Wp/ami/Pi’arawan to sorit: Mi’edaw

From Wikimedia Incubator
< Wp‎ | amiWp > ami > Pi’arawan to sorit: Mi’edaw

Pi’arawan to sorit: Mi’edaw (竹占)

Ano mangalay ko cima a tamdaw mafana’ to ca’of no kawas toya kafokilan nira a demak i, mi’edaw. O ’awol ko sapi’edaw.

I tiraay i Falangaw a Pangcah, ano malitemoh nangra ko lafades no ’orip i, caay ka eca mi’edaw, nika o samato’asay no loma’ ko midemakay. O likakawa tonini a demak i, ala han ningra ko tosaay laya’ no kamay ko karaya’ a ’awol, itira cipongoay i, o pisipasipan to remes no kolong. Ano mi’edaw i, telien ko po’ot i terong no ya ’awol, ta pasayra i awaayay ko pongo a misakohepic, ta telien haca ko kilang i tatihi noya ’awol, itiya sato, ripa’ han to wa’ay koya kilang, ta tengteng han to kamay koya ’awaol, nanikawanan tayra i kawili, nanikawili tayra i kawanan, satiyotiyolen a mitengteng ta malefot koya ’awaol. Ano o adadaay a tamdaw ko ’edawen i, patalafaleden ko ya kalefotan, i kawananay i, o sakitamdaw; i kawiliay i, o sakikawas. Ano mafedfed koya kawiliay i, o pahapinang to nipiliyas no kawas to tamdaw, o tata’akay ko adada noya tamdaw; ano mafelih, i kawananay ko mafedfeday i, o pahapinang o tamdaw ko miliyasay to kawas, o mamapatay koya tamdaw. Ano macacayat ko kawas ato tamdaw i, o pahapinang caay piliyas ko kawas toya tamdaw, o mamaadah koya tmadaw.

Orasaka, o pi’edaw haw i, o nikangalay no tamdaw to ca’of no kawas to samaanen ko piso’ayaw ano pakalitemoh to masamaamaanay a demak. Ano nga’ayay ko ’edaw i, o sakanga’ay no faloco’ a midemak; ano tatiihay ko ’edaw i, o sakafana’ a miliyas.

Pi’arawan to lakaw

  • 台灣原住民族歷史語言文化大辭典
  • 石磊,1976,〈馬蘭阿美族宗教信仰的變遷〉,《中央研究所民族學研究所集刊》47:97-127。
  • 李景崇,1998,《阿美族歷史》,臺北:師大書苑。
  • 達西烏拉彎‧畢馬,2001,《臺灣的原住民 : 阿美族》,臺北:臺原。
  • 原英子原著;黃淑芬、江惠英、林青妹編譯,2005,《台灣阿美族的宗教世界》,臺北,中研院民族所。
  • 臺灣總督府臨時臺灣舊慣調查會原著、中央研究院民族學研究所編譯,2007,《蕃族調查報告書[第一冊] 阿美族南勢蕃、阿美族馬蘭社、卑南族卑南社》。臺北:中央研究院民族學研究所。