Wn/skr/سرائیکی دے عظیم شاعر اسلم جاوید: ہک سوچݨ دا مقام

سرائیکی دے عظیم شاعر اسلم جاوید: ہک سوچݨ دا مقام

کالم نگار: اورنگزیب اورنگ بغلانی

تاریخ: 12 اپریل 2025ء

سرائیکی وسیب دی دھرتی شاعری، ثقافت تے محبت نال سڳی ہوئی ہے۔ ایں دھرتی دے شاعر ہمیشہ اپݨے کلچر، ریتاں تے لوک دھڑک کوں اپݨی شاعری دا حصہ بݨائے۔ انہاں وچوں ہک ناں اسلم جاوید دا ہے، جیڑھا سرائیکی زبان دا ہک جید شاعر ہے۔ انہاں دی کتاب "ست سرائی" ہک درگھی نظم تے مشتمل ہے جیڑھی سرائیکی شعریات دا ہک شاہکار ہے۔ ایندے نال انہاں دی کتاب "پکھی پال تھلوچڑ"نظماں دا ہک ایجھا مجموعہ ہے جیڑھا سرائیکی لوک دھرتی اتے فطرت نال جُڑیا ہویا ہے۔ مگر افسوس! اجوکے دور وچ لسانیت تے فرقہ پرستی دیاں ڳالھیں کرݨ والے او لوک، جنہاں دا کم صرف اپݨی ذات تے زبان دی برتری ثابت کرݨ ہے، او سرائیکی دے عظیم شاعر اسلم جاوید جیہاں لوکاں دے فن تے قلم دی ڳالھ تک کرݨ کوں تیار کائنی۔ کیا ایہ ساݙی علمی تے ادبی روایت دا احترام کائنی؟ جیڑھے شاعر اپݨی مادری زبان وچ سوچیں، لکھیں تے جیویں، او کیوں نظر انداز تھیوݨ پئے گن؟ اسلم جاوید جیہاں شاعراں دی تخلیقات ساݙی ثقافتی میراث ہن۔ انہاں دی شاعری وچ سرائیکی وسیب دی مٹی دی خوشبو، لوک گیتاں دی سریلی تان تے انسان دوستی دے جذبے موجود ہن۔ پر اج دے دور وچ جتھاں لسانی تعصبات نے ادب تے ثقافت کوں وی تقسیم کر ݙتے، اوندا نقصان ساݙی نویں نسل کوں تھیندا پئے۔ ساݙے سامہݨے ہک سوال ہے: کی اساں سرائیکی زبان تے ادب دے حقیقی ورثے کوں محفوظ کرݨ کیتے تیار ہیں؟ جے اساں اپݨے شاعراں، ادیباں تے دانشوراں کوں نظر انداز کریسوں، تاں اساݙی اڳلی نسل اپݨی شناخت کولوں محروم تھی ویسی۔ سرائیکی زبان ساݙی ماء بولی ہے، تے اسلم جاوید جیہاں شاعر ایندے امین ہن۔ اساکوں انہاں دے کم کوں سراہݨا چاہیدا ہے تے نویں نسل تک انہاں دے افکار کوں پُڄاوݨا چاہیدا ہے۔ جے اساں کہیں شاعر دی حفاظت کینئا کریسوں، تاں اساݙی شناخت وی خطرے وچ پئے ویسی۔