Wp/apc/صافيتا

صافيتا
مدينة مسيحية تقع شمال شرق طرطوس على ارتفاع 380م من سطح البحر.
الاسم بالإنجليزي Safita
الموقع
التقسيم الإداري	ناحية مركز صافيتا
الإدارية
الدولة	سوريا
الحكومة والسياسات
رمز الهاتف	041

صافيتا (بالفينيقية: 𐤎‬𐤐𐤕‬𐤄) هي مدينة بمحافظة طرطوس بغرب سوريا، بتقع شرق طرطوس و شمال غرب قلعة الحصن. بتمتد ع تلات تلال و الوديان اللي بينها ضمن سلسلة الجبال الساحلية. كان عدد سكانها حسب احصاء 2004 حوالي 20,301 نسمة، و اغلبهن من الروم الأرثوذكس و العلويين.

التاريخ

الفينيقيين

في دلائل إنو صافيتا موجودة بموقع كان من قبل فيه مستوطنة فينيقية. تل الكزل القريبة فيها بقايا فينيقية، بيقولوا إنها مدينة صمور المذكورة برسائل تل العمارنة.

الصليبيين

اشتهرت بالقلعة اللي بناها فرسان الهيكل، و تسمّت بـ"شاستيل بلانك" (Chastel Blanc) اللي بينقال عنّو برج صافيتا. كانت القلعة نقطة مراقبة استراتيجية ضمن شبكة من الحصون بتطلّ ع الساحل (جزيرة أرواد و طرطوس) و باتجاه قلعة الحصن جنوب شرق. بسنة 1271، استولى السلطان المملوكي بيبرس ع المنطقة و رجعت للحكم الإسلامي.

العثمانيين

خلال الحكم العثماني، كانت صافيتا مركز ناحية رئيسية بمنطقة الجبال الساحلية الجنوبية، شاملة حوالي خمسين قرية، و أحياناً تابع إلها نواحي متل ميار و قليعة و طرطوس. سكان الناحية كانوا مسيحيين و علويين، و العلويين كانوا حوالي 3/5 من السكان. عيلة السيفي حكموها لحد سنة 1640 تقريباً، وكانوا يستخدموا حصن صافيتا بحروبهم ضد المَعنيين بلبنان. بسنة 1621، والي إيالة طرابلس يوسف السيفا بعت حملة ضد ابن أخوه سليمان السيفا اللي كان متحالف مع فخر الدين التاني، لأنو ما دفع ضرايب الناحية. بعدين ما عاد ينعرف كتير عن صافيتا، بس سجلات بطرابلس بـ1666–1667 بتورجي إنو عائلة شمسين (أو آل شِبلي) أخدوا التزام ضرايب ناحية صافيتا، و كانوا مسؤولين عن جمع ضريبة الأشجار و الزراعة و الصقور و النحل و الحرير و الطواحين و الجاموس و المواسم. عيلة شمسين سيطرت ع المنطقة لحد نص القرن الـ19.

الانتداب الفرنسي

قبل بداية القرن العشرين، كانت صافيتا أكبر مدينة بمنطقة الجبال الساحلية من حيث السكان و النفوذ الإداري، بس بلشت تتراجع أيام الانتداب الفرنسي (1923–1946) لما أخدت طرطوس أهميّة أكبر و صارت مركز اللواء، فوقتها نفوذ صافيتا ضعف. سنة 1933، كان عدد سكانها حوالي 2,715 مسيحي و280 علوي. بـ1943، زاد عددهم لـ3,500 أغلبهم أرثوذكس. كانت البيوت بتتميز بحجارة سود و بيض متداخلة و ملتفة حول القلعة الصليبية.

بعد الاستقلال

استقلت سوريا بالـ1946. بـ1960، صار تعداد صافيتا حوالي 6,200 نسمة (4,300 مسيحي و1,900 علوي). لما صارت طرطوس محافظة سنة 1967، تعزّزت تبعية صافيتا إلها، خصوصي مع تطوّر مرفأ طرطوس و الزراعة بالسهل الساحلي. انقسمت منطقة صافيتا جزئياً بسنة 1967–1970 لصالح منطقة الدريكيش، و نضمت ناحية صفصافة لمنطقة طرطوس. بآخر التسعينات، كتير من سكان صافيتا كانوا بيشتغلوا بطرطوس، و صارت صافيتا بشكل عملي متل ضاحية لإلها، بس بنفس الوقت كان عندها علاقات تجارية واسعة بسوريا و لبنان. بعدها ضلّت مركز اقتصادي للريف حواليها، و ناس كتير من القرى التانية بتفتح محلات فيها، و بيلاقوا خدمات فيها متل الطب و القانون و الهندسة. صار تغيّر ديموغرافي مع انخفاض ولادات المسيحيين و زيادة هجرة العلويين من الريف عالمدينة. حسب ملاحظات باحثين، البلدة القديمة ضلّت أغلبها مسيحية، بس بالمدينة ككل صار في أغلبية بسيطة علوية. ما في توترات طائفية بين الطرفين، لأنو عندهم نمط حياة متشابه، بالإضافة لاتصالات اقتصادية و سياسية (بسبب ارتباط العلويين بقطاعات الجيش و الدولة). بالخمسينات كانوا الحزبين الأقوى هنن البعث و الحزب الشيوعي. بالتسعينات، عملت الدولة فندق فخم (ضمن سلسلة فنادق الشام) و حسّنت الطرق لطرطوس و حمص. ضمّت حواليها ست قرى مجاورة لبلدية صافيتا، فصارت المدينة تاخد ميزانية أكبر من الدولة. عملوا مشاريع كتيرة متل المحافظة ع البلد القديمة و بناء طريق دائري و توسيع شبكات المجاري و معالجة المياه.

جغرافيا

صافيتا موجودة بآخر الجزء الجنوبي الشرقي من سلسلة الجبال الساحلية السورية. بتبعد تقريباً 26 كيلو جنوب شرق مدينة طرطوس الساحلية، و حوالي 55 كيلو شمال-غرب حمص. ارتفاعها الوسطي حوالي 400 متر عن سطح البحر، بينما القلعة الصليبية بتوصل لـ 720 متر. الهضبة اللي واقفة عليها القلعة عطتها ميزة تشرف فيها ع المنطقة حواليها، و بتطل ع قلعة المرقب بالشمال، و قلعة الحصن بالشرق، و طرابلس بالجنوب، فكانت متل نقطة وصل بين هالقلاع بالعصور الوسطى. المدينة قاعدة على مفترق طرق بيوصل طريق طرطوس-حمص (شرق-غرب) مع طريق صافيتا-دريكيش (شمال-جنوب). سبب هالموقع إنو تضاريس صافيتا مو وعرة بشكل كبير، يعني الانحدار ما بيتجاوز 400 متر، و كمان الوديان شمالها و جنوبها ما بتنقطع بتيارات مائية. طريق صافيتا-دريكيش هو تقريباً الوصلة الوحيدة بشمال-جنوب الجبال اللي بيشتغل عليها نقل عام باستمرار.

المناخ

جو صافيتا متوسّطي بصيف حار (تصنيف كوبن Csa)، صيف حار وجاف، و شتا معتدل ممطر. المنطقة هي من أكتر المناطق الممطرة بسوريا، بسبب تأثير الجبال على الرياح الرطبة من البحر المتوسط. بالأرقام، بتنزل فيها حوالي 1200 ملم مطر بالسنة، يعني أكتر بحوالي عشرة أضعاف من دمشق، و أربعة أضعاف تقريباً من حلب.

روابط برانيه

• صافيتا على مُعرِّف قاعدة البيانات الحرة (Freebase)
• صافيتا على مُعرِّف الروَّاد (WOFID)
• صافيتا على مُعرِّف موضوع في موقع كيورا
• صافيتا على مُعرِّف لكس في ييل
• صافيتا على معرف مدينة في خريطة الطقس المفتوحة
• صافيتا على مُعرِّف سنارك (SNARC)
• صافيتا على معرف ميزة GNS
• صافيتا على معرف أين على الأرض
• صافيتا على مُعرِّف الأسماء الأرضية (GeoNames)

Safita على مواقع التواصل الاجتماعي

Safita على كورا

صافيتا على المشاريع الشقيقة

صور و ملفات صوتية من كومنز على كومنز