Wn/scn/Salentu: 23ina mori duranti un rave

lunidìa 16 d'austu 2009

Lu rave party duranti lu quali avvinni la traggedia

Dê primi uri dô 15 d'austu li citatini dô cumuni rivierascu di Disu (Lecce), e chiddi dâ frazzioni Marìttima, foru surprisi di n'eventu abbastanti nzòlitu pi nu cumuni di picca chiù 3000 abbitanti. Â ntrasatta circa quattrumila pirsuni si rivirsaru ntê campagni allatu dê dui centri e mpruvvisaru, n manera dô tuttu illigali, un rave party. La mùsica, emisa di n'amplificaturi di 6000 Watt e ca si putìa sèntiri di tutti li cumuni vicinanti, cuntinuau pi tuttu lu 15 d'austu finu a l'8 e 45 di stamatina quannu â ntrasatta cissau. La càusa: na picciotta di 23 anni dâ pruvincia di Putenza, Làura Lamberti, murìu.

A l'8 di sta matina la picciotta fu rinvinuta priva di senzi di nu sò amicu ca, p'evitari di scatinari lu pànicu ntra li quasi quattrumila participanti, carricau lu corpu dâ giùvini putintina n màchina pi traspurtàrilu ntê vicinanzi dûn distribbuturi di binzina nta l'abbitatu di Disu. L'amicu chiamau appoi lu 118 ma, a l'arrivu dê succursi, li mèdici si limitaru a cunstatari la morti.

La sarma fu traspurtata a l'obbitoriu cumunali p'èssiri appoi trasfiruta pressu lu spitali Vito Fazzi di Lecce n attisa d'èssiri arricanusciuta dê ginitura, ora n viaggiu di Putenza. Sulu l'esami autòpticu di dumani, già dispostu dô pm Àngila Rotondano e c'havi a èssiri esiguitu dô mèdicu ligali Rubbertu Vaglio, pò stabbiliri cu cirtizza li càusi dâ morti dâ giùvini.

Ä tristi vicenna va macari a agghiuncìrisi la morti di N.I., un vintiseiinu d'orìggini israiliani, duranti un rave party n lucalità Bocca di Selva ntra Guardiareggia (Campubassu) e Casteddu dô Matisi (Caserta).

Fonti

• «Ragazza muore durante rave-party a Diso Marittima» – La Gazzetta del Mezzogiorno, 16 d'austu 2009
• «Due vittime nei rave party di agosto Ragazza e ragazzo morti in Puglia e in Molise» – La Repubblica, 16 d'austu 2009
• «Rave party killer: due vittime in poche ore» – Corriere della Sera, 16 d'austu 2009