Wn/skr/حذیفہ رحمان تے وڈانی مہاجر برداری دا فیصلہ: سیاسی کھیݙ دا ہک نواں موڑ؟

ڈیرہ غازی خان دے سیاسی منظر نامے تے وڈانی مہاجر برداری دے معاملے کوں ہک نویکلی اہمیت حاصل تھی ڳئی ہے۔ ایں معاملے کوں طول ݙیوݨ تے فیصلہ کرݨ وچ تاخیر دے بارے وچ سوالات اٹھدے پئین۔ میݙے خیال وچ، جے تک حذیفہ رحمان ڈیرہ غازی خان نہ آوسن اتنے تک وڈانی مہاجر برداری دا فیصلہ وی نئیں تھیندا نظردا ۔ ایں ڳالھ توں ایہ وی ظاہر تھیندے جو ایں معاملے کوں جان بجھ کر طول ݙتا ویندا پئے، تاکہ شہر وچ نویں سیاسی انٹری کوں ممکن بݨایا ونڄ سڳے۔ وڈانی مہاجر برداری دا معاملہ ہک پیچیدہ مسئلہ ہے، جیہڑا ڈیرہ غازی خان دی سیاست تے سماجی ساخت کوں متاثر کریندا آیا ہے۔ ایں معاملے دا فیصلہ کرݨ والے ادارے تے اہم شخصیات تے ہمیشہ توں ہک سیاسی دباؤ رہے گے حذیفہ رحمان، جیہڑے ہک نمایاں سیاسی شخصیت ہن، انہاں دے آوݨ تے فیصلہ کرݨ نال ایہ ظاہر تھیندے جو ایں معاملے کوں سیاسی مفادات دے تحت استعمال کیتا ویندا پئے۔ ایں ڳالھ کوں وی نظر انداز نہیں کیتا ونڄ سڳدا جو ڈیرہ غازی خان وچ نویں سیاسی قوتاں دے داخلے کیتے ایں معاملے کوں ہک "موقع" دے طور تے استعمال کیتا ویندا پئے۔ جے ایہ معاملہ حل تھی ویندے، تاں موجودہ سیاسی قوتاں دے مفادات متاثر تھی سڳدن۔ ایں کیتے، ایں معاملے کوں طول ݙیوݨ نال نہ صرف حذیفہ رحمان جیہڑے سیاسی رہنماواں کوں مرکزی کردار ݙتا ویندے، بلکہ نویں سیاسی انٹری کیتے راہ وی ہموار تھیندی ہے۔ ایں سارے صورتحال وچ، عام شہریاں دے حقوق تے انصاف دے حصول کوں نظر انداز کیتا ویندا پئے۔ وڈانی مہاجر برداری دا معاملہ صرف ہک سیاسی مسئلہ کائنی، بلکہ ایہ ہک انسانی تے سماجی مسئلہ وی ہے۔ ایں کیتے، ایں معاملے کوں سیاسی مفادات دے بجائے انصاف تے قانون دی بنیاد تے حل کرݨ دی ضرورت ہے۔ حذیفہ رحمان دے کردار تے ایں معاملے کوں طول ݙیوݨ دے پیچھے کارفرما سیاسی حکمت عملی کوں سمجھݨ کیتے ضروری ہے جو اساں ایں ڳالھ تے غور کرن جو کیا واقعی ایہ معاملہ حل کیتے ونڄݨ دے بجائے ہک سیاسی ہتھکنڈے دے طور تے استعمال کیتا ویندا پئے؟ جے ایہو حال رہیا، تاں ڈیرہ غازی خان دے عوام دے حقوق تے انصاف دے حصول دے مواقع محدود تھی ویسن۔

کالم نگار: اورنگزیب اورنگ بغلانی تاریخ: 17 مارچ 2025