Wn/skr/"چاک" تے خواجہ فرید ادبی ایوارڈ: عزیز اکبر شاہد دی سرائیکی ادب کوں نویکلی خدمت

"چاک" تے خواجہ فرید ادبی ایوارڈ: عزیز اکبر شاہد دی سرائیکی ادب کوں نویکلی خدمت: کالم نگار: اورنگزیب اورنگ بغلانی

تاریخ: 12 اپریل 2025ء

ڈیرہ غازی خان دے دامان وسیب دے نامور سئیں عزیز اکبر شاہد کوں سرائیکی ادب دے ممتاز حوالے دی حیثیت رکھݨ والی کتاب "چاک" تے خواجہ فرید ادبی وقومی ایوارڈ ملݨ دی خوشخبری نہ صرف سرائیکی ادبی حلقیاں کیتے بلکہ پورے پاکستانی ثقافتی دھارے کیتے اعزاز دی ڳالھ ہے۔ ایہ ایوارڈ اکادمی ادبیات پاکستان دی طرفوں ڈتے ویندن اتے ایندے وچ اوہناں ادیباں کوں خراج تحسین پیش کیتا ویندے جیہڑے قومی یکجہتی، لسانی تنوع تے ثقافتی ورثے دی نمائندگی اپݨی تخلیقات وچ کریندن۔ عزیز اکبر شاہد دی کتاب "چاک"کوں جے تساں سرائیکی ادب دی ہک معرکہ آرا تصنیف آکھو تاں بے جا نہ ہوسی۔ ایہ کتاب نہ صرف سرائیکی زبان دے لفظی جمالیات دا عکاس ہے بلکہ ایندے وچ وسیب دے ڈکھ، سکھ، محرومیاں تے امیداں دیاں جذباتی ترجمانیاں وی موجود ہن۔ شاہد صاحب نے اپݨے قلم نال سرائیکی دی مٹھاس، وسیب دی دھرتی دی خوشبو تے مقامی ریتاں دے رنگ کوں ایں طرح بیان کیتے جو پڑھݨ والا خود کوں ڈیرہ غازی خان دے دامان وچ محسوس کریندے۔ خواجہ فرید ادبی ایوارڈ کہیں وی لکھاری کیتے ہک وݙا اعزاز ہے، خاص طور تے جݙاں ایہ کہیں ایں شخصیت کوں ڈتا ویندے جیہڑی سرائیکی ورثے کوں عالمی سطح تے متعارف کرویندے۔ عزیز اکبر شاہد ایں اعزاز دے حق دار ہن کیوں جو انہاں نے نہ صرف سرائیکی زبان کوں فروغ ݙتے بلکہ اپݨی تخلیقات دے ذریعے وسیب دی داستان کوں ہمیشہ کیتے امر کر ݙتے۔ سرائیکی زبان ہک ایجھی زبان ہے جیہڑی صدیوں توں پنجاب، سندھ تے بلوچستان دے سنگم تے پروان چڑھی ہے۔ ایندے وچ صوفیانہ کلام، لوک داستاناں تے جدید شاعری دا ہک انوکھا امتزاج موجود ہے۔ عزیز اکبر شاہد جیہے ادیباں دی محنت دے بغیر ایں زبان دا اجیہا فروغ ممکن نہ ہوندا۔ انہاں دیاں تحریراں نہ صرف ادبی حلقیاں وچ پڑھیاں ویندین بلکہ عام لوک وی انہاں دی سادہ پر اثرانداز بیان دے قائل ہن۔ عزیز اکبر شاہد کوں خواجہ فرید ادبی ایوارڈ ملݨ تے اساں سارے وسیب دے لوک انہاں کوں دل توں مبارکباد ݙیندے ہیں۔ امید ہے کہ ایہ اعزاز انہاں کیتے ہک نویں سفر دا آغاز ہوسی تے او سرائیکی زبان تے ثقافت دی خدمت دے سفر وچ اڳوں توں اڳوں ودھدے رہسن۔ سرائیکی ادب دے ایں عظیم فرزند کوں ساݙی طرفوں لکھاں سلام!