Wn/cdo/Hūng-băh-huă niēng Gĕ̤ng-ngiĕk-lô, iòng-dà̤-gák lŏk Dòng-ăng-săng
2018 n. 4 ng. 20 h. Hók-ciŭ séng
Săng-nguŏk muōi, nàng-hŭng tiĕng, Hók-ciŭ hàng-siŏh-â muāng-siàng dŭ-sê iòng-dà̤-gák (羊蹄甲).
Dài-gĕ̤ng-kṳ̆ (臺江區) Gĕ̤ng-ngiĕk-lô (工業路) diô-biĕng, iòng-dà̤-gák kŭi lāu muāng-chéu, huông ché̤ṳ dŭ-sê déng-déng gì hūng-sáik. Gĕ̤ng-ngiĕk-lô să̤-sié cêu-sê Să̤-sièng-sê (西禪寺). Găk cŭ-uái, kō̤-ī huông káng còng-gĭng-gó̤h (藏經閣), gê̤ṳng ché̤ṳ iòng-dà̤-gák, gó-chṳ̄ iâ hék-īng nè̤ng siŏh-bŏng siŏh lṳ̄ kó̤ kák-sióng. Gŏng-gé̤ṳ Să̤-sièng-sê gì bō̤-ăng gái-siêu, téng cā-tàu gáu màng-buŏ, dŭ ô nè̤ng mâi lā̤ dòng-chiŏng duāng-páu, dīng lāu iā òng, nâ ùi lā̤ kák gáu dék hō̤-káng gì sióng-piéng. Ô gì nè̤ng sêng-cé kŭi ù-ìng-gĭ, găk tiĕng gà̤-dēng kák-sióng. Sióng-piéng găk uōng-lŏk gà̤-dēng duâi-diòng. Ng-siê buōng-dê gì nè̤ng diōng-huák, ngiê-dău gĕ̤ng-cáuk tĕ̤k-cṳ̆ gì Hók-ciŭ-nè̤ng iâ biēu-sê „siōng-chió kó̤ lāu“. Buōng-nguŏk 13 hô̤, gó ô gŭng-gău-chiă sṳ̆-gĭ káng iòng-dà̤-gák hŭng-sĭng, dâung gáu biék gì chiă.
-
Siŏh ták siŏh gó̤h, ék-sê̤ṳ huă-kŭi -
Ciĕ-ngâ̤ tăng chió-sièng -
Gŏ̤-lèu â-dā̤ huă cêng déng -
Siŏh buò iòng dà̤ gák -
Màng-buŏ dâung duâi-ṳ̄, ṳ̄-diē Să̤-sièng-sê
Hók-gióng Sṳ̆-huâng Dâi-hŏk Chŏng-săng Hâu-kṳ̆ (福建師範大學倉山校區) iā sâ̤ diô iâ căi lāu iòng-dà̤-gák. Gáu lāu chŭng-tiĕng, huă hàng-bók-siŏh-sì dŭ kŭi kó̤ lāu, ô hūng-sáik gì, ô băh-sáik gì, hŏk-sĕng gĭng-guó, dŭ dìng-giâ-lì kák-sióng.
-
Băh-sáik gì iòng-dà̤-gák -
Tiĕng áng kó̤ lāu, diô-gièng kŭi lāu dĕng -
Dòng-ăng săng-kă -
Ngâ̤-ngâ̤ gà̤-dēng, iòng-dà̤-gák kŭi -
Dâung-ṳ̄ cĭ-hâiu , huă lŏk diê-dău
Dṳ̀ lā̤ ī-siông sū-câi, gáu Hók-huòng-lô (复園路), Dièu-iòng-lô (朝陽路), Gŏ̤-gièu-lô (高橋路), Ŭng-ciòng-ciĕ-lô (溫泉支路), Guŏng-mìng-gē̤ng Gŭng-huòng (光明港公園) dēng-dēng dê-huŏng, iâ kō̤-ī káng-giéng iòng-dà̤-gák .