Wp/aig/Anarkizum

 Disya aatikl eena un'nuon dialek.

De anarkizum simbawl

Anarkizum a wan palatikal bilif an muuvment weh waan mash dung all a dem institushan weh kip op powa, fose, ar haiyaki. Ee mostly target de staat an kaptalizum. Anarkizum push fu mash out de staat an build staatles sosayiti-dem wid smaddy-choos smaddy-free grup-dem.

Anarkizum come fram lef-wing taim, an people uuz tu kaal um de libatairan saide a soshalizum.

Even dough lickle bits a anarkis aidiya-dem bin dey long time, modarn anarkizum rise up outta de Inlaitnment. Een de second half a de 1800-dem an eenna de early 1900-dem, de anarkis muuvment blow up all over de worl, an tek big part een woka-dem faait fu free-up demself. Nuff diffrant kaind a tinkin come outta dat time. Anarkis bin tek part een nuff revolution—big one dem laik Paaris Komyun, Rashan Sivl Waw, an Spanyish Sivl Waw. Wen dem waw done, dat mark de en a de klassikal taim a anarkizum.

Eenna de las part a de 1900-dem an eenna nowaday 2000-dem, anarkis muuvment tek life bak again, grow bak een fame an powa eenna ting laik antikaptalist, anti-waw, an antiglobalizaashan muuvment-dem.

Anarkis uuz nuff diffrant way a action. Som a dem tek revoluushan way, an som tek evoluushan way. Plenty overlap dey een dem. De evoluushan way try show ow wan anarkis sosayiti wud wuk. Bot de revoluushan one—weh often tek vaylant turn—try mash dung powa an staat.

Plenty part a uman sivvalizaashan get shape up by anarkis tinkin, challenge, an ow dem tek action—praaksis, as dem call um.