Wn/skr/معاشی قتل تے نجکاری عوام دا درد

سرائیکی وسیب دا آدمی صبر تے محنت دی پہچان رکھیندے، پر ہݨ او معاشی قتل دا شکار تھی ڳئے۔ نجکاری (پرائیویٹائزیشن) دے ناں تے حکومتی ادارے ویچے ویندے پئین، جیندے نال ہزاراں ملازمین بے روزگار تھی ویسن۔ ایہ معاشی قتل کوئی مبالغہ کائنی، بلکہ حقیقت ہے۔ نجکاری دا مقصد ادارے بہتر کرݨ ہوندے، پر ہݨ تاں ایہ امیراں دی تجوریاں بھرݨ دا ذریعہ بݨ ڳئی اے۔ غریب ملازمین دی زندگیاں تے کھیڈݨ والے ایہ فیصلے ظلم ہن۔ سرائیکی وسیب وچ روزگار دے مواقع پہلے ہی گھٹ ہن، تے ہݨ نجکاری دے ناں تے سرکاری نوکریاں وی ختم تھیاں ویندن۔ پرامن احتجاج عوام دا حق ہے۔ ملازمین اپݨے حقوق کیتے سڑکاں تے آندن، پر اُنہاں دی آواز کوئی نہ سݨدے۔ حکومت کوں چاہیدا ہے جو او نجکاری دے فیصلے واپس گھنے تے ملازمین دے حقوق دا تحفظ کرے۔ عوام دی معاشی ترقی بغیر کہیں وی ملک دا ترقی ممکن کائنی۔ سرائیکی وسیب دے لوک صابر ہن، پر صبر دی وی حد ہوندی ہے۔ حکومت کوں چاہیدا ہے جو او عوام دے درد کو سمجھے تے نجکاری دے بجائے ادارے بہتر کرݨ تے توجہ ڈیوے۔ ملازمین دا معاشی قتل بند کرو ، اتے انصاف دا بول بالا تھیوے ۔

کالم نگار اورنگزیب اورنگ بغلانی

تاریخ: 15:03:2025