Wn/scn/Russanu: sciarra ntra onuranzi fùnibbri pê corpi dê sei rumeni travolti dô trenu

martidìa 27 di nuvèmmiru 2012

Russanu: a picca uri dô ncidenti ferruviariu tràggicu ntô quali pèrsiru la vita sei travagghiatura staggiunali di nazziunalità rumena, tri fìmmini e tri òmini, mpiegati ntâ ricota dê crimintini e di rientru a cunchiusioni dâ jurnata di travagghiu, na scena di sciacallaggiu si cunzumau â prisenza dê forzi di l'òrdini e sutta l'occhi stupifatti di parenti e amici dê vìttimi.

Protaginisti di l'episodiu scuncirtanti li titulari e li dipinnenti d'arcuni agginzìi d'onuranzi fùnibbri dê paesi vicini, accurruti lestu lestu ntô locu dâ traggedia. Mentri li forzi di l'òrdini, viggili dô focu e lu pirsunali mèdicu e paramèdicu pristàvanu sirvizziu attornu ô locu dô scontru tràggicu, di na parti si senti gridari davanti â carcassa dâ màchina:

«Quelli sono tutti miei. Sono stato avvisato dall'ospedale, sono arrivato per primo, se qui viene qualcuno che non è di Rossano succede un casino. Questa è roba nostra, non vogliamo gente da Corigliano o da Mirto»

Mmidiata la rèplica dâ ditta cuncurrenti:

«No, facciamo uno a testa»

Siguìanu ammuttuna, buffazzi e la sciarra chê vareddi utilizzati comu strumentu pi curpiri l'avvirsariu, cu n'obbiettivu ùnicu: di na parti tintari d'accaparràrisi na "fedda", di l'àutra mèttiri li manu supra tutta la torta, custituiuta dê sarmi dê sei braccianti mischini. Lu scontru cuntìnua, câ prumissa di rividìrisi n mumenti chiù "tranquilli". Accussì mentri ntê binari li viggili dô focu s'adòpiranu p'estràiri cu attinzioni e dilicatizza li resti dilaniati dê vìttimi, fora dô locu dâ straggi l'opiratura dê pompi fùnibbri arricògghinu li corpi n prescia, senza arcunu rispettu pi ddi resti senza vita, currennu lu chiù vilocimenti pussìbbili, quasi fussi na gara a cu arraffa chiù catàfiri.

Nu gridu di ndignazzioni si leva dâ strata: «Sono degli sciacalli» ma cu lu lanciau s'ammuccia quannu unu di l'opiratura cerca cu nzistenza di capiri cu fu.

Quannu lu scontru ntra li ditti cuncurrenti pari oramai essìrisi placatu, esplodi la raggia d'unu dê titulari di l'agginzìi fùnibbri ch'evidentementi vidi sfumari l'affari. Ntâ cuncitazzioni li purtantini pèrdinu l'eculibbriu, facennu ruinari a terra dâ varedda lu corpu ca c'era adaciatu. Di fronti a na scena tantu orrìbbili si lèvanu li grida di ndignazzioni di parenti e amici dê vìttimi. Quarcunu grida:

«Vergognatevi, questo è il mio sangue, non sono dei cani questi sono esseri umani»

Quannu li menzi cu a bordu li corpi dê sei travagghiatura s'arràssanu dô locu dâ traggedia vèninu assicutati dê grida:

«Sciacalli, sciacalli!»

Fonti

• Pàulu Piras, Tg3 «Sciacalli si contendono le salme» – Rainews24, 27 di nuvèmmiru 2012
• Giuseppi Baldessarro «Rossano, rissa fra pompe funebri per i corpi dei braccianti uccisi dal treno» – La Repubblica, 26 di nuvèmmiru 2012
• Valeriu Panettieri «Il retroscena Strage del treno, la rissa delle onoranze funebri per contendersi i corpi delle vittime di Rossano» – Il Quotidiano della Calabria, 25 di nuvèmmiru 2012
• Redazione online «Strage di Rossano: i morti e gli "sciacalli" delle pompe funebri» – Quicosenza.it, 26 di nuvèmmiru 2012
• «Treno travolge 'furgone', sei morti in Calabria. Erano braccianti agricoli di rientro dai campi» – La Repubblica, 24 di nuvèmmiru 2012