Wp/apc/جسر الشغور

جسر الشغور
مدينة في سوريا
الاسم بالإنجليزي Jisr ash-Shughur
الموقع
عاصمة لـ	منطقة جسر الشغور
التقسيم الإداري	ناحية مركز جسر الشغور، محافظة إدلب
الإدارية
الدولة	سوريا
التاريخية
حدث هام	عملية جسر الشغور يونيو 2011
الحكومة والسياسات
منطقة زمنية	ت ع م+02:00
منطقة زمنية	ت ع م+02:00، ت ع م+03:00

جسر الشغور هي مدينة بمحافظة إدلب بالشمال الغربي لسوريا، على ارتفاع حوالي 170 متر فوق سطح البحر ع نهر العاصي. كان عدد سكانها حوالي 44,322 سنة 2010، اغلبهن مسلمين سنة، و في أقلية مسيحية (شي 3 آلاف شخص) أغلبهن روم أرثوذكس. المدينة هي مقر للحزب الإسلامي التركستاني بسوريا.

التاريخ

جسر الشغور من زمان كانت محطة مهمة ع طرق التجارة، لأنها ع الطريق الرئيسي بين اللاذقية (تبعد عنها حوالي 75 كم) و حلب (حوالي 104 كم للشرق). هي موجودة بسهل الغاب الخصيب عطرف جبال الأنصارية، و فيها تاريخ سكني مستمر لأكتر من 10 آلاف سنة. المدينة القديمة “قرقور” كانت حوالي 7 كم بالجنوب، و بفترة العصر الهلنستي تأسست بهالمكان مدينة اسمها “سلوقية على بلوم” (Seleucia ad Belum)، و الرومان سموها “نياكوبا” و بنوا فيها جسر حجري ع نهر العاصي. بأيام الصليبيين، كان في قلعة شاستل روجيا شرقها، و كمان قلعتين “قلعة الشغور” و ”بكاس” بالشمال الغربي، استخدموهن للدفاع، لحد ما صلاح الدين سيطر عليهن سنة 1188. اليوم ما ضل من الآثار القديمة إلا أجزاء من الجسر الروماني اللي انضاف عليه تعديلات مملوكية بالقرن الـ15، و لساتو واحد من جسرين فوق النهر. جسر الشغور بشكل عام حديثة بالبنيان، بس لسا فيها كم مبنى من العصر العثماني، منهم خان بوسط البلدة القديمة انبنى حوالي 1660-1675، و ترمم بـ1826-1827. بأوروبا بالقرن الـ18 ذكروا البلدة بأسماء مختلفة متل شوج أو شغل. بالعهد العثماني، أحياناً كانت تتعرض لهجمات من عشاير كردية من منطقة صهيون. بالقرن الـ18، سيطر عليها الآغا الكردي محمد بن رستم و ولاده. بعد الحرب العالمية الأولى، صارت جسر الشغور موقع مقاومة ضد الفرنسيين. بكانون الأول 1920، القائد إبراهيم هنانو قدر يسيطر عليها بمساعدة جماعات كردية من صهيون و دعم كماليين من تركيا. جسر الشغور معروفة انو أغلبها سنة، و اهلها محافظين، و عندها تاريخ مع المعارضة ضد حكم البعث. صارت فيها مجزرة كبيرة سنة 1980 من قبل قوات الأمن السوري، و كانت بمثابة تمهيد لمجزرة حماة بعدين. يوم 9 آذار 1980، بالوقت اللي كانت فيه احتجاجات ضد الحكومة بكل البلد، هاجم أهل جسر الشغور مقر حزب البعث و حرقوه، و الشرطة ما قدروا يسيطروا و تركوا المدينة. كم شخص أخد سلاح من ثكنة الجيش. بنفس اليوم نزلت وحدات من القوات الخاصة بالمروحيات من حلب و سيطروا بعد ما ضربوا المدينة بصواريخ و مدافع، و دمّروا بيوت و محلّات و قتلوا و جرحوا العشرات، و اعتقلوا 200 شخص تقريباً. اليوم اللي بعده، محكمة عسكرية حكمت بإعدام أكتر من 100 من المعتقلين، و بشكل عام انقتل حوالي 150-200 شخص بساعات معدودة.

الحرب الأهلية السورية

بـ4 حزيران 2011، صارت مواجهات مسلحة بجسر الشغور، و كانت تقول الحكومة إنو مجموعات مسلحة قتلت 120 من قوات الأمن و سيطروا ع المدينة، و هرب كتير مدنيين للاذقية. ناشطين حكوا للبي بي سي إنو القصة مو واضحة و يمكن صار تمرد داخلي بالقوات نفسها. جيش النظام عمل حملة قمع و ضلّ بالمنطقة لحد 12 حزيران 2011. كانوا أهل المدينة تاركين بيوتهم و هاربين، قسم كبير راح ع تركيا، بينما حشد النظام قواتو برّا ليرجع يفوت. بين كانون الاول 2011 و كانون التاني 2012، سيطر الجيش الحر و صارت مركز مهم للمعارضة. بحزيران 2012 لسا كانت تحت سيطرة الجيش الحر، بس بأكتوبر 2012 نقلت الجزيرة إنو النظام رجع أخذها. مع هيك، بـ25 نيسان 2015، سيطر عليها تحالف فصائل سلفية، منهم جبهة النصرة و أحرار الشام و الحزب الإسلامي التركستاني، و صار الأخير قوي بالمدينة، و بينقال إنو 3500 مقاتل إيغور سكنوا فيها بعدين. بتموز 2017، كانت المدينة تحت سيطرة مشتركة بين هيئة تحرير الشام و الحزب التركستاني. الطيران السوري و الروسي رجع قصفها بايلول 2017.

المناخ

مناخ جسر الشغور متوسطي بصيف شوب و نشف (Csa حسب تصنيف كوبن) و شتا معتدل ماطر.

روابط برانيه

• جسر الشغور على تصنيف ديوي العشري (DDC)
• جسر الشغور على مُعرِّف الروَّاد (WOFID)
• جسر الشغور على مُعرّف عقدة في خريطة الشارع المفتوحة (OSM)
• جسر الشغور على مُعرِّف سنارك (SNARC)
• جسر الشغور على مُعرِّف الأسماء الأرضية (GeoNames)
• جسر الشغور على مُعرِّف فيسبوك
• جسر الشغور على معرف ميزة GNS
• جسر الشغور على مُعرِّف قاعدة البيانات الحرة (Freebase)

Jisr ash-Shughur على مواقع التواصل الاجتماعي

Jisr ash-Shughur على فيسبوك

جسر الشغور على المشاريع الشقيقة

صور و ملفات صوتية من كومنز على كومنز