Wn/skr/شاہ ٹاؤن فیز 2: گلیاں ٹُٹ بھَڄ دا شکار، جاہ جاہ تے گندگی تے کوڑے دے ڈھیر، گٹراں دے ڈھکݨ غائب، شہریاں کوں مُشکلات دا سامݨاں۔

شاہ ٹاؤن فیز 2: گلیاں ٹُٹ بھَڄ دا شکار، جاہ جاہ تے گندگی تے کوڑے دے ڈھیر، گٹراں دے ڈھکن غائب، شہریاں کوں مُشکلات دا سامݨاں۔

ملتان: شاہ ٹاؤن فیز 2 دیاں گلیاں وِچ جاہ جاہ تے گندگی دے ڈھیر لڳے ہوئے ہِن اَتے کوڑا کرکٹ وی جمع تھی ڳئے، گلیاں جاہ جاہ توں ٹُٹ بھَڄ دا شکار تھی ڳئی ہن، کئی گٹراں دے ڈھکݨ وی غائب تھی ڳین جیندے پاروں اُتھوں دے رہوݨ والے شہری ݙوہری مُصیبت وِچ پئے ہوئے ہِن، شہریاں کوں آوݨ ونڄݨ وِچ مُشکلات تھیندیاں پَئین۔

شہریاں دا آکھݨ ہِے کہ اَساں اِنہاں مُشکلاں دی وجہ توں پریشان ہَیں، اَساں کوں گٹراں تے ڈھکݨ نہ ہووݨ دی وجہ توں رات کوں گھر توں ٻاہر نِکلݨ ویلے وی ݙر لڳدے جو کِتھائیں کوئی اوکھا ویلا نہ آ ونڄے اَتے ساݙے ٻالاں دی زندگی کوں وی خطرہ ہِے، ساݙی اِے عرض ہِے جو چھیتی توں چھیتی علاقے دی حالت ٹھیک کیتی ونڄے اَتے گٹراں تے ڈھکݨ وی لڳائے ونڄن اَتے کوڑا کرکٹ چُھکݨ دا ودھیا پَروبند کیتا ونڄے تاں جو علاقے وِچ روڳ نہ پَھلِن اَتے گندی واس توں وی جان چُھٹے اَتے ݙوہری پریشانی توں وی جان چُھٹ ونڄے۔