Wn/skr/دامان دے خوبصورت پہاڑ تے وادیاں وچ کونج دی آواز

کونج، ہک مسافر پرندہ، جیڑھا ہزاراں میل دا سفر طے کر تے اساڈے دامان دے علاقے وچ پہنچدے، ہنڑ روز ایں مظلوم پرندے دے قتل دیاں خبراں اساڈے دل ڈکھیندین ۔ کونج صرف ہک پرندہ کائنی، ایہ فطرت دا ہک شاہکار ہے، جیڑھا اساڈے ماحول دے توازن کوں برقرار رکھیندا ہے۔ ایندا سفر صرف ہک پرندے دا سفر کائنی، بلکہ ایہ زندگی دے تسلسل دی ہک علامت ہے۔ پر افسوس، ایں مظلوم پرندے کوں ہنڑ روز اساڈے علاقے وچ قتل کیتا ویندا پئے۔ دامان دے خوبصورت پہاڑ تے وادیاں وچ کونج دی آواز ہک زمانے وچ گونجدی ہئی۔ ایہ آواز فطرت دی موسیقی ہئی، جیڑھی اساڈے دل کوں سکون ڈیندی ہئی۔ پر ہنڑ ایہ آواز گھٹدی ویندی ہے، کیوں جو کونج دے قتل دے واقعات ودھدے پئین۔ ایہ صورت حال صرف ہک پرندے دے قتل دی کہانی کائنی، بلکہ ایہ اساڈے معاشرے دے احساسات تے فطرت نال جڑت دے ختم تھیوݨ دی علامت ہے۔ کونج دا قتل صرف ہک جانور دا قتل کائنی، بلکہ ایہ اساڈی اخلاقی تے مذہبی اقدار دے خلاف ہک وݙا جرم ہے۔ اسلام وچ وی پرندیاں تے جانوراں دے حقوق دا خیال رکھݨ تے زور ڈتا ڳئے۔ پیغمبر اسلام حضرت محمد ﷺ دا فرمان ہے کہ "ہک پرندے کوں وی ناحق مارݨ والا قیامت دے روز اللہ دے سامݨے جواب دہ ہوسی۔" اساں اپنڑے دین تے اخلاقیات کوں کیویں بھل سڳدے ہیں؟ ایں مسئلے دا حل صرف قانون سازی تے عمل درآمد تے منحصر کائنی، بلکہ ایہ اساڈے معاشرے دے ہر فرد دی ذمہ داری ہے کہ او فطرت دے تحفظ دی خاطر اپنڑا کردار ادا کرے۔ اساکوں اپنڑے نوجواناں کوں فطرت نال محبت کرݨ دی تعلیم ڈیوݨی چاہیدی ہے۔ اساکوں اپنڑے علاقے دے لوکاں کوں ایہ شعور ڈیوݨا چاہیدا ہے کہ پرندے تے جانور اساڈے ماحول دے اہم حصے ہن، انہاں دے بغیر اساڈی زمین ادھوری ہے۔ وائلڈ لائف دے محکمے تے حکومت کوں وی چاہیدا ہے کہ او شکار دے خلاف سخت قوانین بݨائین تے انہاں تے عمل درآمد یقینی بݨائین۔ پرندیاں تے جانوراں دے تحفظ دے خاطر عوامی بیداری مہم چلائین تے لوکاں کوں ایں بارے وچ آگاہ کرن۔ اساکوں سب کوں چاہیدا ہے کہ اساڈے علاقے وچ کونج دے قتل دے خلاف آواز بلند کروں ۔ اساکوں اپنڑے بچیاں کوں فطرت نال محبت کرݨ دی تعلیم ڈیوݨی چاہیدی ہے۔ اساں اپنڑے آونڑ والیاں نسلاں کوں ہک خوبصورت تے متوازن ماحول ڈیوݨ دے ذمہ دار ہیں۔ آؤ، مل تے سارے مظلوم پرندیاں تے جانوراں دے تحفظ دے خاطر کم کروں ۔ کونج دی آواز کوں دوبارہ اساڈے دامان دے پہاڑاں وچ گونجݨ ڈیوݨ دے خاطر ہک ٻئے دا ہتھ تھامو۔ ایہو اساڈی فطرت دا حسن ہے، جیڑھا اساں سب دے تعاون نال برقرار رکھ سڳدے ہیں۔

کالم نگار اورنگزیب اورنگ بغلانی تاریخ: 16:03:2025