسا متعود عالأغاني البلدية اللي بتتميز بالطابع الفولكلوري الخاص بلبنان و سوريا. و هي أخت الممثلة لمياء فغالي.

أعمالها

شاركت بالسينما المصرية، و إلها عدد كبير من الأفلام اللي تعتبر هي وحدة من نجماتها و وقفت قدام كبار السينما المصرية متل: صلاح ذو الفقار و رشدي أباظة و فريد شوقي، و إلها رصيد كبير من الأفلام المصرية المهمة متل: «الرجل التاني» (1959)، «الحب كده» (1961)، «الأيدي الناعمة» (1963)، «تلاتة نساء» (1968) و غيرها، و إلها كمان رصيد من الأفلام اللبنانية متل: «باريس و الحب» (1972)، و فوق هاد إلها عدد كبير من الأغاني. بتعتبر صباح من أهم رموز الفن العربي و دخلت موسوعة غينيس كأكبر إرث فني بالتاريخ.

إلها 87 فيلم بين مصري و لبناني، و 27 مسرحية لبنانية، و أكتر من 3500 أغنية بين مصري و لبناني و أجنبي.

بتعتبر صباح أول مين قدم الأغنية اللبنانية اللي بتمتاز بالريتم و الإيقاع اللبناني الصرف، اللي ما كان معروف من قبل، عن طريق أغنية «يا هويدا هويدلك» بأوايل الخمسينات.

كمان شاركت بكتير من المهرجانات متل: بعلبك، جبيل، بيت الدين. و من المسرحيات اللي قدمتها:

• موسم العز، من أعمال الرحابنة - بعلبك (1960).
• دواليب الهوا، من أعمال الرحابنة - بعلبك (1965).
• القلعة، من أعمال الرحابنة - بعلبك.
• الشلال، من أعمال الرحابنة.
• ست الكل، من أعمال زوجها الفنان وسيم طبارة (1973).
• حلوة كتير، من أعمال زوجها الفنان وسيم طبارة (1977).
• عصفور سطح.
• فينيقيا، من أعمال روميو لحود.
• شهر العسل، من أعمال زوجها الفنان وسيم طبارة.
• ست الكل.
• الأسطورة 1.
• كنز الأسطورة، و هي آخر مسرحياتها و كان جنبها بالمسرحية الفنان جوزف عازار و زوجها السابق فادي لبنان و الفكاهي كريم أبو شقرا و ورد الخال و الأمير الصغير.

و كان آخر أعمالها أغنية قد ما فيك انبسط بعمر، اللي ألفها الشاعر ميشال جحا و لحنها جوزيف جحا و انعملت سنة 2011.

الوفاة

إتوفت صباح فجر يوم الأربعا 26 تشرين التاني 2014 بمقر إقامتها بعمر حوالي 87 سنة. و بتعتبر جنازتها من أغرب الجنازات بالعالم لإنها وصّت قبل ما تموت إنو ما حدا يزعل عليها و بدها تنشيّع على أنغامها، و هاد الشي اللي تم تنفيذو من الشعب اللبناني و أهلها، لدرجة إنو جنازتها كانت مليانة بأغانيها و الرقصات الشعبية.

روابط برانيه

• صباح على مُعرِّف قاعدة البيانات الحُرَّة (Freebase)
• صباح على مُعرِّف شخص في قاعدة بيانات "كُّل الأفلام" (AllMovie)
• صباح على مُعرِّف كينوبويسك (Kinopoisk)
• صباح على معرف مؤدي في شبكة الموسيقى
• صباح على مُعرِّف "جوجل دُودِل" (Doodle)
• صباح على معرف فنان في شازام
• صباح على مُعرِّف فَنَّان في قاعدة بيانات "ديسكوغس" (Discogs)
• صباح على مُعرِّف فنَّان في موسوعة "ميوزيك برينز" (MusicBrainz)
• صباح على مُعرِّف ترجمات كلمات الأغاني (LyricsTranslate)

صباح على مواقع التواصل الاجتماعي

صباح على المشاريع الشقيقة

صور و ملفات صوتية من كومنز على كومنز