Wp/ami/O kayki no niyaro

From Wikimedia Incubator
< Wp‎ | amiWp > ami > O kayki no niyaro

O kayki no niyaro (部落會議)

O tatyalen, malorikec no ’Amis kasa’etal i, saheto o tomok ato citodong no ciwlo ko mamireko. O ata’akay to a demak patayraen to i finawlan a masasowal. Lima polo’ to ko mihecaan no tamdaw no niyaro’ o mato’asay to ko sa’osi, o tayal to sakiomah pafelien to ko tamdaw no laloma’an, toladay sato itira sato i taloan mikapot to malotatayalen no sakifinawlan a demak. O tomok ato citodongay no ciwlo ko mamisa’icel mitayal to tayal no kapolongan(團體性的).

O cacitodong to ciwlo i , itira i selal no ciwlo mipili’ to malokakeridan, o citodongay to ciwlo i o mamitomadaw to tayal no tomok, mikapot to sakowan no niyaro’, oni a tayal tangasa i tolas no ’orip, ci safaw ko malotamdaw to laday, ano adihay to ko awaay ta miceroh to tamdaw, sa’osi caay pipatodong mitongal to tamdaw.

Tatosa anca tatolo lalima ano caciyaw masasowal han no Pangcah; deng no tamdaw aca ka saopo maco han; no malinaay kasaopo i masaopo han; no ’alomanay masaopo a malalicalicay i mitengil han, onini i malecad o kayki no niyaro’ koni tatodong nira.

Sakacecay potipot, Kayki no niyaro’ o tomok, citodongay no ciwlo ato fafaed to no kapah a tamdaw ko kasakapot, tatiih mikapot ko fafahiyan.

Sakatosa kalisaotan, Itini i taloan ko kasaopan ko kayki no niyaro, roma i pakatar sa i loma’ no tomok anca itira i loma’ no citodongay no ciwlo.

Sakatolo milesafon, Doedo sa to pinangan no finacadan, ’ayaw no dadaya kalic sa i fadahoc no sefi milekal pakafana to tamdaw no finawlan. Ano lalinike a demak, o papeloay, tarokos anca paratohay a selal tayra i loma’ pakafana’, nika no niyaro a kayki saheto tayra i tongroh no fadahong a milekal pakafana’.

Sakasepat faco no kayki, Awaay ko patosokan to faco no kayji, o pikaykian ko kacipinangan. No ’Amis a ’etal o Pokpok, Nataoran a niyaro’, pasitimol ko aro’ no tomok, pangkiw no taliyok ko aro’ no finawlan misi’ayaw. “ Pakaso’elin pasitimol ko pisin no tomok, nawhan nai timolay ko kawas no Pangcah Cimatitian, itiraay ko sofoc nira, orasaka mapatay to cingra pasayra i timol ko rakat no salo’afang”, ano misatapang to ko kayki pasayra i timol ko pising misi’ayaw to salo’afang “Tato’asan, o widang ” ko tomok, mitolon misalongoc paini to sakacitaneng ato fangcalay a lekakawa, mahrek to pakafana’ to malosasowasowalen no ’alomanay a demak, maherek to milongoc to paini no ’alomanay ta pakafana’ to no tireng a nisafaloco’an, mapaini to no cifenekay to masamaanay fangcalay painian, matongal ho no citodongay no ciwlo a maainini o fangcal to.

Sakalima paini to naherekan a mikayki a demak, o tata;akay a demak caayay to kafilo no tomok ato ciwlo patalahekalen maainini, caayay pali’ayaw mitelek to masamanay a demak.

Sakaenem kaciepoc no niketonan a mikayki, O miketonan to nikayki a demak tati’ih a maliyan midoedo to tatayalen, matoyol, mico’a’ang to rikec doedo sa tata’akay mimingay anca lahoday karetengay ko pi’arawan patefoc to mipa’oripan a pinanowan.

O nika ira ko lekakawa a kayki no niyaro’, orasaka, ano adihadihay ko dademaken no niyaro’ no Pangcah paemin patatodong to kahantala no tamdaw a mireko, sa ira ko sowal o noniyah to sakowan to niyaro’ koni.