Wp/apc/رأس العين (الحسكة)

رأس العين
مدينة سورية في محافظة الحسكة
الاسم بالإنجليزي Ras al-Ayn
الموقع
التقسيم الإداري	ناحية مركز رأس العين
الإدارية
الدولة	سوريا
التاريخية
حدث هام	معركة رأس العين الأولى، معركة رأس العين الثانية
الحكومة والسياسات
منطقة زمنية	ت ع م+02:00
منطقة زمنية	ت ع م+02:00، ت ع م+03:00

راس العين (بالكردي: سەرێ کانیێ،Serê Kaniyê؛ بالسرياني: ܪܝܫ ܥܝܢܐ، ريش عينا) مدينة بمحافظة الحسكة شمال شرق سوريا، عالحدود مع تركيا. هي من أقدم المدن بالجزيرة الفراتية، سكنوها البشر من العصر الحجري الحديث (حوالي 8000 قبل الميلاد). المدينة مرّت عبر تاريخها بأسماء كتيرة، منها سيكاني بالأرامية، و رسينا بالرومانية، وثيودوسيوپوليس بالعهد البيزنطي، و تعرضت أكتر من مرة للتدمير و إعادة الإعمار. ب 1921، و بعد "اتفاقية أنقرة"، انقسمت المدينة، الجزء الشمالي صار بتركيا وهو اليوم بالتركي اسمه Ceylanpınar جيلان بينار، و بيعني راس العين كمان، و الجزء الجنوبي ضلّ بسوريا. عدد سكان المدينة كان 29347 حسب تعداد 2004، و تعتبر تالت أكبر مدينة بمحافظة الحسكة ومركز منطقة رأس العين. خلال الحرب الأهلية السورية، تقاتلت عليها فصائل معارضة و وحدات حماية الشعب (YPG) من تشرين التاني 2012 لحد ما سيطر عليها الـYPG بشهر تموز 2013. بس بـ 2019، أخدها الجيش التركي و"الجيش الوطني السوري" ضمن هجوم تركي بشمال شرق سوريا.

التسمية

أقدم ذكر للمدينة بالعصر الآشوري بالأكدية باسم "ريش عينا" بزمن الملك الآشوري أداد نيراري التاني (911-891 قبل الميلاد). الاسم العربي "رأس العين" بيترجم الاسم الأكدية بنفس المعنى: "رأس النبع" أو "تل النبع". المؤرخ و الجغرافي الإغريقي بطليموس سمّاها "رايسينا" (Raisena)، و بالعهد الروماني صار اسمها "رِسّاينا" أو "رِساينا". كمان انعرفت بـ "تيودوسيوپوليس" نسبةً للإمبراطور تيودوسيوس الأول اللي كبرها بالـ 380م. بالمصادر العربية الإسلامية الوسيطة، كان اسمها "رأس العين" أو أحياناً "عين وردة". بالأدبيات الإنكليزية بـالقرن الـ19، انذكرت باسم "راس عين" أو "عين وردة" أو "راس العين". الإسم الكردي "سەرێ کانیێ" بيعني كمان "رأس النبع"، عالأغلب ترجمة حديثة لإسمها السامي القديم.

الجغرافيا

رأس العين موجودة بحوض الخابور العلوي شمال منطقة الجزيرة السورية. الخابور، أكبر رافد للفرات، بيفوت من تركيا قريب من تل حلف، حوالي 4 كم جنوب غرب رأس العين. المجاري السطحية ببداية النبع غالباً بتنشف بالصيف، بس القسم الأكبر من مية الخابور بتجي من التدفق الجوفي لمي جوّا الأرض. الينابيع الكبيرة الكارستية اللي بمنطقة رأس العين هي المصدر الأساسي للمي الدائم بالخابور.

ينابيع رأس العين

في أكتر من 100 نبع طبيعي، أشهرهم "نبع الكبريت" يلي المي تبعه بتجي سخنة و فيها معادن مثل الكالسيوم و الليثيوم و الراديوم.

محطة علوك للمياه

محطة ضخ المي "علوك" قريبة من رأس العين و بتوزّع المي ع محافظة الحسكة، بس من وقت ما بلشت السيطرة التركية انقطعت المي كزا مرة. قبل هيك كانت بتغذي حوالي 460 ألف شخص بالحسكة و تل تمر و مخيم الهول، بس هالشي وقف من آذار 2020 بحسب مفوضية الأمم المتحدة لشؤون اللاجئين.

التاريخ

العصر الحجري و الأزمنة القديمة

منطقة رأس العين مسكونة من العصر الحجري الحديث (حوالي 8000 ق.م). المدينة الحالية بترجع أصولها لحدود 2000 ق.م، و صارت باسم "سيكاني" بالعصر الأرامي بزمن مملكة بيت بحياني. الموقع الأثري موجود بحافة تل الفخيرية جنوب المدينة الحالية. سنة 1979 لقوا هنيك "نقش تل الفخيرية" الشهير. كمان تل حلف القريب كان مدينة أرامية قديمة.

الحقبة الكلاسيكية

بعد هالفترة، صار اسمها "رِسينا" و "عين وردة" و "تيودوسيوپوليس". البيزنطيين أعطوها وضع مدينة، و الساسانيين دمروها مرتين بالقرن السادس (578 و580م)، و ردّو عمروها و بنوا فيها وحدة من تلات أكاديميات ساسانية.

العصور الوسطى

سنة 640، صارت تحت حكم المسلمين. البيزنطيين هاجموها 942، و الصليبي جوسلين الأول سيطر عليها فترة قصيرة بـ1129 و قتل كتير من سكانها العرب. بمرحلة ازدهارها، كان فيها أسقف سرياني غربي و أديرة كتيرة، و جامعين و كنيسة سريانية شرقية و مدارس و حمامات و بساتين. صارت موقع تنافس بين الزنكيين و الأيوبيين و الخوارزميين بالقرنين 12 و13، و بآخر القرن الـ14 هجمها تيمورلنك و دمّرها، فانتهى دورها كمدينة كبيرة بالجزيرة.

العهد العثماني

بالقرن 19، سكنها لاجئين شيشان جابوهن العثمانيين بعد حروب القوقاز. العثمانيين بنوا فيها ثكنات و حصن لألف جندي لحماية هاللاجئين. أثناء الإبادة الأرمنية بـ1915، كانت رأس العين واحدة من مراكز تجميع الأرمن، و الآلاف منّن اتقتّلوا بمعسكرات الإبادة حولين المدينة.

التاريخ الحديث

بعد سقوط الدولة العثمانية و اتفاقية أنقرة 1921، انقسمت رأس العين و صار الجزء الشمالي تحت سيادة تركيا باسم "جيلان بينار". صار خط السكة الحديدية هو الحد الفاصل. ضلّت ضمن الانتداب الفرنسي ع سوريا و لبنان، و بعد الاستقلال سنة 1946 بقيت ضمن الدولة السورية.

الحرب الأهلية السورية

ببداية الحرب، صارت مواجهات كبيرة برأس العين. معركة راس العين صارت بتلات مراحل بين 2012 و 2013. بنهاية تشرين التاني 2012، دخلت جبهة النصرة و الجيش الحر و طردوا قوات النظام، مع وجود للـYPG (وحدات حماية الشعب) بالمدينة. بفترة تمن شهور، الـYPG تحالفت مع فصيل من الجيش الحر ضد النصرة. بـ21 تموز 2013، قدر هالتحالف يطرد الجماعات الجهادية بعد ليلة قتال قوية.

بعدها ضلّت المدينة ضمن "روجافا" حوالي 6 سنين، لحد ما صارت العملية العسكرية التركية بالشمال السوري بتشرين الأول 2019 ("نبع السلام")، فهجم الجيش التركي و"الجيش الوطني السوري" عليها (المعروفة بمعركة رأس العين التانية). بعد 11 يوم حصار و قتال، انسحبت قوات سوريا الديمقراطية و وحدات حماية الشعب بناءً على اتفاق وقف إطلاق النار.

التفجيرات

بـ10 كانون الأول 2020، انفجرت سيارة مفخخة عند حاجز تابع لـ "الجيش الوطني السوري" المدعوم من تركيا برأس العين. اختلفت التقارير بس أغلبها بتقول إنو قُتل أكتر من 10 أشخاص منهم جنديين أتراك. تركيا اتهمت الـYPG بالمسؤولية عن التفجير بحجة إنها تابعة لحزب العمال الكردستاني (PKK). ما حدا أعلن مسؤوليته بشكل رسمي. التفجيرات استمرت بشهر كانون التاني و شباط 2021 كمان.

السكان

حسب احصاء 2004 كان براس العين 29،347 نسمة و بالناحية التابعة الها كان في 121،536 نسمة بنفس الوقت. المدينة فيها اغلبية عربية، و فيها اقليات من الكرد و السريان و الاشوريين و التركمان و الأرمن و الشيشان قبل هجمة تركيا ع المنطقة. بينقال انو ما عاد بقي فيها اكراد و مسيحيين كتير لأنو صار الهن نزوح كبير. تركيا سكنت لاجئين سوريين عرب و تركمان من مناطق تانية بالمدينة.

روابط برانيه

• رأس العين على مُعرِّف قاعدة البيانات الحرة (Freebase)
• رأس العين على مُعرّف عقدة في خريطة الشارع المفتوحة (OSM)
• رأس العين على مُعرِّف سنارك (SNARC)
• رأس العين على مُعرِّف موقع "نوميسما" (Nomisma.org)

Ras al-Ayn على مواقع التواصل الاجتماعي

رأس العين على المشاريع الشقيقة

صور و ملفات صوتية من كومنز على كومنز