Wp/ami/No rawang a harateng

From Wikimedia Incubator
< Wp‎ | amiWp > ami > No rawang a harateng

No rawang a harateng (空間觀)

Pakayni to fana’ no Pangcah to ngala’ no dawang a harateng, miriting to kasasiroma no fa’inayan fafahiyan ato harateng no finacadan to pitooran. Doedoen ko pikadkad no cifenekay a tamdaw, ira ko tosa a lekakawa ko kalacecayan no fafahiyan fa’inayan ato no rawang ko harateng no Pangcah.

Sakacecay a likakawa i, “ Minengneng to saselican misakilac, nika o saselic marariting to fa’inayan fafahiyan ko pi’araw”. O taliyok no laloma’ sepat ko moco’, ira ko patelian to salisinan, ka’amis ato katimol no fafahiyan kaselican, katimol kaetip no fa’inayan kaselican. Kiemel ko no fafahiyan to ka’amis ato kawali, no fa’inayan i o katimol ato kaetip ko kiemelay. Papotal no loma’ ira to ko matiniay ko sa’osi matateko to fa’inayan fafahiyan.

Sakatasa a likakawa i, “Midoedo to raay ato ngata to laed a matatapal ato rawang ko pisakilac, o maraay ko laed a rawang ato fa’inayan mararingi, mangataay ko laed a rawang matateko to fafahiyan ”. orasaka, o lotok, oriyar ato ’alo no fa’inayan a rawang, o loma’ i, no fafahiyan a miringi. Itini i laloma’ no niyaro’, malecad ira matatapal ko laed ato karariting to fa’inayan fafahiyan, no loma’ i no fafahiyan a rawang, potal i no fa’inayan a rawang. fa’inayan ato fafahiyan a rawang ira ko matatoedipay, ano caeca kalecad ko katadamaan.

Ano mirangi to harateng no pitooran i, hapinangen a minengneng ko matayalay no pitooran a tamdaw, mangaay to mahapinang no mita ko kawas no mitooray a salo’afang tona hekal, ira ko malecaday to no hekal a rawangan a harateng.

Nengnengen ko pinangan no cikawasay, citodongay to i ngatay ko laed no rawang, ira ko no ngasawan citodongay a fa’inayan to lisin, citodong to maraayay ko laed no rawang. Oni tatosa to sakacipinang, o pakafana’ to fa’inayan fafahiyan ato rawang to kararitiriting masamaanay ko kacipinang itini i ’orip no pitooran. O matiniay no rawang a harateng ato no pitooran a harateng pacamol han a mikadkad, ira ko hahratengen kalimelaan a mifana’ to serangawan no Pangcah.