Wp/apc/القامشلي
| مدينة في شمال شرق سورية | |
| الاسم بالإنجليزي Qamishli | |
 | |
| الموقع | |
| التقسيم الإداري | ناحية مركز القامشلي |
| الإدارية | |
| الدولة | سوريا |
| الموقع الرسمي | |
| الموقع الرسمي | http://www.kamishli.com |
| الحكومة والسياسات | |
| منطقة زمنية | ت ع م+02:00 |
| رمز الهاتف | 53 |
| منطقة زمنية | ت ع م+02:00 |
القامشلي (بالكردي:Qamişlo "قامشلو،" بالسرياني:ܒܝܬ ܙܠܝ̈ܢ "بيث زلين" او ܩܡܫܠܐ "قامشلو") مدينة بشمال شرق سوريا، ع الحدود مع تركيا جنب مدينة نصيبين. ادارياََ بتتبع لمحافظة الحسكة، و هي مركز منطقة و ناحية القامشلي. بيمر فيها نهر الجقجق. عدد سكانها كان حوالي 184,231 بحسب احصاء 2004، و بتعتبر تاسع أكبر مدينة بسوريا و تاني أكبر مدينة بمحافظة الحسكة بعد الحسكة نفسها. تاريخياً كانت أكترية سكانها من الأشوريين المسيحيين، بس حالياً صارت الاغلبية من الكرد، مع نسبة كبيرة من العرب و الأشوريين و عدد قليل من الأرمن. بتبعد حوالي 680 كم عن دمشق.لفترة كانت بتعتبر العاصمة للـ“الإدارة الذاتية لشمال وشرق سوريا” (مناطق قسد) قبل ما تنقل عاصمتها لعين عيسى.
التسمية
[edit | edit source]الاسم الأصلي للمدينة كان بالأرامية "بيث زلين" يعني "بيت القصب،" لأنو كتير في قصب حوالين نهر الجقجق. بالتركي "قامش" معناها "قصب" و اللاحقة "لي" بمعنى "المكان اللي فيه"، فصار اسمها قامشلي، او مكان القصب بالتركي. عند الأكراد، بدل ما يضيفو -لي بأخر الكلمة بيضيفو -لو، فصارت قامشلو بالكردي.
التاريخ
[edit | edit source]تأسيس المدينة
[edit | edit source]بترجع أصول المدينة للـ1920ات، وقت نزح أشوريين كتير من المجازر اللي صارت بحقهن أيام الدولة العثمانية، و اجو أسسوا بلدة صغيرة تحت حكم الانتداب الفرنسي، و سمّوها بالأول بيث زلين قبل ما تتسمى رسمياً قامشلي بسنة 1926، مع إنشاء محطة سكك حديدية. كتير من الأرمن و الأشوريين كمان لجؤوا لهنيك بالسنين اللي تبعت. بمرور الوقت، بدأ كمان أكراد ييجوا من تركيا و يستقروا بمناطق زراعية حوالي المدينة، و بعدين صاروا يفوتوا ع المدينة نفسها. بالستينات و السبعينات، كان الأشوريين لسا بيمثلوا حوالي تلتين السكان، بس سياسات حكومة البعث، و مصادرة الأراضي، خلّت كتير منهم يهاجروا.
القرن ال21
[edit | edit source]بـ2004 صار حادثة بقامشلي بعد مباراة طابة لما صار في هتافات مستفزة من جمهور الدير. صاروا يتقاتلوا الجماهير و انتشرت الفوضة لبراة الملعب. بعدين فات الامن و ارتكب مجزرة بحق بين ال20 و ال40 كردي. بـ2005، تظاهروا أكراد احتجاجاً على مقتل الشيخ محمد المعشوق الخزنوي، و كان في اصابات بوقتها. بـ2008، بالاحتفالات الكردية بعيد النيروز، فتح الأمن النار و قتلوا 3 أكراد (حسب هيومن رايتس ووتش).
الحرب الأهلية
[edit | edit source]مع اندلاع الثورة السورية سنة 2011، القامشلي أخدت دور سياسي مهم، و صارت شبه عاصمة للإدارة الكردية. جزء من المدينة و ضواحيها الجنوبية (فيها مطار قامشلي) ضل بإيد الحكومة البعثية، بس المدينة ما شهدت مواجهات كبيرة مثل مدن تانية، مع إنها اتعرضت لهجمات إرهابية بـ2015 و 2016 (من ضمنها داعش)، و كمان تصادمات بسيطة بين القوات الكردية و قوات النظام بسنين 2016 و 2018. فيها سجن "چركين" اللي فيو عناصر داعش. ب17 آب 2020، صار اشتباك بين الجيش السوري و قوات أميركية قريب عن قامشلي، و انقتل جندي سوري و انجرحو اتنين (حسب إعلام النظام). بسنة 2022، كان النظام بعدو مسيطر ع أجزاء بوسط المدينة و مناطق لجنوبها، بتضم المطار و بعض الدواير الرسمية، بس أكتر المدينة بإدارة الأكراد. بكانون الأول 2024، سَلّمت قوات النظام مناطقها بالمدينة للقوات الكردية من غير مواجهات كبيرة، و صارت المدينة بكاملها تحت سيطرة الإدارة الذاتية.
المناخ
[edit | edit source]مناخها متوسطي بصيف شوب (تصنيف كوبن Csa)، الصيف بيكون ناشف و شوب، و الشتا برد وممطر، أكتر المطر بيجي بشهر كانون التاني. عندها حوالي 53 يوم بينزل فيه مطر بالسنة.
السكان
[edit | edit source]سنة 1939، إحصائيات الانتداب الفرنسي بتقول إنو سكان مركز المدينة كانوا حوالي 8 آلاف عربي و6 آلاف كردي و14 ألف آشوري و3500 أرمني. هلق غالبية المدينة صاروا أكراد، بس في عدد كبير كمان من العرب و الأشوريين و الأرمن. من زمان كانت المدينة فيها غالبية مسيحية، بس بسبب الهجرات الريفية لداخلها صاروا الكرد هنن الاغلبية حالياً.
الدين
[edit | edit source]الاسلام
[edit | edit source]اكتر من 80% من سكان القامشلي من المسلمين السنة. اغلبهن اكراد و في عرب كتير كمان.
المسيحية
[edit | edit source]القامشلي بتعتبر مركز مسيحي مهم بسوريا، و لأغلب تاريخها كان فيها اغلبية مسيحية. بال1930ات كان عدد سكانها شي 23،000 و منهن 20،000 مسيحي. قبل الحرب كان حوالي 40 ألف مسيحي، نصهم من السريان الأرثودكس، و بحسب تقديرات 2014 نصهن هاجروا. من 2012 لما استلم الـPYD (حزب الاتحاد الديمقراطي) السلطة بالمدينة، صار في "تكريد" للحياة العامة حسب اتهامات بعض المسيحيين و العرب، و كتير من المسيحيين تركوا المدينة.
اليهود
[edit | edit source]كان بقامشلي مجتمع يهودي بارز اصلن من نصيبين، بس بعد 1947 لما بلش الصراع الصهيوني-الفلسطيني، بلشت الأمور تسوء، و هاجروا معظمهن. بعد حرب النكسة سنة 1967، ضل منهن أقل من 150 شخص، وهلق ما ضل منهن حدا.
مصادر
[edit | edit source]روابط برانيه
[edit | edit source]- القامشلي على مُعرِّف قاعدة البيانات الحرة (Freebase)
- القامشلي على رمز الأمم المتحدة للتجارة ومواقع النقل
- القامشلي على مُعرِّف الروَّاد (WOFID)
- القامشلي على مُعرِّف موسوعة بريتانيكا على الإنترنت (EBID)
- القامشلي على مُعرِّف لكس في ييل
- القامشلي على مُعرِّف سنارك (SNARC)
- القامشلي على مُعرِّف الأسماء الأرضية (GeoNames)
- القامشلي على معرف ميزة GNS
- القامشلي على مُعرِّف موسوعة ناشرو العلوم البولونيون (PWN)
- القامشلي على مُعرّف عقدة في خريطة الشارع المفتوحة (OSM)
مدن سوريا | ||
|---|---|---|
| محافظة السويداء | ||
| محافظة درعا | ||
| محافظة القنيطرة | ||
| محافظة دمشق و محافظة ريف دمشق | ||
| محافظة حمص | ||
| محافظة دير الزور | ||
| محافظة حماة | ||
| محافظة طرطوس | ||
| محافظة اللاذقية | ||
| محافظة الرقة | ||
| محافظة إدلب | ||
| محافظة حلب | ||
| محافظة الحسكة | ||
ضبط استنادي – Qamishli | |
|---|---|
| دوليه | |
| وطنيه | |
