Wn/skr/چوٹی بالا منہ کھر بیماری دی وبا: لائیو سٹاک محکمہ دی خاموشی

چک حملڑی، چک روہڑی، چک ننگر، چک مغلو تے دامان علاقہ پچادھ چوٹی بالا دے دیہاتی علاقیاں وِچ "منہ کھر" بیماری دی وبا پھیل ڳئی ہے۔ ایں بیماری مویشیاں دے منہ تے پیراں تے حملہ کر تے اوں دے صحت تے معاشی حالت تے شدید اثرات مرتب کریندی پئی ہے ۔ ایں بیماری دے سبب مویشیاں دے منہ تے پیراں وِچ زخم تے چھالے پئے ڳئے ہن، جیندے نال اوں دا چارہ کھاوݨ تے چلݨ پھرݨ مشکل تھی ڳیا ہے۔ ایں توں علاوہ، دودھ دی پیداوار وِچ وی کمی آ ڳئی ہے، جیندے نال دیہاتیاں دی معاشی حالت تے وی منفی اثر تھیندا پئے۔ ایں صورت حال وِچ سوال ایہ پیدا تھیندے ہے کہ لائیو سٹاک محکمہ ایں مسئلے دے حل کیتے کیوں خاموش ہے؟ دیہاتی علاقیاں وِچ مویشیاں دی صحت تے معاشی حالت دا انحصار لائیو سٹاک محکمے دے اقدامات تے ہوندے۔ پر ایں ویلے محکمے دی غیر فعالی تے خاموشی ناقابل فہم ہے۔ "منہ کھر" بیماری دے پھیلاؤ کوں روکݨ کیتے فوری اقدامات دی ضرورت ہے۔ لائیو سٹاک محکمے کوں چاہیدا ہے کہ اوہ متاثرہ علاقیاں وِچ فوری طور تے طبی امداد پہنچاوے، مویشیاں کوں ویکسین دے ذریعے محفوظ کرے تے دیہاتیاں کوں ایں بیماری دے بارے وِچ آگاہی فراہم کرے۔ ایں دے نال نال، متاثرہ مویشیاں دے علاج کیتے طبی مہم چلاوݨ دی وی ضرورت ہے۔ دیہاتی علاقیاں وِچ مویشیاں دی صحت تے معاشی حالت دا تحفظ حکومت تے محکمیاں دی ذمہ داری ہے۔ لائیو سٹاک محکمے کوں چاہیدا ہے کہ اوہ ایں مسئلے تے فوری توجہ ݙے تے متاثرہ علاقیاں وِچ فوری اقدامات کرے۔ دیہاتیاں دی معاشی حالت کوں بہتر بݨاوݨ تے مویشیاں دی صحت دا تحفظ کرݨ حکومت دی اولین ترجیح ہووݨی چاہیدی ہے۔

کالم نگار: اورنگزیب اورنگ بغلانی تاریخ 19:03:2025ء