Wn/skr/ساݙیاں بلوچی روایات تے ثقافت دے نشان کتھاں لاپتہ تھی گئین؟

ڈیرہ غازی خان، جیہڑا بلوچی ثقافت دا گڑھ سمجھیا ویندا ہے، لیکن اڄ کل اِتھاں بلوچی روایات تے ثقافت دے نشان دھندلے تِھی ڳئین۔ کل دامان علاقے دے رہائشی یاسین خان نانگری لغاری تے اُنہاں دے بھتیجے مجاہد نانگری لغاری موٹر سائیکل تے سخی سرور توں ڈیرہ غازی خان ویندے پئے ہن۔ راہ وچ کجھ نامعلوم افراد نے موٹر سائیکل تے سامان چھیکݨ دی کوشش کیتی۔ سامان تے موٹر سائیکل نہ ݙیوݨ تے ڈاکوواں نے فائرنگ شروع کر ݙتی۔ ایہ واقعہ صرف اک واردات کینئی، بلکہ ایہ ساݙے معاشرے دے اخلاقی زوال دی علامت ہے۔ سڑک تے پورا علاقہ ایں واقعے دا گواہ ہے۔ سوچݨ والی ڳالھ ایہ ہے کہ ساݙی انسانیت کتھاں ڳم تھی ڳئی ہے؟ ساݙیاں بلوچی روایات تے ثقافت دے نشان کتھاں لاپتہ تِھی ڳئین؟ ایہ سوال صرف ڈیرہ غازی خان یا بلوچی ثقافت تک محدود کینئی، بلکہ پورے معاشرے کوں ایں صورت حال دا سامݨا ہے۔ ساݙے معاشرے وچ انسانیت تے اخلاقیات دے ناں تے جیہڑی کمی آندی پئی ہے، اوندا اثر ساݙیاں روایات تے ثقافت تے وی پئے۔ ساݙے بزرگاں دے زمانے وچ جیہڑی محبت، بھائیچارہ تے رواداری ہوندی ہئی، اوہ کتھاں ڳئی؟ ساݙے معاشرے کوں ایں زوال توں بچاوݨ کیتے ساݙیاں روایات تے ثقافت کوں زندہ رکھݨ دی ضرورت ہے۔ ایں واقعے توں سبق گھِنݨ دی لوڑھ ہے۔ ساݙے معاشرے کوں ایں ڳالھ دا احساس تِھیوݨ چاہیدا ہے کہ جے اساں اپݨیاں روایات تے اخلاقیات کوں نظرانداز کریسوں، تاں اساں اپݨی شناخت کھو سڳدے ہیں۔ ایہو جہیے واقعات ساݙے معاشرے دے اخلاقی پہلو کوں کمزور کریندن تے اساں ایں صورت حال کوں بدلݨ کیتے متحد تھیوݨ دی ضرورت ہے۔ اساں اپݨیاں روایات تے ثقافت کوں زندہ رکھݨ کیتے اپݨے نوجواناں کوں اِتھاں دے اصل اقدار نال جوڑݨ دی کوشش کریسوں۔ صرف ایں طرح اساں اپݨی انسانیت تے اخلاقیات کوں بحال کر سڳدے ہیں تے معاشرے وچ پھیلی ہوئی بے حسی تے خود غرضی کوں ختم کر سڳدے ہیں۔

کالم نگار: اورنگزیب اورنگ بغلانی تاریخ 20:03:2025ء