Wp/aig/Orikien Daag (1950)

Disya aatikl eena Nawt Aanteegan.

Orikien Daag min de muos intens orikien eena de 1950 Atlantik orikien seezn. Bifuo de analaiz agen bai de Orikien Riesoch Divizhaan eena 2014, dem min konsida um wan a de trangis Atlantik orikien dem eena rekad, laik Katigri faiv pan de madan Safa-Simpsan skiel, wid win a 185 mail pa awa (298 km/h). Dis min de foat niem stam a de seezn, Daag staat develap pan 30 Aagast fu de ees a Aanteega; afta i paas chruu de nawt'n Lesa Antileez dem, i ton nawt an' staat get trang an trang agen an ton wan Katigri foa orikien. Daag get i peek intensiti wid win a 145 mail pa awa (230 km/h) pan de op'n Atlantik, an afta i weeken, i paas bai bout 200 mail (320 km) fram Kiep Kaad, Masachuusets. de stam ton extratrapikal pan 12 Septemba.

Orikien Daag du plenti plenti daamij fu de Leewaad Ailan dem, an min de muos seeveer orikien eva rekad eena Aanteega. Plenti bildin dem mash dong a get daamij bad bad pan de ailan, an towzan a peepl lef widout huum jos fuu week afta Orikien Beeka min aredi du plenti daamij de. Eena de Yunaitid Steit dem, de orikien du madarat daamij pan de kuost, an mash op plenti buot dem, an min kaaz 11 peepl jraan affshuo. de trang win dem min kaaz lait gaan chruu aal sout'ees'n Nyuu Inglan. Twelv peepl gaan mis'n an dem asyuum ded affshuo Nova Skoosha. Daamij aalong i paat towtal bout 3 milyan USD$.