Wn/nan/朝鮮半島做大水，黃江大壩三擺洩洪

【2020年8月7日訊】

風颱哈格比（Hagupit）是造成大水的原因之一。

自七月底開始，朝鮮半島大雨就一直落無歇，南韓到今上無已經有16个民眾死亡，11个人失蹤，閣有超過千人受災。根據韓國媒體綜合報導，漢江的大水已經淹到公路，河濱公園也攏是水。南韓環境部漢江大水控制站初六對漢江大橋流域發布自2011年7月底以來第一个大水預警，因為漢江大橋水位已經超過八點三公尺，真接近大水預警當中的「注意級別」8.5公尺。當局警告首爾鬧區可能會被大水淹著。

南韓對頂禮拜六開始一直落大雨，傳出真濟死傷，可能出現閣較濟死傷佮土石災情。首爾京畿道、忠清南北道有39條公路實施管制，閣有幾若條列車路線因為大雨停駛。

江原道春川市嘛發生搜救船反船的意外。當時警方佇咧水壩進行加固作業，船隻煞予纜線纏牢。政府佮民間派出兩隻樹奶船救援，最後三隻都翻船。

北韓也仝款大雨成災，上百人死亡。根據北韓氣象部門副主任的講法，自八月初一開始，雨季鋒面帶來的大雨影響著北韓真濟所在，特別是黃海南北道、開城市、江原道等，差不多逐工的累積雨量攏超過100毫米。

兩韓軍事分界線周邊城鎮淹大水，南韓認定江水水位達到歷史新懸不只是佮雨勢有關係，是北韓黃江大壩放大水。南韓統一部證實，七月底到這馬黃江大壩至少放三擺水，而且閣無遵守2009年的協約束事先通知南韓，就對黃江大壩的水庫卸水落來。南韓總統文在寅也到臨津江視察，有官員指出，南韓已經做好大壩雄雄崩去的應急準備。

消息來源

• 韓國9年來首次發布洪水預警 漢江公園出入管制，《中央通訊社》，2020年8月6日．
• 呂亞君，北韓黃江大壩洩洪 兩韓邊界村落大淹水，《公視新聞網》，2020年8月7日．
• 韓國暴雨釀13死13失蹤 逾千人受災，《中央通訊社》，2020年8月4日．