Wn/skr/حکمران ساݙی دولت تے حق مار کھاندن تے ساکوں منہ تے طعنے ڈیندن

حکمران ساݙی روٹی چرا گھِندن، ول اوں وِچوں ہک ٹِکڑا ساکوں ݙے ݙیندن، ول حکم ݙیندن جو اُنھاں دی سخاوت تے شکر گزاری کرو۔ کیڑھے پَیرھوں دی بے شرمی ہے

— اورنگزیب اورنگ بغلانی

تاریخ: 4 اپریل 2025ء

کالم:

اڄوکے دور وِچ عوام دی حالت اوں مزدور دے وانگوں ہے جیڑھا پورا ڈہنیہ کم کریندے اتے اوندی مزدوری دا وݙا حصہ کوئی ٻیا کھا ویندے۔ حکمران ساݙے حق دے پیسے، ساݙی روٹی، ساݙی خوشحالی چرا گھِندن، ول اوں وِچوں ہک چھوٹا جیہا ٹکڑا ساکوں واپس کریندن تے اپݨی "سخاوت" دا ڈھنڈورا پیٹݨ لڳ ویندن۔ ایہ ظلم دی انتہا ہے، ایہ بے شرمی دی حد ہے! ساݙے ملک وِچ وسائل ٻہوں ہن، پر عوام غریب تے مفلس کیوں؟ کیوں ساݙے ہسپتالاں وِچ دواوݨ کِیتے پیسے کائنی؟ کیوں ساݙے سکول تے کالجاں وِچ معیاری تعلیم کِیتے وسائل کائنی؟ کیوں ساݙے نوجوان روزگار کِیتے ترسدن؟ جواب صرف ہک ہے

حکمران ساݙی دولت تے حق مار کھاندن تے ساکوں منہ تے طعنے ݙیندن۔

ایہ لوک ساݙی محنت دی کمائی کوں اپݨیاں پرتعیش گاڑیاں، محل نما گھراں تے بیرون ملک بینک اکاؤنٹس وِچ تبدیل کر ݙیندن۔ پھر جہڑے ویلھے عوام احتجاج کریندن، اینہاں کوں "نا شکرا"، "بے صبر" تے "ملک دشمن" قرار ݙے ݙتا ویندے۔ کیڑھی انصاف دی ڳالھ ہے؟ عوام کوں چاہیدا ہے جو او اپݨے حقوق کِیتے اُٹھن، اپݨی آواز بلند کرو۔ جے تک اساں اپݨی حق تلفی دے خلاف نئیں بولیسوں، ایہ سلسلہ ایویں ہی چلدا رہسے۔ وقت آ ڳئے ہے جو اساں اپݨی قسمت دا فیصلہ خود کرو، نہ جو اینہاں "سخی" حکمراناں دے رحم تے کرم تے چھوڑ ݙیوو۔ سوال ایہ نئیں جو اساں کیا گِھن سڳدے ہیں، سوال ایہ ہے جو اساں کیا برداشت کریسوں؟