Wn/skr/دریائے سندھ توں 6 نہراں کڈھݨ تے چولستان تے قبضہ گیری: سرائیکی وسیب دی خاموشی

دریائے سندھ، سرائیکی دھرتی دی شاہ رگ ہے بلکہ رگِ جاں ہے۔ ایہ دریا نہ صرف ساݙے کھیتاں کوں سیراب کریندے بلکہ ساݙی تہذیب تے ثقافت دا وی حصہ ہے۔ حالیہ ڈہنیاں وچ دریائے سندھ توں چھ نویاں نہراں کڈھݨ دا فیصلہ تھیا ہے، جیندے تے پورے سندھ وچ احتجاج دے طوفان اٹھ کھڑے ہن۔ پر ایندے نال ایہو جہاں ہک ٻیا المیہ وی ہے جو چولستان دی لکھاں ایکڑ زمین تے قبضہ گیری دا عمل تیزی نال جاری ہے۔ ایں سارے عمل وچ سرائیکی وسیب دے ارکان اسمبلی دی خاموشی تے بے حسی قابل مذمت ہے۔ چولستان، سرائیکی وسیب دا ہک اہم حصہ ہے۔ ایں خطے وچ لکھاں ایکڑ زمین موجود ہے، جیڑھی سرائیکی لوکاں دی معاشی تے سماجی زندگی دا مرکز ہے۔ پر حالیہ ڈہنیاں وچ ایں زمین تے غیر قانونی قبضہ گیری دا عمل تیزی نال ودھ ڳیا ہے۔ ایں عمل نال نہ صرف سرائیکی لوکاں دے حقوق غصب تھیندے پئین بلکہ ایں خطے دی ماحولیات تے وی منفی اثرات مرتب تھیندے پئین۔

سرائیکستان دا نقشہ

سوال ایہ ہے جو سرائیکی وسیب دے ارکان اسمبلی ایں سارے عمل تے خاموش کیوں ہن؟ کیا او اپݨے عوام دے حقوق دے تحفظ کیتے کوئی آواز نئیں اٹھا سڳدے؟ کیا او اپݨے وسیب دی زمین تے وسائل دے تحفظ کیتے کوئی قدم نئیں چا سڳدے؟ ارکان اسمبلی دی ایہ خاموشی تے بے حسی سرائیکی عوام دے نال دھوکہ ہے۔ دریائے سندھ توں چھ نہراں کڈھݨ دا فیصلہ وی سرائیکی وسیب کیتے تشویشناک ہے۔ ایں فیصلے نال سرائیکی وسیب دے پاݨی دے حقوق متاثر تھی سڳدے ہن۔ پاݨی، زندگی دا بنیادی حق ہے تے ایں حق کوں کہیں وی صورت وچ غصب نئیں کیتا ونڄݨا چاہیدا۔ سرائیکی وسیب دے ارکان اسمبلی کوں چاہیدا ہے جو او ایں فیصلے دے خلاف آواز اٹھاؤن تے اپݨے عوام دے حقوق دے تحفظ کیتے کھڑے تھیون۔ سرائیکی وسیب دے ارکان اسمبلی دی خاموشی تے بے حسی کوں قبول نئیں کیتا ونڄ سڳدا۔ اساں اپݨے نمائندیاں توں توقع رکھیے جو او اپݨے عوام دے حقوق دے تحفظ کیتے آواز اٹھاؤن۔ اساں اپݨی زمین، اپݨے وسائل تے اپݨے حقوق دے تحفظ کیتے کھڑے تھیوݨا ہے۔ سرائیکی وسیب دی خاموشی کوں توڑݨا ہے تے اپݨے حقوق دے تحفظ کیتے آواز بلند کرݨی ہے۔

کالم نگار اورنگزیب اورنگ بغلانی

تاریخ: 15:03:2025