Wn/nan/高雄市長補選登記結束，三跤㧣出現

【2020年6月24日訊】

今仔日是市長補選登記的最後一工，朝野各主要政黨參選人大概決定，國民黨徵召連任三任的市議員李眉蓁、民眾黨徵召連五霸的市議員吳益政出馬競選，𪜶兩人攏是現任的高雄市議員。

時代力量黨主席徐永明今仔日批評，前市長韓國瑜去予人罷免的主因就是帶職參選，這馬閣有兩个議員犯著仝款症頭欲出來參選，「這敢是閣共高雄市民當做盼仔囉？」

加上先前登記的民進黨籍前行政院副院長、今年55歲的陳其邁，這擺總共有三个人完成登記，變做是三跤㧣。41歲的李眉蓁議員是現任高雄市果菜運銷公司總經理李榮宗的查某囝，李榮宗以早是親民黨出身的議員，少年時閣是高雄地區的角頭，江湖上攏叫伊「落骨的」，無論本省的、外省的對伊攏尊重三分，收跤洗手了後猶原照顧江湖兄弟。57歲的吳益政議員本底是親民黨出身，毋過伊煞予民眾黨的柯文哲買跤數去，兼有親民黨兩个黨籍，卻是代表民眾黨出來參加高雄市長的補選。

消息來源

• 吳書緯，2位高市議員投入補選 徐永明：把高雄市民當白痴嗎？，《自由時報》，2020年6月24日．
• 陳凱俊，正式登記參選高市補選 李眉蓁：與益政哥、其邁哥君子之爭，《鏡週刊》，2020年6月24日．
• 李眉蓁披藍袍拚高市長！父李榮宗背景曝⋯曾入監救「兄弟」，《三立新聞網》，2020年6月24日．