Jump to content

Wn/skr/نور شاہ تلائی ہک سیاسی تبصرہ

From Wikimedia Incubator
< Wn‎ | skr
Wn > skr > نور شاہ تلائی ہک سیاسی تبصرہ

شبیر علی قریشی دی ریکارڈنگ کال تے ورکر حضرات دیاں بیان بازیاں

&حال اے ہے جو وت ڳالھ کیڑھی کراں

ڳالھ اے ہے جو وت حال مکسی وی نہ

کافی ݙینہاں توں اپݨے وسیب کوں ݙکھی ݙیکھ دل ٻہوں ارمانی ہا۔ سوائے وسیب واسیاں دے غم دے ٻئی کوئی ڳالھ ناہی بھاندی ۔انہاں دے ݙکھ اچ سانجھ دے علاوے کوئی حرف لکھݨ تے روح ناہی تھیندا۔کیوں جو اے ݙکھ کجھ سال پہلے اساں خود ݙٹھا تے بھوڳیا ہا تہوں جان تے کنڈیر کجھ چوکھی ہئی۔میݙا وسیب (تھل)نور شاہ تلائی بھاڳل نہر کنوں پوادھ آلے پاسے جتھاں کہ محرومیاں دی جنم بھومی ازلی ہے اتھوں دے وسݨیک ہر اوں رفاہی سہولت توں قاصر ہن جیڑھی کہ ہک عوامی نمائندہ اپݨے علاقے کوں دان کریندے۔پچھلے الیکشن وچ میاں شبیر علی قریشی نے ایں علاقے دے مسائل تے ترجیح بنیاد تے توجہ کرݨ دا نعرہ لاکےاتھوں ووٹ گھنݨ اچ کامیاب تھئے مگر الیکشن دے بعد کنڈ وی ݙیکھݨی نہ ݙتی۔ اتھوں دے کجھ مقامی لوگ جنہاں جناب ہوراں کوں ڈور ٹو ڈور الیکشن مہم چلاوݨ اچ معاونت کیتی اوہ آپ دی وعدہ خلافی تے انتہائی رنجیدہ ہن۔ایں ستم ظریفی توں بعد نویں سیاسی ہل چل وچ وی شبیر علی قریشی صاحب نواں ہتھ کھیݙدے ہوئے نظر آئن جیڑھا کوئی لکیا ہویا کائنی کہ ہک ݙوجھے ضلعے دے مقیم فرد کوں اپݨے حلقے وچ الیکشن لڑاوݨ دی بھڄ دروک اچ واضح کردار ادا کیتا۔جیندا صدمہ اتھوں دے مقیم امیدواراں دے نال نال کجھ وسیبی لوکاں کوں وی تھئے ۔جیندے نتیجے وچ اڄ ہک سوشل میڈیا تے ریکارڈڈکال سݨݨ کوں ملی جیندا عنوان شبیر علی قریشی نال آنلائن ناراضگی ہا۔ ایں ناراضگی دا اظہار انہاں دے اوہ ٻانہہ ٻیل دوست کریندے پئے ہن جئیں اوکوں ایں وسیب اچ ڈور ٹو ڈور پھرایا ہا۔اوندا لہجہ وݙا سخت ہا تے کیوں نہ ہووے ہا اوہ دانستہ دوکھا جو کھاہدی ودا ہا۔حالی حال مکا نئیں ڳالھ شروع تھئی اے جو میاں شبیر علی دے پرستاراں اچوں ہک وفادار پرستار نے جوابا سوشل میڈیا تِ پوسٹ لائی تے اپݨے غم غصے دا شعلے بھڑکایا جیندے چودھاروں پروانے سر مارݨ لڳ ڳئے۔ میں سمجھداں ایں سارے لڑھ اچ ہر بندے اپݨی سیاسی سپورٹ دی وفاداری نبھائی اے مگر افسوس اے جو میݙے (تھل)دا ترس کہیں کوں نئیں آیا جیندے نال صدیاں توں وانج تھیندا پئے۔اڄ لوگیں کوں شبیر علی دی شرافت تاں یاد ہئی مگر اوندی غیر منصفانہ سیاسی پالیسی دا تذکرہ کہیں کوں یاد نئیں آیا۔اڄ لوگیں کوں شخصی محبت تاں یاد ہئی جو پیر صاحب دے بابا سئیں وی 1985اچ ایں حلقے توں ون کیتا ہا مگر اے کہیں نی ݙسیا جو اتھاں وݙے سئیں کیا ݙے ڳئے ہن۔اڄ لوگیں کوں اے کاوڑ تاں آئی اے جو اساں سلھ دا جواب پتھر نال ݙیوݨ ڄاݨدے ہیں مگر انہاں کوں اے افسوس نی تھیا جو شبیر علی دی جیت تے جئیں اوکوں مونڈھے تے چاتا اوندے گھر دو ونڄݨ آلا رستہ حالی تک سب بیس دی حالت اچ پئے۔اڄ لوگاں کوں اے تاں خیال آئے جو ہک بھرا ہک نال ہے تے ٻیا ٻئے نال پر انہاں کوں اے عقل کائنی جو وسیبی رشتے ناطے دی وی کوئی قدر و قیمت ہوندی اے۔مدعاء اے جو اپݨے لوٹے آپ تروڑ کے فائدہ ول وی انہاں چال باز لوکاں دا کیتا جیڑھے کہیں دے متر کائنی۔ انہاں دا مقصد لوگاں کوں الو بݨاوݨ ہے نہ کہ میݙے وسیب (تھل) دی ترقی سانگے قدم ودھاوݨ ہے