Wp/ami/No ratoh a sowal to tato'asan no Siwkolan a Pangcah

From Wikimedia Incubator
< Wp‎ | amiWp > ami > No ratoh a sowal to tato'asan no Siwkolan a Pangcah

No ratoh a sowal to tato'asan no Siwkolan a Pangcah (秀姑巒阿美族祖先之傳說)

Itiyatiyaay ho, ira ko maaraa:yay a niyaro’, makera ko ngernger no pala, mato tata’ak ko soni, maperar to ko lotok macedas to ko ’alo, nengneng han ko kakarayan awaay to ma’araw ko cidal ato folad satoeman sato, nawhan mangela’ to ko sota nanilalinik mifowak masadak ko lali’, kalomanmaan i fafaeday no sota’ maemin to mahadefek nona tata’akay a lonen, itiya hatira ko kari’ang o tangic to ko iraay no tamdamdaw, icowacowaay a pala saheto to o lali’ ko sakapades to no tamdaw.

Ngalengalef sa mangernger ko sota, mafowak miteroc to ko lali’ malamangotaay to a nanom mahadefek to ko loma’ ato pina’rip. Nengneng han ko hekal maasariyar to ko lali’, ira ko citanengy a malekakaay safaloco’ sa a milaliw comikay talalotok milimek, misanga’ cangra to cecay a cifar, kalic toya cifar, toor sa to kasonol a mapawpaw, halapicahok hanira ko mapawpaway a felac, hafay malosakafecol. Ikor to maemin to i lalinik no nanom ko lotok, cacay aca ko cifar nangra mapawpaw tona riyar, o ka pawpaw to no tamdaw, pina’orip awa to ko cecacecay a ma’araw.

Matenes to mapawpaw iriyar, mipodpodan nangra malakaka a hafay awaay to, ngaay aca cakapina masahakakerem ko romi’ad, mapawpaw talacecay a kanatal cangra “Icowaay awa ko mafana’ay ” itiya talahekal cangra malakaka mafoti’ to cecay a daday, dafak caay to pitolas a misolap mikilim, ano ira ko tamdaw itini saan, nikaoriwa toni a kanatal awa ko cecacecay a tamdaw, mapatayni cangra to awaay ko tamdaw a kanatal. Wata ko semer nangra tatosa, nika maanen ko fana’, orasaka patireng sato cangra to loma’, paloma to hafay malosaka’orip.

Yo fangcal macidal ko romi’ad, I saetipan ma’araw nangra ko tata’akay a kanatal, sapilaliwan cangra toni awaay ko tamdaw a pala, lakec sa to riyar pasayra tora saetipan, nika matalaw ano milakec ano masamaan, lasawad sato koya faloco’ tosa katayraan tora kanatal. Cangra tatosa matalaw to ano mato’as sato to saka’orip, orasaka raramod sato, cirafas to moetep ko wawa nangra. Ikor to matocikay sanay ko mihecaan, adihay to ko teloc, malatato’asan to no Siwkolan a Pangcah konini.