Wn/cdo/高考尾科考完了 有儂輕鬆有儂啼
.jpg)
【2018年6月8號福州訊】
今旦（8號）是中國大陸高考其尾日。外語是高考尾尾蜀科，下晝三點開始考。
-
福州三中考點，考生等待裏場，考尾尾其外語 -
高考監控室
今年外語考試，福建考其是全國一卷。英語閱讀題有蜀篇文章，講遘以前人類盡少交流，互相獨立，全世界有大概12000種語言。之後人類發展，稠稠交流。同時，世界語言數量也敆𡅏變少，現在僅長6400種，其中有3200種語言使用者無超過6000隻儂。固講非洲語言第一豐富，有其國家語言伓啻蜀種。
五點收卷。
敆福州第三中學考點，外語固未考完，校門外兜就有野価儂，大部分都是考生其厝裏儂。有爸嬭，也有老儂，有其蜀厝都出來了。考完固未開門其時候，門兩爿考生共厝裏儂都敆𡅏等，有其攀講，有其無講話。大門乍開，就有考生當𣍐殆躄遘外兜。也有考生慢慢行，面𡅏無表情。固価考生盡像擔做蜀下卸去，微微笑𡅏離開考場。有考生看見自家爸嬭，盡去野激動，躄過去抱敆蜀堆，目滓流落拭𣍐澈。圍𡅏看其儂此刻鼓掌。有其固未看見自家其囝伲，就徛𡅏覷考生行出。有其招手討依命。
敆長樂第一中學考點，也有野価家長敆門兜等考生。等伊各儂走出其辰侯，大家都野歡喜。
-
考點旁邊其攤，乇都是免費掏其 -
高考固未結束，家長敆等考生 -
高考結束，考生走出其辰侯
採訪[edit | edit source]
今旦長樂其維基記者去長樂一中考點，採訪了幾隻敆一中考試其考生。講遘外語考試，伊各儂意見都差不多，下底是對其中蜀隻儂其採訪記錄。
同學汝好！
- 同學：汝好。
高考考完，有無什乇感受？
- 同學：三年其努力，敆今旦都值了。
噲今旦其考試，見覺蔣其？
- 同學：日中其文綜共理綜好考，但是下晝其英語野難。
- 邊兜其同學：差不多每蜀年都有伓好做其科目，譬如講去年暝就是理綜。
鼓樓其維基記者也採訪了福州三中其學生。下底是對三中考生王佳佳（化名）其採訪。
汝好呀，汝考完試心情何如？
- 王：已經𣍐捨了，茲邊其先生、同學、幾年其時間。
噲汝應該卜想對俤儂講謝謝吧。
- 王：嗯，感謝其儂野価啊，厝裏儂呀，客佻幫呀。我第一感謝我外嬤。平常爸媽工作野無閑，外嬤就會煮好飯，讓媽媽帶乞我食。外嬤野老了，固著總款麻煩伊。
接下來放假三個月日，拍算做什乇哩？
- 王：敆厝看閒書，出門就䀹相。
福州三中畢業學生依楊今旦也轉遘了母校，伊接受了維基記者其採訪。
同學汝好，汝也敆𡅏等儂伓是？
- 楊：啊無無無。我去年暝也敆租塊考書，仱𡅏蜀週年嘛，就卜想來覷蜀覷，感受囇。
總款呀。噲汝有什乇感受？
- 楊：我野感動，野感動。今旦大門蜀開，學生行出討厝裏儂。厝裏儂卜裏𣍐裏，就使勁招手，大聲告依命其名字。茲蜀種感覺，就，汝會仈吧。有其學生看見爸媽，做蜀下經𣍐得大啼，躄上去抱，現場掌聲雷動啊。固加學生行出來，有其野安靜，有其微微笑，有其敆攀講，遐辰候正正好日頭落山，照𡅏伊各儂肩頭，嚽就是蜀堆意氣風發其青年行上人生其征途了哇。