Wn/nan/Tâi-oân 4:0 oân-hong Ji̍t-pún, tit-tio̍h tâi-oân ê thâu-chi̍t-ê 12-kiông koan-kun

Kin-á-ji̍t (11/24) ē-àm Tâi-oân kah Ji̍t-pún tī Tang-kiaⁿ Kī-tàn chìn-hêng Tē-3-kài Sè-kài Iá-kiû 12-kiông-sài ê koan-kun-chiàn, nn̄g-pêng ê sian-hoat tâu-chhiú sī Lîm Io̍k-bîn kah Togō Shōsei.

Thâu-2-kio̍k Lîm Io̍k-bîn hō͘ Ji̍t-pún saⁿ-chiōⁿ-saⁿ-lo̍h, Tâi-oân tē-1-kio̍k kah tē-3-kio̍k sui-jiân lóng-ū kong-chiàm tit-tiám-khoan, m̄-koh lóng bô-hoat-tō͘ tit-tio̍h hun-sò͘. Tē-5-kio̍k Tâi-oân tē-1-ê thûi-á-chhiú Lîm Ka-chèng tio̍h kòng chhut chi̍t-ki hőng-bú-láng hō͘ Tâi-oân tī chi̍t-tiôⁿ pí-sài tong-tiong seng tit-tio̍h-hun, sòa--lo̍h-lâi koh-khò an-táⁿ kah pó-sàng kong-chiàm it, jī-lúi, Tân Kia̍t-hiàn mā kòng-chhut chi̍t-ki 3-hun ê hőng-bú-láng, Tâi-oân hùn-tōa léng-sian ê hun-sò͘ lâi-kàu 4:0. Sòa--lo̍h-lâi nn̄g-pêng ê tâu-chhiú lóng bô sit-hun, chòe-āu tē-9-kio̍k it-lúi ū lâng, 1 chhut-kio̍k, Kurihara Ryōya phah chi̍t-ki it-lúi hong-hiòng ê kiû ti̍t-chiap ji̍p-khì it-lúi-chhiú Chu Io̍k-hiân ê chhiú-thò lāi-té, chiap-sat chhut-kio̍k, Chu Io̍k-hiân sûi ka-kī cháu tńg-khì ta̍h it-lúi, Morishita Shōta bē-hù tńg-khì chhut-kio̍k, chiâⁿ-chò chi̍t-ê chài-kiàn double play, pí-sài kiat-sok.

Lo̍h-bóe Tâi-oân tī goân-té hőng khòaⁿ-soe ê chōng-hóng tit-tio̍h kin-nî 12-kiông ê koan-kun, mā-sī Tâi-oân tūi-sú ê thâu-1-ê 12-kiông koan-kun. Chit-tiôⁿ pí-sài m̄-nā sī Tâi-oân 30-nî-lâi thâu-1-pái iâⁿ Ji̍t-pún (Tâi-oân iá-kiû téng-pái iâⁿ Ji̍t-pún sī 1992-nî ê Ò-ūn pí-sài), mā hō͘ Ji̍t-pún tī kok-chè-sài 27-liân-sèng ê kì-lo̍k tn̄g--khì.

消息來源

外部網鍊

Chinese Taipei @ Japan