Wn/skr/کوہ سلیمان فورٹ منرو : ڈولپمنٹ اتھارٹی دے بھتہ خوری دے چنگل وچ

ڈیرہ غازی خان دے خوبصورت کوہ سلیمان دے دامن وچ واقع فورٹ منرو سیاحتی مقام ہک فطری حسن دا حامل ہے جیندا مقامی معیشت کیتے وݙا کردار ہے۔ پر ہݨ ڈولپمنٹ اتھارٹی دے ناں تے ہک نویں قسم دا استحصال شروع تھی ڳیا ہے۔ آونڑ والے سیاحاں کنوں ہک قسم دا بھتہ وصولی دا ہک منظم سلسلہ شروع کر ݙتا ڳیا ہے جیندے وچ چیک پوسٹاں ٹیکسز دیاں لاونڑ نال سیاحت دے مستقبل کوں شدید خطرات لاحق تھی سگدے۔

صورت حال دا جائزہ:

1.بھتہ خوری دا نواں طریقہ: سیاحاں کوں روک روک کے اینجھے ٹیکسز گھدے ویسن جنہاں دا کوئی قانونی جواز کائنی۔

2.اداریہ بدعنوانی: ڈولپمنٹ اتھارٹی دے اہلکاراں دی ملی بھگت نال ایہ ظلم روا رکھیا ویندا پئے۔

3.سیاحت تے اثرات: ایں حرکتاں نال نہ صرف سیاح متاثر تھیندن بلکہ مقامی لوکاں دے روزگار تے وی منفی اثرات پوسی حل دے تجاویز:

1.فوری کارروائی: فورٹ منرو ایں بھتہ خوری دے خاتمے کیتے فوری طور تے چیک پوسٹاں ختم کرݨاں چاہیدے ۔

2.شفافیت: ڈولپمنٹ اتھارٹی کوں اپݨے کم کاج وچ شفافیت گھن آوݨی چاہیدی ہے تے کہیں وی غیر قانونی وصولی تے پابندی لڳاوݨی چاہیدی ہے۔

3.مقامی لوکاں دی شمولیت: سیاحتی ترقی دے منصوبیاں وچ مقامی لوکاں کوں شامل کرݨ نال ہی اصلاح ممکن ہے۔

آخری ڳالھ: کوہ سلیمان دے ایں حسین خطے کوں بدعنوانی دے دھبے کنوں پاک کرݨا ہر باشعور شہری دا فرض ہے۔ حکومتی سطح تے فوری اقدامات نہ کیتے ڳئے تاں ایہ علاقہ سیاحاں کیتے نفرت دا نشان بݨ ویسی ۔ اساݙی ثقافت، اساݙے وسائل تے اساݙے مستقبل دی حفاظت اساݙی ذمہ داری ہے۔

✍️کالم نگار اورنگزیب اورنگ بغلانی

تاریخ: 29 مارچ 2025ء