Wn/skr/ہر سال دی طرح ایں سال وی چوٹی بالا وچ "یادگار کبڈی تے ثقافتی میلہ

23۔10۔2025ء ہر سال دی طرح ایں سال وی چوٹی بالا وچ "یادگار کبڈی تے ثقافتی میلہ

کالم نگار: اورنگزیب اورنگ بغلانی

ہر سال دی طرح ایں سال وی چوٹی بالا وچ "یادگار کبڈی تے ثقافتی میلہ" دا انعقاد اساݙی ثقافتی روایات کوں زندہ رکھݨ دا ہک عظیم ثبوت ہے۔ ایہ میلہ کھیڈ دے میدان توں وی اگے ہک ایسا سنگم ہے جتھاں اساݙی ریتاں، رسماں، محبت تے بھائی چارے دی مہک ہر پاسے پھیلی ہوئی ہے۔ کبڈی صرف ہک کھیڈ کائنی، ایہ تاں اساݙے وسیب دی غیرت تے جوانمردی دی داستان ہے۔ جیڑھے میدان وچ پہلواناں دے للکارݨ دی آوازاں گونجدیں ہن، او اساݙے آباؤ اجداد دی آوازاں ہن جو اساکوں اپݨی وراثت نال جوڑدیں ہن۔ تلی دے مقابلے، دوڑ دے جذبے، ثقافتی جھومر دے رنگ — ایہ سبھ اساݙی شناخت دے حصے ہن۔ ایں میلے دی خاص ڳالھ ایہ ہے جو ایہ نویں نسل کوں اساݙی جاہیں نال جوڑی رکھیے۔ جڈاں وی ہک ٻال کبڈی دے میدان کوں ݙیہدے، او اپݨے ڄڈاں دے شہسواراں دے کارنامے سݨدے، تاں اوں دے دل وچ وی ہک جذبہ جنم گھندے۔ ایہو جذبہ ہے جیڑھا اساݙی ثقافت کوں زندہ رکھسی۔ اساں ایں موقعے تے انہاں تمام محنت کش لوکیں کوں سلام پیش کریندے ہیں جنہاں دی لگن تے محبت نے ایں میلے کوں ممکن بݨایا۔ فرید ساجد لغاری، سر فاروق احمد بغلانی، رمضان پہلوان بغلانی، حقنواز باقی لغاری، بلال بغلانی، حمید لغاری،اورنگزیب اورنگ بغلانی، ڈاکٹر سعید ورعیہ — تے تمام اہل علاقہ جنہاں دے تعاون نال ایہ روایت تابندہ ہے۔ ایہ میلہ صرف چوٹی بالا دے لوکیں کیتے کائنی، بلکہ ڈیرہ غازی خان، راجن پور، جامپور تے کوٹ چھٹہ دے لوک وی ایں وچ شامل تھی تے ایں کوں چار چاند لا ݙیندے ہن۔ ایہا او یگانگت ہے جیڑھی اساݙی ثقافت دی پہچان ہے۔ اساں سبھ کوں چاہیدا جو 16 نومبر 2025 بروز اتوار کوں چوٹی بالا ضرور آؤں۔ آپݨی موجودگی نال ایں میلے کوں یادگار بݨاؤ۔ آؤں، مل تے اساݙی ثقافت دے ایں اہم تہوار کوں مناؤں۔ اساݙی مٹی، اساݙے وسیب نال محبت دا اظہار کروں۔ "وسیب دی خوشبو، تے لوگاں دا پیار — یادگار کبڈی تے ثقافتی میلہ، چوٹی بالا دا افتخار!" جیویں اساݙے بزرگ آہدے ہن: "جیڑھی قوم آپݨی ثقافت کوں بھل ویندی ہے، او آپݨی پہچان کھو ݙیندی ہے۔" ایں میلے دے ذریعے اساں نہ صرف آپݨی ثقافت کوں سنوارئیے پئے ہیں، بلکہ آنݨ والیاں نسلاں کیتے ورثہ وی چھوڑئیے پئے ہیں۔