Wn/skr/سیاسی ورکرز دی قربانیاں دا احترام تے سردار اویس لغاری دے وعدے

او سیاسی ورکر جیڑھے اپݨی زندگی دا ہک وݙا حصہ پارٹی کیتے وقف کر ݙیندن، جیل دیاں کوٹھڑیاں وچ سڑدن، ظلم سہندن تے ول وی اُنہاں کوں او عزت نئیں ملدی جیڑھی اُنہاں دی قربانی دے مُتوں ہووݨی چاہیدی ہئی۔ ایں سچائی دا ہک درد ناک نمونہ میر محمد مرزا خان تالپور اتے ایندے نال کئی بئے ورکر ہن، جیڑھے مسلم لیگ نون دے ضلعی صدر ہن تے 1985 توں ایں پارٹی نال جُڑے ہوئے ہن۔ اُنہاں دی حیاتی دا ہک وݙا حصہ جیلاں، احتجاجاں تے سیاسی جدوجہد وچ گزریا، پر افسوس جو اڄ کل دے نویں چہرے وݙے عہدے گھن گھندن تے او لوک جیڑھے پارٹی دی بنیاد رکھی، اُنہاں کوں پِچھوں سٹ ݙتا ڳئے۔ سوال ایہ ہے جو: کیا ایہ انصاف ہے جو ہک سیاسی ورکر اپݨی جوانی پارٹی کیتے وقف کر ݙیوے تے اُنہاں دی قربانیاں دا صلہ صرف نظرانداز تے بے عزتی ہووے؟ کیا پارٹی دے اڳواݨاں کوں ایں ڳالھ دا احساس کائنی جو جے ورکرز دی محنت نہ ہووے تاں پارٹی دی عمارت کھڑی نہ تھی سڳدی؟ سردار اویس لغاری صاحب، آپ ہک وݙے سردار ہن، سرائیکی خطے دی سیاست وچ آپ دا ہک خاص مقام ہے۔ آپ مرزا خان تالپور نال وعدے کیتے ہن جو اُنہاں دا نال ݙیسو، اُنہاں دی حمایت کریسو۔ پر اڄ اُنہاں ورکرز کوں آپ دی ضرورت ہے جیڑھے سالاں توں آپ تے پارٹی دے نال ہن۔ کیا آپ دے وعدے محض انتخابی نعرے ہن یا ول آپ واقعی اپݨے ورکرز دا ساتھ ݙیوݨ دا عزم رکھدے ہن؟ وقت آ ڳئے جو سیاسی قیادت اپݨے ورکرز دی قدر کرے۔ مرزا خان تالپور جیہاں لوک پارٹی دی تاریخ دا حصہ ہن، اُنہاں کوں صرف زبانی خراج تحسین نئیں بلکہ عملی طور تے عزت ݙیوݨی چاہیدی ہے۔ جے ایں طرح دے وفادار کارکناں کوں نظرانداز کیتا ویندا رہیا تاں پارٹیاں دی بنیاد کَمزور تھی ویسی تے کوئی وی نویں کارکن اڳوں تے آوݨ دی ہمت نہ کریسی۔ سردار صاحب،ہک واری ولا سوچیں تے اپݨے اُو ورکرز دا ساتھ ݙیوݨ دا فیصلہ کرو جیڑھے تہاݙے نال سچے دل نال ہن۔ اصل کامیابی اُنہاں لوکاں دی خدمت وچ ہے جیڑھے تہاݙی سیاست دی بنیاد ہن۔ راقم الحروف سیاسی ورکرز دی قربانیاں، اُنہاں دے حقوق تے قیادت دی ذمہ داری بارے شعور ݙیوݨ کیتے لکھے۔ امید ہے جو ایندے نال سیاسی حلقے وچ اصلاحی سوچ کوں فروغ ملسی۔

✍️ کالم نگار: اورنگزیب اورنگ بغلانی تاریخ: 26 مارچ 2025ء