Wn/nan/Ji̍t-pún iá-kiû tī kok-chè-sài tit-tio̍h 25-liân-sèng

Kin-á (11/21) e-àm Bí-kok kah Ji̍t-pún tī Tang-kiaⁿ Kī-tàn chìn-hêng in tī kin-nî 12-kiông ho̍k-sài ê tē-it-tiôⁿ pí-sài, nn̄g-pêng ê sian-hoat tâu-chhiú hun-pia̍t sī 44-hòe ê Rich Hill kah Takahashi Hiroto (高橋宏斗).

Thâu-4-kio̍k Ji̍t-pún thûi-á-chhiú siū-tio̍h Rich Hill ap-chè, 1-hun lóng bô-hoat-tō͘ the̍h-tio̍h, Takahashi Hiroto mā-sī kāng-khoán 4-kio̍k bô sit-hun. 5-kio̍k siōng Ji̍t-pún ōaⁿ Sumida Chihiro (隅田知一郎) chiap-thè Takahashi Hiroto, kiat-kó hō͘ Colby Thomas kòng 1-ki ko͘-hun choân-lúi-táⁿ, tān-sī 5-kio̍k-hā Bí-kok ōaⁿ tâu-chhiú liáu-āu Ji̍t-pún sûi tián-khui hoán-kong, seng sī Sakakura Shogo (坂倉將吾) ê an-táⁿ hō͘ nn̄g-pêng pêⁿ-chhiú, sòa--lo̍h-lâi Kozono Kaito (小園海斗) ê saⁿ-lúi an-táⁿ hō͘ Ji̍t-pún ke the̍h-tio̍h 2-hun, í 1:3 tò-iâⁿ.

7-kio̍k-hā Kozono Kaito kòng 1-ki 3-hun ê hőng-bú-láng, kā hun-sò͘ kái-chò 1:6, pang-chō͘ Ji̍t-pún tit-tio̍h khah-chē pó-hiám-hun. 8-kio̍k-hā Kuwahara Masayuki (桑原將志) phah-chhut an-táⁿ, kā saⁿ-lúi ê Isobata Ryōta (五十幡亮汰) sàng tńg-lâi tit-tio̍h tē-7-hun, āu-chi̍t-pāng Kozono Kaito koh kòng-chhut pún-tiôⁿ pí-sài tē-2-ki hőng-bú-láng, Ji̍t-pún tit-tio̍h tē-9-hun.

9-kio̍k-siōng Termarr Johnson phah-chhut chó-gōa-iá hong-hiòng ê it-lúi an-táⁿ, Carson Williams pún-té beh cháu tńg-khì pún-lúi tit-hun, tān-sī kòe saⁿ-lúi bô-kúi-pō͘ kiû tio̍h thoân li̍p-khì lāi-iá--ah, i beh tńg-khì saⁿ-lúi koh bē-hù, chòe-āu sí tī saⁿ-lúi chiâⁿ-chò chit-tiôⁿ pí-sài ê siōng-bóe chi̍t-ê chhut-kio̍k. Lo̍h-bóe chit-tiôⁿ pí-sài Ji̍t-pún ê 9-hun lāi-té ū 7-hun lóng sī Kozono Kaito tit-tio̍h ê, chit-tiôⁿ phah-liáu Ji̍t-pún í-keng tī kok-chè-sài phah-chhut 25-liân-sèng ah.

Bîn-á-tiong-tàu lóng sī 0-sèng 1-pāi ê Tâi-oân kah Bí-kok beh chìn-hêng 2-tūi ê tē-2-tiôⁿ pí-sài, e-àm ōaⁿ Ji̍t-pún kah Venezuela sio-chiàn.

消息來源